1. E kaʻu keiki i aloha ia, ke palapala hou iho nei au ia oe, i ike ai oe ke ola nei au; aka, ke palapala iho nei au i kekahi mea i eha nui.

2. No ka mea, he kaua eha loa koʻu me ko Lamana poe, a ma ia kaua ana aole makou i lanakila; a ua haule iho o Arekeanatusa ma ka pahikaua, a me Lurama laua me Emarona no hoi; he oiaio, a ua poino he nui wale o ko makou poe kanaka koikoi.

3. Ano hoi, e kaʻu keiki, ke makau nei au o luku mai auanei ko Lamana poe i keia poe kanaka, no ka mea, aole o lakou mihi, a e hooeueu mau ana o Satana ia lakou i ka huhu, i kekahi me kekahi.

4. Aia hoi, e hooikaika mau ana au ia lakou; a i ka wa aʻu i olelo aku ai i ka olelo a ke Akua me ka oi loa, haalulu ae la lakou a huhu mai la iaʻu; a i ka wa aʻu i hana ai me ka oi ole, ke hoopaakiki nei lakou i ko lakou mau naau e ku e ia mea; nolaila, ke makau nei au ua hooki paha ka hakoko ana o ka Uhane o ka Haku me lakou.

5. No ka nui loa o ko lakou huhu, me he mea la iaʻu aole o lakou makau i ka make; a ua pau aku la ko lakou aloha, kekahi i kekahi; a iini nui lakou mamuli o ke koko a me ka hoopai i na manawa a pau.

6. Ano, e kaʻu keiki aloha, me ko lakou paakiki, e hana ikaika nae kaua; no ka mea, ina e hooki aku kaua i ka hana, e lawe ia mai auanei kaua malalo iho o ka hoohewa ia ana; no ka mea, he hana ka kaua e hana ai oiai ma keia kino maoli, i lanakila aku ai kaua maluna o ka enemi o ka pono a pau, a e hoomaha i ko kaua mau uhane ma ke aupuni o ke Akua.

7. Ano, ke palapala iho nei au i kekahi mau mea no na popilikia o keia poe kanaka. No ka mea, e like me ka ike i loaa ai iaʻu mai ia Amarona mai, aia hoi, he nui na mea pio o ko Lamana poe, a lakou i lawe aku ai mai ka hale kiai o Seriza; a he poe kane, a poe wahine a me na kamalii lakou.

8. A o na kane a me na makuakane o ua poe wahine la a me na kamalii ka lakou i pepehi ai; a ke hanai nei lakou i na wahine i ka io o ka lakou poe kane a i na keiki i ka io o ko lakou poe makuakane; he wahi wai uuku loa wale no ka i haawi ia ia lakou.

9. Aole e oi aku ana keia mea hoopailua nui o ko Lamana poe, i ko ko kaua poe kanaka ma Morianatuma. No ka mea hoi, ua lawe pio ae la lakou i na kaikamahine he nui wale a ko Lamana poe; a mahope iho o ko lakou hoonele ana ia lakou la i ka mea minamina a makemake loa ia mamua iho o na mea a pau, oia no ka puupaa ana a me ka maemae;

10. A pau ae la keia mea i ka hana ia e lakou, pepehi aku la lakou ia lakou la, ma ke ano mainoino loa, e hoehaeha ana i ko lakou la mau kino a hiki i ka make; a mahope iho o ka lakou hana ana i keia, ai iho la lakou i ko lakou la io e like me na holoholona hihiu no ka paakiki o ko lakou mau naau; a ua hana lakou ia mea i hoike no ka manao koa.

11. E kaʻu keiki i aloha ia, pehea la e hiki ai i kekahi lahuikanaka e like me keia, he poe i nele i ka malamalama ole,

12. (A ua hala aku la he mau makahiki he kakaikahi wale no, a he lahuikanaka malama a oluolu lakou; )

13. Aka, e kaʻu keiki, pehea la e hiki ai i kekahi lahuikanaka e like me keia, (ka poe e hauoli ana ma ka ino,)

14. Ke manao e kaohi ana ke Akua i kona lima ma ka hoopai ana ia lakou?

15. Aia hoi, ke hea nei kuu naau, Auwe keia poe kanaka! E puka mai ma ka hoopai, e ke Akua, a e hoonalo iho i ko lakou mau hewa, a me na hana ino, a me na hana hoopailua maimua aku o kou alo.

16. A eia hou, e kaʻu keiki, he nui na wahinekanemake a me ka lakou poe kaikamahine, e noho la ma Seriza; a o kela hapa o ka ai a ko Lamana poe i lawe ole aku ai, aia hoi, ua lawe aku ka poe kaua o Zenepai, a haalele ae la ia lakou la e auwana i kela wahii k eia wahi a lakou i hiki ai, i loaa ai ka ai; a nui wale na luahine e maule ana ma ke ala, a e make ana.

17. A ua nawaliwali ka poe koa pu me au; a aia na puali kaua o ko Lamana poe mawaena konu o Seriza a me au; a o ka poe a pau i holo aku i ka poe kaua la o Aarona, ua haule iho la lakou la a make i ka lakou hana lokoino weliweli.

18. Auwe ka hewa o koʻu poe kanaka! Ua nele lakou i ka maluhia ole a me ke aloha ole. Aia hoi, he kanaka wale no au, a he ikaika o ke kanaka wale no koʻu, a ua hiki hou ole iaʻu ke hooko aku i kaʻu mau kauoha;

19. A ua lilo iho la lakou i ikaika ma ko lakou kapae ana; a ua kohu like lakou me ka holoholona, e hookoe ole ana i kekahi, aohe no i ka poe elemakule, aohe no hoi i ka poe opiopio; a ke lealea nei lakou ma na mea a pau, koe wale no na mea maikai; a o na popilikia o ko makou poe wahine, a me ko makou poe keiki, maluna iho o ka ili a pau o keia aina, ua oi aku mamua o na mea a pau; he oiaio, ua hiki ole i ka olelo ke hai aku, aole no hoi i hiki ia ke palapala ia.

20. Ano, e kaʻu keiki, aole au e hoomau hou ana ma keia mea ino weliweli. Aia hoi, ua ike oe i ka hewa o keia poe kanaka; ua ike oe aole o lakou manao pololei, a ua pau ke aloha ana; a ua kela aku ko lakou hewa i ko ko Lamana poe.

21. Aia hoi, e kaʻu keiki, ua hiki ole iaʻu ke hoomaikai aku ia lakou i ke Akua, o hahau mai oia iaʻu.

22. Aka hoi, e kaʻu keiki, ke hoomaikai aku nei au ia oe i ke Akua, a ke manaolana nei au iloko o Kristo e hoola ia auanei oe; a ke pule nei au i ke Akua nana e hookoe mai i kou ola, e ike i ka hoi hou ana o keia poe kanaka ia ia, a i ole ia, i ko lakou anai loa ia ana; no ka mea, ua ike au e make io no lakou, ke mihi ole lakou a hoi hou aku io na la;

23. A ina e make lakou, alaila e like auanei ia me ko ko Iareda poe, no ka hookuli o ko lakou mau naau, e imi ana i ke koko a me ka hoopai; a ina pela, e make lakou.

24. Ua ike kaua he nui wale na hoahanau o kaua i haalele ku e mai a hele aku i ko Lamana poe Ia, a e nui wale ana na mea e ae e haalele ku e mai auanei no hoi, a hele aku io lakou la; nolaila, e palapala i kekahi mau mea he kakaikahi, ina e hookoe ia oe, a make auanei au me ka ike ole aku ia oe; aka, ke lana nei kuu manao e ike koke au ia oe; no ka mea, he mau mooolelo laa koʻu, aʻu e makemake nei e haawi aku ia oe.

25. E kaʻu keiki, e kupaa iloko o Kristo; a, aole na na mea aʻu i palapala ai e hooeha ia oe, e hookaumaha iho ia oe ilalo i ka make, aka, na Kristo oe e hapai ae; a na kona mau popilikia a make, a me ka hoike ana o kona kino i ko kakou poe kupuna, a me kona aloha a hoomanawanui ana, a me ka manaolana o kona nani a o ke ola mau loa, e kau mau iho iloko o kou naau ia ao aku ia ao aku.

26. A na ka lokomaikai o ke Akua ka Makua, nona ka noho alii kiekie ma na lani, a me ko kaua Haku o lesu Kristo, ka mea e noho ana ma ka lima akau o kona mana, a hiki aku i ka wa e lilo ai na mea a pau malalo iho ona, e noho pu i keia manawa a mau loa aku me oe, ia ao aku ia ao aku. Amene.