1. Ano, kauoha ae la ke alii Mosia e houluulu ia na kanaka a pau.

2. Ano, aole e like ka heluna o na keiki a Nepai, aole hoi e like ka heluna o ka poe mamo a Nepai, me ka poe kanaka o Zarahemela, oia no kekahi mamo a Muloka, a me ka poe i hele pu mai me ia ma ka waonahele;

3. A, aole e like ka heluna o ka poe kanaka o Nepai a me ka poe kanaka o Zarahemela me ko Lamana poe; he oiaio, aole e like ka heluna o lakou me ka hapalua o ko Lamana poe.

4. Ano, ua hoakoakoa ia ka poe kanaka a pau o Nepai, a me ka poe kanaka a pau hoi o Zarahemela, a ua hoakoakoa ia lakou i elua poe.

5. A eia kekahi, heluhelu ae la o Mosia, a kauoha ae la e heluhelu ia, na mooolelo o Zenifa i kona poe kanaka, he oiaio, heluhelu ae la oia i na mooolelo o ka poe kanaka o Zenifa, mai ka wa a lakou i haalele ai i ka aina o Zarahemela, a hiki i ka wa a lakou i hoi hou mai ai.

6. A heluhelu ae la no hoi oia i ka mooolelo o Alama a me kona poe hoahanau, a me ko lakou mau popilikia a pau, mai ka wa a lakou i haalele mai ai i ka aina o Zarahemela, a hiki aku i ka wa a lakou i hoi hou mai ai.

7. Ano, ia Mosia i hoopau ai i ka heluhelu ana i na mooolelo, ua pau kona poe kanaka i noho ma ka aina i ke kahaha a me ka pihoihoi;

8. No ka mea, aole lakou i ike i ka mea e manao ai; no ka mea, ia lakou i ike ai i ua poe la i hoopakele ia mai mailoko mai o ka noho luhi ana, ua piha lakou i ka olioli nui loa.

9. A eia hou, ia lakou i manao ai no ko lakou poe hoahanau, ka poe i pepehi ia ai e ko Lamana poe, ua piha lakou i ke kaumaha, a kulu iho la na waimaka he nui o ke kauamaha;

10. A eia hou, ia lakou i hoomanao ai i ka lokomaikai koke o ke Akua, a me kona mana i ka hoopakele ana ia Alama a me kona poe hoahanau, mailoko mai o na lima o ko Lamana, a o ka noho luhi ana hoi, hookiekie ae la lakou i ko lakou mau leo, a hoalohaloha aku la i ke Akua.

11. A eia hou, ia lakou i manao ai no ko Lamana poe, ko lakou poe hoahanau, a no ko lakou noho hewa a haumia ana, ua hoopiha ia lakou me ka walania a me ka ehaeha, no ka pono o na uhane o lakou.

12. A eia kekahi, huhu iho la kela poe keiki a Amulona a me kona mau hoahanau, ka poe i lawe i na kaikamahine a ko Lamana poe i mau wahine na lakou, me ka hana a ko lakou mau makuakane, aole lakou e kapa hou ia ma ka inoa o ko lakou mau makuakane, nolaila, lawe ae la lakou maluna o lakou iho i ka inoa o Nepai, i kapa ia ai lakou o na keiki a Nepai, a e helu pu ia me ka poe i kapa ia ko Nepai poe.

13. Ano, ua helu pu ia ka poe kanaka o Zarahemela me ko Nepai poe, a o keia no ka hooili ole ia ana o ke aupuni maluna o na mea ke ole lakou he poe mamo a Nepai.

14. A eia kekahi, ia Mosia i hoopau ai i ka olelo ana a i ka heluhelu ana i na kanaka, noi ae la oia ia Alama hoi e olelo aku i na kanaka.

15. A olelo aku la o Alama ia lakou, ia lakou i hoakoakoa ia ai ma na aha nui, a hele aku la ia mai ia poe aku ia poe aku, e hai ana i na kanaka i ka mihi a ma ka manaoio i ka Haku.

16. A kauleo aku la oia i ka poe kanaka o Limai a me kona poe hoahanau, ka poe a pau i hoopakele ia mai ai mailoko mai o ka noho luhi ana, e hoomanao lakou na ka Haku lakou i hoopakele mai.

17. A eia kekahi, mahope iho o ke ao ana aku o Alama i na kanaka i na mea he nui, a i pau aku la kana olelo ana ia lakou, ua makemake iho la ke alii Limai e bapetizo ia; a ua makemake kona poe kanaka a pau e bapetizo ia hoi lakou.

18. Nolaila, hele aku la o Alama iloko o ka wai, a bapetizo iho la ia lakou; he oiaio, bapetizo aku la oia ia lakou mamuli o ke ano ana i bapetizo ai i kona poe hoahanau iloko o na wai o Moramona; he oiaio, a o ka poe ana i bapetizo ai ua hui ia lakou i ka ekalesia o ke Akua; a o keia no ko lakou manaoio ma na olelo a Alama.

19. A eia kekahi, ae aku la ke alii Mosia ia Alama, i hoonoho aku ai oia i na ekalesia mawaena o ka aina a puni o Zarahemela; a haawi aku ia ia i ka mana e hoolilo i na kahuna a me na kumu maluna o kela ekalesia o keia ekalesia.

20. Ano, ua hana ia keia no ka lehulehu o na kanaka, no ka hiki ole ke hoomalu ia lakou e ke kumu hookahi; aole hoi i hiki ia lakou ke hoolohe mai i ka olelo a ke Akua i ke anaina hookahi.

21. Nolaila lakou i akoakoa ai ma na anaina okoa, i kapa ia ai na ekalesia; a ua loaa i kela ekalesia i keia ekalesia kona mau kahuna a me ko mau kumu, a e hai ana kela kahuna keia kahuna i ka olelo e like me ia i haawi ia mai ai ia ia ma ka waha o Alama;

22. A pela me na ekalesia he nui, hookahi ekalesia nae lakou a pau; he oiaio, o ka ekalesia o ke Akua: no ka mea, aole i hai ia kekahi mea ma na ekalesia a pau i ole ka mihi a me ka manaoio i ke Akua.

23. Ano, he mau ekalesia ehiku ma ka aina o Zarahemela. A eia kekahi, o na mea e makemake ana e lawe maluna iho o lakou i ka inoa o Kristo, a o ke Akua hoi, hui mai la lakou i na ekalesia o ke Akua;

24. A ua kapa ia lakou ko ke Akua poe kanaka. A ninini mai la ka Haku i kona Uhane maluna o lakou, a ua pomaikai lakou, a malu ma ka aina.