Ka Buke A Moroni

1. Ano, owau, o Moroni, mahope iho o koʻu hoopau ana i ka hoopokole ana i ka mooolelo o ka poe kanaka a Iareda, ua manao iho la au e kakau hou ole iho, aka, aole au i make a hiki i keia manawa; a ke hoike ole aku nei au iaʻu iho i ko Lamana poe, o pepehi mai lakou iaʻu.

2. No ka mea, ua ikaika ino ko lakou mau kaua mawaena o lakou iho; a no ko lakou inaina, ke pepehi mai la lakou i kela Nepai i keia Nepai, ka mea aole e hoole aku i ke Kristo.

3. A, aole au, o Moroni, e hoole aku i ke Kristo; nolaila, ke auwana nei au i kela wahi i keia wahi kahi aʻu i hiki ai, no ka maluhia o koʻu ola iho.

4. Nolaila, ke kakau iho nei au i na mea hou he kakaikahi, aole e like me ka mea aʻu i manao ai; no ka mea, ua manao au e kakau hou ole iho; aka, ke kakau iho nei au i na mea hou he kakaikahi, i lilo ai paha auanei ia mau mea i mea waiwai i koʻu poe hoahanau, ko Lamana poe, ma kekahi la aku, e like me ka makemake o ka Haku.