He Olelo Hoakaka

I ka la 12 o Dekemaba, M. H. 1850, hiki aku la makou, kekahi mau Lunakahiko o ka Ekalesia o Iesu Kristo o ka Poe Hoano o na La Hope nei, i ko Hawaii pae aina, e hai aku i na kanaka i ka euanelio pololei o Iesu, i hoike ia mai ai ma o ka olelo hou ana la o ke Akua mai ka lani mai i kanaka, a e hai aku hoi ua hoomaka ka hana i wanana ia mai e na kaula hemolele he nui wale. Noho iho la makou a loaa iho la ia makou ka olelo; a i ka malama o Ianuari, 1852—he mau malama he umikumamakolu mai ka wa a makou i pae aku ai—ua hoomaka ia ka unuhi ia ana o keia buke, ka Buke a Moramona. I ka wa i hoomaka ia ai aole akaka no ka pai ia ana, no ka mea, aole i loaa i ka Ekalesia malaila ka Mea Pai, aole hoi he nui na kanaka iloko o ka Ekalesia; aka ua hoomaka ia ia e hooko i ka olelo a ke Akua; a ua ike ka mea nana i unuhi ina e hana oia i ka mea i hiki ia ia, na ke Akua e hoomakaukau i ke ala e hana ai i na mea i koe.

Ua unuhi ia ka Buke mawaena o na hana e he nui; no ka mea, ia manawa aole he nui o makou, a ua nui no ka hana e hana ia ma kela wahi keia wahi, ma ka hai ana i ka olelo, ma ka bapetizo ana i na kanaka, a ma ka hoonohonoho ana i ka Ekalesia. No ka lilo nui o ka manawa ma keia mau hana, ua lohi ka unuhi ia ana o ka buke, ua pau nae i ka unuhi ia ma ka malama o Iulai, 1853. I ka malama o Okatoba o ia makahiki ua hooholo ia e ka Ahaolelo o ka Ekalesia e kuai i Mea Pai; a ua hoouna aku i Califonia e kuai, o malaila aku i Nu Ioka. Ua hiki ae ka Mea Pai mai Nu Ioka ae i ko Hawaii pae aina i ka malama o Novemaba, 1854, a mahope mai ua lawe ia mai i Califonia. I ka malama o Iulai, 1855, ua hoomaka ia ka pai ia ana ilaila o ka Buke ma ka olelo Hawaii.

Ua akaka ka lima o ke Akua ma ka unuhi ia ana a me ka pai ia ana o keia Buke, a ua kupanaha i ka nana aku i keia manawa; no ka mea, ua hooko ia ka olelo a ka Haku, ana i olelo mai ai ma o kana poe kauwa la. Maloko o keia Buke ua kakau ia he mau wanana, o kekahi no ka hiki ana aku o ua Buke nei i na lahuikanaka a me na olelo a pau; a o kekahi hoi no ka hiki ana o ia mea i ke koena o ko ka hale o Iseraela, (oia no na kanaka ulaula,) a e hiki aku lakou i ka ike i ko lakou poe kupuna a me ka euanelio mana a pololei o Kristo. Ua pai ia keia mau wanana he iwakaluakumamalima makahiki a keu mawaena o na haole, a ua manao kekahi poe e ko ole loa ana; aka, ke ike nei kakou ke hooko ia nei ia mau wanana, no ka mea, ua unuhi ia a pai ia keia Buke ma na olelo he nui o Europa, a eia hoi ua unuhi ia a pai ia ma ka olelo Hawaii—he olelo ia a kekahi lahuikanaka ulaula—a ke hiki nei lakou i ka ike ia mau mea.

Auhea oukou, e ka poe heluhelu, mai hoohewa i keia Buke no na mea hemahema oloko, no ka mea, ina he mau mea hemahema iloko no ke kanaka ia mau mea, aole no ke Akua; aka, ke hoike aku nei au ia oukou ina e heluhelu oukou i ua Buke nei me ka pule aku i ke Akua, nana no e hoike ae ia oukou, ma ke mana o kona Uhane, ua oiaio ia mea, a mai ona mai no hoi.

Ke pule nei au i ke Akua, ka Makua Mau Loa, e haawi ae i kona Uhane Hemolele ia oukou e kokua ia oukou e hoomaopopo i ko oukou la pomaikai, i hiki ia oukou, ma ka malama ana i kana olelo, ke komo iloko o kona aupuni mau loa.