1. Ano, ke palapala iho nei au, o Moroni, i kekahi mau mea maikai i kuu manao; a ke palapala iho nei au i koʻu poe hoahanau, i ko Lamana poe; a ua makemake au e ike oukou ua hala aku na makahiki eha haneri me ka iwakalua a keu aku, mahope iho o ka haawi ia ana mai o ka hoailona no ka hiki ana mai o Kristo.

2. A e sila iho ana au i keia mau mooolelo, mahope iho o kaʻu olelo ana i kekahi mau olelo ma ke ano kauleo aku ia oukou.

3. Aia hoi, ke kauleo aku nei au ia oukou, i ka wa a oukou e heluhelu ai i keia mau mea, ina he mea naauao i ke Akua e heluhelu oukou ia mau mea, e hoomanao oukou i ka nani o ko ka Haku aloha ana i na keiki a kanaka, mai ka hana ia ana mai o Adamu, a hiki wale i ka manawa e loaa ai ia oukou keia mau mea, a e noonoo ia mea ma ko oukou mau naau.

4. A ia oukou e loaa ai keia mau mea, ke ake nei au e kauleo aku ia oukou, e ninau aku oukou i ke Akua, i ka Makua mau loa, ma ka inoa o Kristo, ina he oiaio keia mau mea; a ina e ninau aku auanei oukou me ka oiaio o ka naau, me ka makemake io, me ka manaoio ia Kristo, nana no e hoike mai i ka oiaio o ia mea ia oukou, ma ka mana o ka Uhane Hemolele;

5. A ma ka mana o ka Uhane Hemolele, ua hiki ia oukou ke ike i ka oiaio o na mea a pau.

6. A o kela mea keia mea i maikai, ua pololei a oiaio hoi; nolaila, aohe mea i maikai e hoole ana i ke Kristo, aka, e hooia ana ke ola la oia.

7. A ua hiki ia oukou ke ike ke ola la oia, ma ka mana o ka Uhane Hemolele; nolaila, ke ake nei au e ao ikaika aku ia oukou, i ole ai oukou e hoole aku i ka mana o ke Akua; no ka mea, e hana ana oia ma o ka mana la, e like me ka manaoio o na keiki a kanaka, oia like i keia la, i ka la apopo, a no ka wa pau ole.

8. A ke ao ikaika hou aku nei au ia oukou, e koʻu poe hoahanau, i ole ai oukou e hoole aku i na haawina o ke Akua, no ka mea, he nui ia mau mea; a ke hele mai nei ia mau mea mai ia Akua hookahi mai. A he nui na ano o ka lawelawe ia ana o keia mau haawina; aka, o ke Akua hookahi nana e hana nei i na mea a pau; a ua haawi ia mai ia mau mea ma na hoikeana o ka Uhane o ke Akua i na kanaka i mea e pono ai lakou.

9. No ka mea, aia, ua haawi ia mai i kekahi ma ka Uhane o ke Akua, i ao aku ai oia i ka olelo o ka naauao;

10. A i kekahi, i ao aku ai oia i ka olelo o ka ike ma ka Uhane hookahi no;

11. A i kekahi, ka manaoio nui loa; a i kekahi, na haawina o ka hoola ana ma ka Uhane hookahi no.

12. A i kekahi hoi, i hana aku ai oia i na hana mana nui;

13. A i kekahi hoi, i wanana aku ai oia no na mea a pau;

14. A i kekahi hoi, ka ike ana i na anela a me na uhane lawelawe;

15. A i kekahi hoi, na ano a pau o na olelo;

16. A i kekahi hoi, ka hoomaopopo ana i na olelo a me kela ano keia ano o na olelo.

17. A e hiki mai keia mau haawina a pau ma o ka Uhane la o Kristo; a e hiki mai keia mau mea i kela kanaka keia kanaka pakahi, e like me ia i makemake ai.

18. A ke ake nei au e ao ikaika aku ia oukou, e koʻu poe hoahanau aloha, e hoomanao oukou e hiki mai ana kela haawina maikai keia haawina maikai no Kristo mai.

19. A ke ake nei au e ao ikaika aku ia oukou, e kuu poe hoahanau i aloha ia, e hoomanao oukou oia like no ia, inehinei, i keia la, a no ka wa pau ole, a, aole loa e hoopau ia aku keia mau haawina a pau aʻu i olelo aku ai, no ko ka Uhane ia mau mea, a mau loa aku, oiai e ku ana ke ao nei, aka mamuli o ka hoomaloka o na keiki a kanaka wale no e pau ai.

20. Nolaila, he manaoio e pono ai; a ina he manaoio e pono ai, alaila, he manaolana no hoi e pono ai; a ina he manaolana e pono ai, alaila, he aloha no hoi e pono ai:

21. A ke ole he aloha ko oukou, aole loa e hiki ke hoola ia oukou ma ke aupuni o ke Akua; aohe no hoi e hiki ke hoola ia oukou ma ke aupuni o ke Akua, ina he manaoio ole ko oukou; aole no hoi e hiki oukou ina aole he manaolana ko oukou;

22. A ina aole o oukou manaolana, alaila ua poho loa ko oukou manao; a e hiki ana ka poho loa o ka manao no ka hewa.

23. A olelo oiaio mai la o Kristo i ko kakou poe kupuna, Ina he manaoio ko oukou, ua hiki ia oukou ke hana i na mea a pau i ku pono iaʻu.

24. Ano, ke olelo aku nei au i ko na welau a pau o ka honua, ina e hiki mai ka la e hoopau ia ai ka mana a me na haawina o ke Akua mawaena o oukou, e hana ia auanei ia mea mamuli o ka hoomaloka.

25. A auwe na keiki a kanaka, ina pela ia auanei; no ka mea, aole kekahi mea e hana ana i ka pono mawaena o oukou, aole loa hookahi. No ka mea, ina e hana ana kekahi i ka pono mawaena o oukou, e hana no oia ma ka mana a me na haawina o ke Akua.

26. A auwe ka poe nana e hoopau ae i keia mau mea a make, no ka mea, e make ana lakou iloko o ko lakou mau hewa, a ua hiki ole ke hoola ia lakou ma ke aupuni o ke Akua; a ke olelo aku nei au ia mea mamuli o na olelo a Kristo, aole oʻu wahahee.

27. A ke ao ikaika nei au ia oukou e hoomanao iho i keia mau mea; no ka mea, e hiki koke mai ana ka manawa e ike ai oukou aole oʻu wahahee, no ka mea, e ike auanei oukou iaʻu ma kahi hookolokolo o ke Akua, a e olelo aku ka Haku ke Akua ia oukou, Aole anei au i hai aku i kaʻu mau olelo ia oukou, i na mea i palapala ia e keia kanaka, e like me kekahi e hea ana mai ka lepo ae; he oiaio, e like me kekahi e olelo ana noloko mai o ka lepo?

28. Ke hai aku nei au i keia mau mea i ka hooko ia ana o na wanana. A, aia hoi, e puka mai ia mau mea noloko mai o ka waha o ke Akua mau loa; a e ha ae kana olelo ia hanauna aku ia hanauna aku.

29. A e hoike ae no ke Akua ia oukou, o ka mea aʻu i palapala ai, he oiaio.

30. A eia hou, ke makemake nei au e ao ikaika ia oukou, e hele mai oukou io Kristo la, a e hopu i kela haawina maikai i keia haawina maikai, a e hoopa ole i ka haawina ino, aohe hoi i ka mea haumia.

31. A e ala, a e ea ae mai ka lepo ae, e Ierusalema; he oiaio, a e komo i kou lole nani, e ke kaikamahine o Ziona, a e hooikaika i kou mau kakia, a e hooakea aku i kou mau mokuna no ka wa pau ole, i hoohoka hou ole ia ai oe, i hooko ia ai na berita a ka Makua mau loa i hana mai ai ia oe, e ko ka hale o Iseraela.

32. He oiaio, e hele mai io Kristo la, a e hoohemolele ia iloko ona, a e hoole ia oukou iho i na mea hewa a pau; a ina e hoole ia oukou iho i na mea hewa a pau, a e aloha aku i ke Akua me ko oukou mana, naau, a ikaika a pau, alaila, ua lawa kona lokomaikai no oukou, i hemolele ai oukou ma o kona lokomaikai la iloko o Kristo; a ina ma ka lokomaikai o ke Akua ua hemolele oukou iloko o Kristo, ua hiki ole ia oukou ma kekahi mea, ke hoole i ka mana o ke Akua.

33. A eia hou, ina hemolele oukou iloko o Kristo, ma o ka lokomaikai la o ke Akua, aole hoi hoole i kona mana, alaila ua hoomaemae ia oukou iloko o Kristo ma ka lokomaikai o ke Akua, ma o ka hookahe ia ana la o ke koko o Kristo, oia no ka berita a ka Makua i ke kala ia ana o ko oukou mau hala, i lilo ai oukou i hemolele me ke kina ole.

34. Ano, ke uwe aloha aku nei au ia oukou a pau. E hele koke ana au e maha ma ka paradaiso o ke Akua, a hiki wale i ka wa e hui pu hou ai kuu uhane a me kuu kino, a lawe lanakila ia aku au maloko aku o ka lewa, e halawai pu me oukou imua o kahi hookolokolo oluolu o Iehova ka nui, ka Lunakanawai mau loa o ka poe ola a me ka poe make. Amene.