1. Ano, ke olelo aku nei au no ka bapetizo ana. Aia hoi, o na lunakahiko, na kahuna, a me na kumu ua bapetizo ia lakou; a ua bapetizo ole ia aku lakou, ina aole lakou i hoohua mai i ka hua ku pono, i ku pono ai lakou no ia mea;

2. Aole hoi lakou i bapetizo aku i na kanaka, ke ole lakou i hele mai me ka naau pepe a me ka uhane mihi, a hoike mai i ka ekalesia e mihi io ana lakou i ko lakou mau hewa a pau.

3. Aole i bapetizo ia na kanaka, ke ole lakou i lawe maluna iho o lakou i ka inoa o Kristo, me ka manao paa e hookauwa aku nana, a hiki wale aku i ka hopena.

4. A mahope iho o ka bapetizo ia ana o lakou, a ua hana ia ae a hoomaemae ia ma ka mana o ka Uhane Hemolele, ua helu pu ia lakou mawaena o ka poe kanaka o ka ekalesia o Kristo, a ua lawe ia ko lakou mau inoa, i hiki ke hoomanao ia ai lakou a e hanai ia ai ma ka olelo maikai a ke Akua, e hoomau ia lakou ma ke ala pololei, e hoomakaala mau ia lakou i ka pule, e paulele ana maluna o na pono wale no o Kristo, oia no ka mea nana i hookumu a me ka mea hoi nana i hoopaa i ko lakou manaoio.

5. A halawai pinepine ae la ka Ekalesia ma kahi hookahi, e hookeai a e pule, a e olelo pu kekahi me kekahi no ka pomaikai o ko lakou mau uhane;

6. A halawai pinepine ae la lakou i kahi hookahi e ai i ka berena a e inu i ka waina, ma ka hoomanao i ka Haku o Iesu;

7. A ua ikaika lakou e ike i ole ai he hewa mawaena o lakou; a o na mea i loaa e hana hewa ana, a hoohewa ae la kekahi mau hoike ekolu o ka ekalesia ia lakou imua o na lunakahiko, a aole lakou i mihi, aohe hoi i hai mai i ko lakou mau hewa, ua holoi ia aku ko lakou mau inoa, a ua helu pu ole ia lakou mawaena o ka poe kanaka o Kristo;

8. Aka, e like me ka nui o na wa a lakou i mihi ai, a imi i ke kala ia ana, me ka makemake io, ua kala ia aku lakou.

9. A ua alakai ia ae ko lakou mau halawai e ka ekalesia, mamuli o ke ano o na hana ana o ka Uhane, a ma o ka mana la o ka Uhane Hemolele; no ka mea, e like me ka mana o ka Uhane Hemolele i alakai ai ia lakou, ina paha e hai olelo, a e hooikaika paha, e pule paha, e noi aku paha, a e himeni paha, pela no ia i hana ia ai.