1. Eia kekahi, mahope iho o ka olelo ana a Abinadi i keia mau olelo, o aku la oia i kona lima, a i aku la, E hiki mai auanei ka manawa e ike ai na mea a pau i ka hoola ana o ka Haku; e alikealike ai ka ike ana o na lahuikanaka, a me na ohana, na olelo, a me na kanaka, a e hai aku ai imua o ke Akua ua pololei kona hoopai ana;

2. Alaila, e kipaku ia aku ka poe hewa mawaho, a he kumu ko lakou e aoa ai, a e uwe ai, a e kanikau ai, a e uwi ai i ko lakou mau niho; a o keia mea no ko lakou hoolohe ole i ka leo o ka Haku; nolaila, e hoolapanai ole ana ka Haku ia lakou;

3. No ka mea, ma ke ano kino a ma ke ano diabolo lakou, a he mana ko ke diabolo maluna o lakou; he oiaio, o kela nahesa kahiko nana i hoowalewale i ko kakou mau kupuna mua, a o ke kumu no ia o ko laua haule; a o ke kumu no ia o ka lilo ana o na kanaka a pau loa i ko ke kino, i ko ke kuko, a i ko ke diabolo, e ike ana i ka hewa mai ka pono mai, e hoolilo ana ia lakou iho malalo iho o ke diabolo.

4. Pela i poino ai na kanaka a pau; a, aia hoi, ua poino mau loa lakou, ina ua hoolapanai ole ke Akua i kona poe kanaka mai ko lakou ano poino mai a haule ana hoi.

5. Aka, e hoomanao, o ka mea e hoomau ana ma ko kona kino ano, e hele ana ma na aoao o ka hewa a me ke kipikipi i ke Akua, e noho ana oia ma kona wahi i haule ai, a aia no i ke diabolo ka mana a pau maluna ona. Nolaila, aia no ia me he mea la i hana ole ia ka hoolapanai; he enemi oia i ke Akua;

6. A o ke diabolo hoi he enemi oia i ke Akua. Ano, ina aole o Kristo i hiki mai iloko o ke ao nei, e olelo ana no na mea e hiki mai ana, me he mea la ua hiki mai i keia manawa, ina aole loa i hiki mai ka hoolapanai ana.

7. A ina ua ala ole o Kristo mai ka make mai, a i uhai aku i na apo o ka make, i ole ai lanakila ka lua kupapau, a i huelo hope awa ole ka make, ina ua hiki ole mai ke alahouana.

8. Aka aia no he alahouana, nolaila, aole o ka lua lanakila ana, a ua ale ia ka huelo hope awa o ka make iloko o Kristo;

9. Oia no ka malamalama a me ke ola o ko ke ao nei, he oiaio, he malamalama pau ole, i hiki ole ke hoopouli ia a mau loa aku; he oiaio, a he ola pau ole hoi, i ole ai e hoea hou mai ka make ma neia hope aku a mau loa aku.

10. He oiaio, e aahu ana na mea make i ka make ole, a me na mea palaho i ka palaho ole, a e lawe ia auanei e ku imua o kahi hookolokolo o ke Akua, e hookolokolo ia e ia e like me ka lakou mau hana, ina paha he maikai ia mau mea, ina paha he ino ia mau mea.

11. Ina he maikai lakou, i ke alahouana o ke ola a me ka pomaikai pau ole; a ina he ino lakou i ke alahouana o ka poino pau ole; e haawi ia aku i ke diabolo nana i hookauwa ia lakou, oia no ka poino ana;

12. A ua hele e like me ko lakou makemake a iini iho ma ko ke kino; a ua kahea ole aku i ka Haku, oiai na lima o ke aloha i o ia aku ia lakou, no ka mea, ua o ia na lima o ke aloha ia lakou, aole o lakou i makemake; ua ao ia lakou no ka lakou mau hala, aole nae lakou i haalele aku ia mau mea; a ua kauoha ia lakou e mihi, aole nae lakou i mihi.

13. Ano, aole anei e pono ia oukou ke haalulu, a ke mihi i ko oukou mau hewa, a e hoomanao, iloko a ma o Kristo la wale no e hiki ia oukou ke hoola ia?

14. Nolaila, ina e ao aku ana oukou i ke kanawai o Mose, e ao aku hoi he aka ia o kela mau mea e hiki mai ana;

15. E ao aku ia lakou e hiki mai ana ka hoolapanai ana ma o Kristo la ka Haku, oia no ka Makua mau loa. Amene.