1. O kekahi episetole a koʻu makuakane o Moramona, i palapala mai ai iaʻu, o Moroni nei; a ua palapala ia ia iaʻu i ka wa mahope koke iho o koʻu kahea ia ana i ka oihana kahuna pule. A menei oia i palapala mai ai iaʻu, i ka i ana:

2. E kaʻu keiki aloha, e Moroni e, ke hauoli nui loa nei au no ka malama ana o kou Haku, o lesu Kristo, ia oe, a ua kahea ae ia oe i kana oihana kahuna, a i kana hana hemolele.

3. Ke hoomanao nei au ia oe i na manawa a pau ma kaʻu mau pule, e pule mau ana i ke Akua, i ka Makua, ma ka inoa o kana Keiki hemolele, o lesu, i malama mai ai oia, ma o kona aloha a lokomaikai nui loa la, ia oe, ma o ka hoomau ana la o ka manaoio ma kona inoa, a hiki i ka hopena.

4. Ano, e kaʻu keiki, ke olelo aku nei au ia oe no ka mea e hoeha nui loa ana iaʻu; no ka mea, e hoeha ana iaʻu ka ea ana o na hoopaapaa mawaena o oukou.

5. No ka mea, ina ua lohe au i ka oiaio, aia iho nei he mau hoopaapaa ana mawaena o oukou no ka bapetizo ia ana o ko oukou mau keiki uuku.

6. Ano, e kaʻu keiki, ke makemake nei au e hana ikaika oe, i hoopau ia aku ai keia hewa nui maiwaena aku o oukou; no ka mea, no keia manao ua palapala iho au i keia episetole.

7. No ka mea, emo ole mahope iho o koʻu lohe ana i keia mau mea mai ou mai, ninau aku la au i ka Haku no ia mea. A hiki mai la ka olelo a ka Haku ioʻu nei, ma o ka mana la o ka Uhane Hemolele, i ka i ana:

8. E hoolohe mai i na olelo a Kristo, kou Mea Hoolapanai, kou Haku a me kou Akua. Aia hoi, hele mai la au iloko o ke ao nei aole e hea aku i ka poe pono, aka, i ka poe hewa, i ka mihi; aole no ka poe ola ke kahuna lapaau, aka, no ka poe mai no; nolaila, ua ola na keiki uuku, no ka mea, ua hiki ole ia lakou ke hana hewa; no ia mea, ua lawe ia aku ka poino o Adamu mai o lakou ae iloko oʻu, i ole ai ia he mana maluna o lakou; a ua hoopau ia aku ke kanawai o ka okipoepoe ana iloko oʻu.

9. A mamuli o keia ano i hoike mai ai ka Uhane Hemolele i ka olelo a ke Akua iaʻu; nolaila, e kaʻu keiki i aloha ia, ua ike au he hoomaewaewa kohu loa no ia imua o ke Akua, ke bapetizo aku oukou i na keiki uuku.

10. Aia hoi, ke i aku nei au ia oe, o keia kau e ao aku ai: o ka mihi a me ka bapetizo ana i ka poe ku i ka hookolokolo ia a hiki hoi ke hana i ka hewa; he oiaio, e ao aku i na makua e mihi lakou a e bapetizo ia e pono ai, a e hoohaahaa ia lakou iho me ka lakou poe keiki uuku, a e hoola ia auanei lakou a pau me ka lakou poe keiki uuku;

11. Aole e pono ka mihi o ka lakou poe keiki, aohe hoi ka bapatizo ia ana. Aia hoi, o ka bapetizo ana, ea, i ka mihi no ia i ka hooko ana i na kauoha i ke kala ia ana o na hala.

12. Aka, ua ola na keiki uuku iloko o Kristo, mai ka hookumu ia ana mai o ke ao nei; ina aole pela, he Akua lawe kapakahi ke Akua, a he Akua lolilua no hoi, a he mea manao nui i ko na kanaka helehelena; no ka mea, ehia la ka nui o na keiki uuku i make me ka bapetizo ole ia.

13. Nolaila, ina ua hiki ole i na keiki uuku ke hoola ia me ka bapetizo ole ia, alaila, ua hele aku ua poe nei i ke gehena pau ole.

14. Aia hoi, ke i aku nei au ia oe, o ka mea e manao ana he mea e pono ai e bapetizo ia na keiki uuku, aia no ia ma ke au o ka awaawa, a ma na mea paa o ka hewa; aole ona manaoio, manaolana, aohe no hoi he aloha; nolaila, ina paha e hooki ia aku oia oiai oia ma ia manao, e iho aku no oia ilalo i gehena.

15. No ka mea, he weliweli no ka hewa e manao e hoola ana ke Akua i kekahi keiki no ka bapetizo ana, a e make ana kekahi no kona bapetizo ole ia ana.

16. Auwe ka poe e hookapae ae ana i na aoao o ka Haku mamuli o keia ano, no ka mea, e make auanei lakou, ke mihi ole lakou. Aia hoi, ke olelo aku nei au me ka wiwo ole, me ka mana mai ke Akua mai; a ua makau ole au i ka mea i hiki ai i kanaka ke hana; no ka mea, ke kipaku aku nei ke aloha oiaio i ka makau a pau;

17. A ua hoopiha ia au me ke aloha io, oia no ke aloha mau loa; nolaila, ua like na keiki a pau iaʻu; nolaila ke aloha aku nei au i na keiki uuku me ke aloha oiaio; a ua alikealike lakou a pau, a he poe hoaloaa hoi o ke ola mau loa.

18. No ka mea, ua ike au aole he Akua kapakahi ke Akua, aohe no hoi he mea lolilua; aka, ua luli ole oia ia ao aku a mau loa aku.

19. Ua hiki ole i na keiki uuku ke mihi; nolaila, he hewa weliweli e hoole i na lokomaikai oiaio o ke Akua ia lakou, no ka mea, ua ola lakou a pau iloko ona no kona lokomaikai.

20. A o ka mea e olelo ana, e bapetizo ia na keiki uuku e pono ai, ke hoole la oia i na lokomaikai o Kristo, a e hoolilo ana i kona kalahala ana a me ka mana o kona hoolapanai ana, i mea ole.

21. Auwe ka poe e like me ia, no ka mea, e kokoke ana lakou i ka make, i gehena, a i ka eha pau ole. Ke olelo wiwo ole aku nei au ia mea, ua kauoha mai la ke Akua iaʻu. E hoolohe mai ia mau mea a e malama, i ole e ku kue ia mau mea ia oukou ma ka noho hookolokolo o Kristo.

22. No ka mea, aia hoi, ua ola na keiki uuku a pau iloko o Kristo, a me ka poe a pau no hoi me ke kanawai ole. No ka mea, e hiki mai ana ka mana o ka hoolapanai maluna o ka poe a pau me ke kanawai ole; nolaila, o ka mea i hoohewa ole ia, a, aole hoi malalo iho o ka hoohewa ia ana, ua hiki ole ke mihi; a i ka poe me neia aole he mea e pomaikai ai ka bapetizo ana.

23. Aka, he hoomaewaewa ia imua o ke Akua, e hoole ana i na lokomaikai o Kristo, a me ka mana o kona Uhane Hemolele, a e paulele ana ma na hana make.

24. Aia hoi, e kaʻu keiki, he mea e pono ole ai keia; no ka mea, o ka mihi, ea, no ka poe ia malalo iho o ka hoohewa ia ana, a malalo iho o ka poino o kahi kanawai i uhai ia.

25. A o na hua mua o ka mihi oia no ka bapetizo ana; a e hiki mai ana ka bapetizo ia ma o ka manaoio la, i ka hooko ana i na kauoha; a e lawe mai ana ka hooko ana i na kauoha i ke kala ia ana o na hala;

26. A e lawe mai ana ke kala ia ana o na hala i ke akahai, a me ka haahaa o ka naau, a no ke akahai, a me ka haahaa o ka naau, e hiki mai ana ka hoomaikai ia ana o ka Uhane Hemolele, a e hoopiha ana keia kokua me ka manaolana a me ke aloha oiaio, a e hoomau ana ua aloha nei ma ka ikaika i ka pule, a hiki mai ka hopena, i ka wa e noho pu ai ka poe hoano a pau me ke Akua.

27. Aia hoi, e kaʻu keiki, e palapala hou aku au ia oe, ke hele koke ole aku au mawaho e ku e aku i ko Lamana poe. Aia hoi, ua lilo ka haaheo o keia lahuikanaka, ka poe kanaka o ko Nepai, i mea e make ai lakou, ke ole lakou e mihi.

28. E pule aku no lakou, e kaʻu keiki, i hiki mai ai ka mihi ia lakou. Aka hoi, ke makau nei au anoai ua hooki paha ka hooikaika ana o ka Uhane ia lakou; a ma keia hapa o ka aina ke imi nei no hoi lakou e hoohiolo iho i ka mana a pau a me na oihana, i hiki mai ai mai ke Akua mai; a ke hoole nei lakou i ka Uhane Hemolele.

29. A mahope iho o ko lakou hoomalau ana i ka ike nui me neia, e kaʻu keiki, e make koke io no lakou i ka hooko ana i na wanana i olelo ia ai e ka poe kaula, me na olelo ponoi no hoi a ko kakou Mea e Ola ai.

30. Ke uwe aloha nei au, e kaʻu keiki, a hiki aku i ka wa aʻu e palapala iho ai ia oe, a i ole ia, e halawai hou me oe. Amene.