1. Ano, ke kakau iho nei au, o Moroni, i kekahi mau olelo he kakaikahi a koʻu makuakane, o Moramona, ana i olelo mai ai no ka manaoio, ka manaolana, a me ke aloha; no ka mea, mamuli o keia ano oia i olelo mai ai i na kanaka, ia ia i ao mai ai ia lakou ma ka halehalawai a lakou i kukulu iho ai, i wahi e hoomana ai:

2. Ano, ke olelo aku nei owau, o Moramona, ia oukou, e koʻu poe hoahanau aloha; a ma ka lokomaikai o ke Akua, ka Makua, a me ko kakou Haku o Iesu Kristo, a me kona makemake hemolele, no ka haawina o kona hea ana iaʻu, i ae ia mai au e olelo aku ia oukou i keia manawa;

3. Nolaila, ke ake nei au e olelo aku ia oukou, e ka poe o ka ekalesia, ka poe e hahai malie ana ia Kristo, a i loaa no hoi ka manaolana ku pono, ma ia mea i hiki ai ia oukou ke komo iloko o ka maha o ka Haku mai keia manawa aku, a hiki wale aku i ka wa e maha pu ai oukou me ia ma ka lani.

4. Ano, e kuu poe hoahanau, ke manao nei au i keia mau mea no oukou, no ko oukou hele malie ana me na keiki a kanaka;

5. No ka mea, ke hoomanao nei au i ka olelo a ke Akua, e olelo ana: Ma ka lakou mau hana e ike ai oukou ia lakou; no ka mea, ina he maikai ka lakou mau hana, alaila, ua maikai no hoi lakou.

6. No ka mea, aia hoi, ua olelo mai ke Akua: O ke kanaka i ino, ua hiki ole ke hana i ka mea maikai; no ka mea, ina e alana ana oia he makana, a e pule ana paha i ke Akua, ke ole oia e hana ia mea me ka makemake io, e pomaikai ole ana oia ia mea.

7. No ka mea, aole i helu ia ia mea nona no ka pono.

8. No ka mea, ina he kanaka i ino, e haawi ana i ka makana, e hana ana oia ia mea me ke kunukunu; nolaila, ua helu like ia ia mea nona, me he mea la ua aua oia i ka makana; nolaila, ua manao ia oia me ka mea ino imua o ke Akua.

9. A pela hoi i manao ia ai he ino i ke kanaka, ina e pule aku oia, aole me ka makemake io o ka naau; he oiaio, a e pomaikai ole ana oia ia mea; no ka mea, e hookipa ole ana ke Akua i na mea e like me ia;

10. Nolaila, o ke kanaka i ino, ua hiki ole ia ia ke hana i ka mea maikai; aohe no hoi oia e haawi ae i ka makana maikai.

11. No ka mea, ua hiki ole i ka punawai awaawa ke puapuai mai i ka wai maikai; aohe no hoi i hiki i ka punawai maikai ke puapuai mai i ka wai awaawa; nolaila, o ke kanaka e noho kauwa ana na ke diabolo, ua hiki ole ke hahai aku ia Kristo; a ina e hahai aku oia ia Kristo, ua hiki ole ia ia ke noho kauwa aku na ke diabolo.

12. Nolaila, o na mea a pau i maikai, e hiki mai ana ia mau mea mai ke Akua mai; a o ka mea i ino, e hiki mai ana ia mai ke diabolo mai; no ka mea, he enemi no ke diabolo i ke Akua, a e kaua ku e mau aku ana oia ia ia, a e kono mai ana a e hoowalewale mai ana e lawehala, a e hana mau i ka mea i ino.

13. Aka hoi, o ka mea no ke Akua, e kono mai ana a e hoowalewale mai ana ia e hana i ka maikai i na wa a pau; nolaila, o kela mea keia mea e kono mai ana a e hoowalewale mai ana e hana i ka maikai, a e aloha aku i ke Akua, a e hookauwa aku nana, ua hoouluhia ia e ke Akua.

14. Nolaila, e makaala, e koʻu poe hoahanau aloha, i manao ole ai oukou i ka mea i ino, no ke Akua mai ia, a i ka mea maikai a no ke Akua hoi, no ke diabolo mai ia.

15. No ka mea, e oʻu poe hoahanau, ua haawi ia mai ia oukou e noonoo pono, i ike ai oukou i ka maikai mai ka ino ae; a o ke ano e hoomaopopo ai, he akaka loa, e ike ai oukou me ka ike paka, me ka malamalama o ka la, mai ka po pouli ae.

16. No ka mea, aia hoi, ua haawi ia mai ka Uhane o Kristo i kela kanaka i keia kanaka, i ike ai lakou i ka maikai mai ka ino ae; nolaila, ea, ke hoike aku nei au ia oukou i ka hana e noonoo pono ai; no ka mea, o kela mea keia mea e kono mai ana e hana i ka maikai, a e hooikaika ana e manaoio ia Kristo, ua hoouna ia mai ia ma ka mana a me ka haawina o Kristo; nolaila, ua hiki ia oukou ke ike me ka ike paka, no ke Akua mai ia;

17. Aka, o ka mea e hooikaika ana i na kanaka e hana ino, a e manaoio ole ia Kristo, a e hoole aku ia ia, a hookauwa ole aku na ke Akua, e hoomaopopo oukou me ka ike paka, no ke diabolo mai ia, no ka mea, mamuli o keia ano e hana ana ke diabolo, no ka mea, aole e hooikaika ana oia i na kanaka e hana i ka maikai, aole loa i hookahi; aole no hoi kana poe anela; aole no hoi ka poe e hookauwa ana ia lakou iho nana.

18. Ano, e oʻu poe hoahanau, i ka ike ana ua ike oukou i ka malamalama i hiki ai ia oukou ke noonoo pono, a o ua malamalama nei, oia no ka malamalama o Kristo, e makaala i ole ai oukou e manao hewa; no ka mea, me ka manao ino a oukou e manao ino aku ai, pela hoi e manao ino ia mai ai oukou.

19. Nolaila, ke noi aku nei au ia oukou, e na hoahanau, e imi ikaika oukou i ka malamalama o Kristo, i ike ai oukou i ka maikai mai ka ino ae; a ina e hopu aku oukou i kela mea maikai i keia mea maikai, a e hoohewa ole aku ia mea, e lilo oiaio no oukou i mau keiki na Kristo.

20. Ano, e koʻu poe hoahanau, pehea la e hiki ai ia oukou ke hopu i kela mea maikai i keia mea maikai?

21. Ano, ua hiki mai la au i ua manaoio la, ka mea aʻu i i aku ai ia oukou e olelo aku au; a e hai aku au ia oukou i ke ala, i hiki ai ia oukou ke hopu aku i kela mea maikai i keia mea maikai.

22. No ka mea, aia hoi, e ike ana ke Akua i na mea a pau, e mau loa ana oia ia ao aku ia ao aku, aia hoi, hoouna mai la oia i na anela e lawelawe mai i na keiki a kanaka, e hoike mai no ka hiki ana mai o Kristo; a iloko o Kristo e hiki mai ai kela mea maikai keia mea maikai.

23. A hai mai la no hoi ke Akua i na kaula, ma kona waha iho, e hiki mai auanei o Kristo.

24. A, aia hoi, ua nui no na ano o kona hoike ana mai i na mea i na keiki a kanaka, i na mea maikai; a o na mea a pau i maikai, e hiki mai ana ia mau mea mai ia Kristo mai, i ole ia ua haule iho na kanaka, a ua hiki ole i kekahi mea maikai ke hele mai io lakou la.

25. Nolaila, ma ka lawelawe ana o na anela, a ma kela olelo keia olelo i puka mai ai noloko mai o ka waha o ke Akua, hoomaka ae la na kanaka e hana me ka manaoio iloko o Kristo; a pela ma ka manaoio, hopu aku la lakou i kela mea maikai i keia mea maikai; a pela no ia a hiki aku i ka hiki ana mai o Kristo.

26. A mahope mai o ka wa ana i hiki mai ai, hoola ia mai no hoi na kanaka ma ka manaoio ma kona inoa; a ma ka manaoio, lilo iho la lakou i poe keiki na ke Akua. A he oiaio, me Kristo e ola nei, olelo mai la oia i keia mau olelo i ko kakou poe kupuna, i ka i ana mai: O kela mea keia mea a oukou e noi aku ai i ka Makua ma koʻu inoa, i maikai, ma ka manaoio, e manao ana e loaa ana ia oukou, aia hoi, e hana ia mai ia ia oukou.

27. Nolaila, e oʻu poe hoahanau i aloha ia, ua oki ae la anei na hana mana, no ka pii ana o Kristo iloko o ka lani, a no ka noho ana ilalo ma ka lima akau o ke Akua, e noi aku i ka Makua i kona mau kuleana o ka lokomaikai i loaa ai ia ia maluna o na keiki a kanaka?

28. No ka mea, ua hooko ae oia i na kumu o ke kanawai, a e koi ana i ka poe a pau nona ka manaoio iloko ona; a o ka poe nona ka manaoio iloko ona, e hoopili mau no lakou i kela mea maikai i keia mea maikai; nolaila, ke kokua nei oia i ka aoao o na keiki a kanaka; a ke noho mau loa la oia ma na lani.

29. A no kana hana ana i keia, e oʻu poe hoahanau, ua oki ae la anei na hana mana? Aia hoi, ke i aku nei au ia oukou, aole; aole no hoi i oki ae la na anela e lawelawe mai i na keiki a kanaka.

30. No ka mea hoi, malalo iho lakou ona, e lawelawe ae e like me ka olelo o kana kauoha, e hoike ana ia lakou iho i ka poe o ka manaoio ikaika a me ka naau naueue ole, ma kela ano keia ano o na mea o ke Akua.

31. A o ka hana a ko lakou oihana, oia no e kahea aku i na kanaka i ka mihi, a e hooko a e hana i ka hana o na berita a ka Makua, ana i hana mai ai i na keiki a kanaka, e hoomakaukau mai i ke ala mawaena o na keiki a kanaka, ma ka hai ana i ka olelo a Kristo i na ipu i wae ia e ka Haku, i hoike aku ai lakou nona;

32. A ma ka hana ana pela, e hoomakaukau ana ka Haku ke Akua i ke ala, i loaa ai i ke koena o na kanaka ka manaoio iloko o Kristo, i loaa ai i ka Uhane Hemolele he wahi kaawale ma ko lakou mau naau, e like me ka mana o ia mea; a mamuli o keia ano e hooko mai ana ka Makua i na berita, ana i hana mai ai i na keiki a kanaka.

33. A ua i mai la o Kristo, Ina e manaoio mai oukou iaʻu, e loaa auanei ia oukou ka mana e hana aku i kela mea i keia mea i ku pono iaʻu.

34. A i mai la ia, E mihi oukou, e ko na welau a pau o ka honua, a e hele mai ioʻu nei a e bapetizo ia ma koʻu inoa, a e manaoio mai iaʻu, i hoola ia ai oukou.

35. Ano, e oʻu poe hoahanau i aloha ia, ina pela io iho la, he oiaio keia mau mea aʻu i olelo aku nei ia oukou, a e hoike mai no ke Akua ia oukou me ka mana a me ka nani nui ma ka la hope, he oiaio ia mau mea; a ina he oiaio ia mau mea, ua oki ae la anei ka la o na hana mana?

36. A ua oki ae la anei na anela e ike ia e na keiki a kanaka? A ua aua aku anei oia i ka mana o ka Uhane Hemolele, mai o lakou ae? E hana anei oia pela, oiai e mau ana ka manawa, a e ku ana ka honua, a e noho ana hoi kekahi kanaka maluna iho o ka ili olaila e hoola ia ai?

37. Aia hoi, ke i aku nei au ia oukou, aole; no ka mea, ma ka manaoio i hana ia ai na hana mana; a ma ka manaoio no i ike ia na anela e lawelawe mai i na kanaka; nolaila, ina ua oki ae la ua mau mea nei, auwe na keiki a kanaka, no ka mea, no ka manaoio ole no ia mea, a ua makehewa na mea a pau;

38. No ka mea, aole e hiki ke hoola ia mai kekahi kanaka, e like me na olelo a Kristo, ke ole he manaoio kona ma kona inoa; nolaila, ina ua oki ae la keia mau mea, alaila, ua oki ae la no hoi ka manaoio; a weliweli no ka noho ana o kanaka; no ka mea, ua like lakou me he mea la aole i hana ia ka hoolapanai.

39. Aka hoi, e oʻu poe hoahanau i aloha ia, ke manao nei au i na mea maikai nui ae no oukou, no ka mea, ke manao nei au he manaoio ko oukou ia Kristo no ko oukou akahai; no ka mea, ina aole o oukou manaoio iloko ona, alaila, aole ku pono oukou ke helu pu ia mawaena o ka poe kanaka o kona ekalesia.

40. A eia hou, e oʻu poe hoahanau aloha, ke makemake nei au e olelo aku ia oukou no ka manaolana. Pehea la i hiki ai ia oukou ke loaa ka manaoio, ke ole he manaolana ko oukou?

41. A heaha ka mea a oukou e manaolana ai? Aia hoi, ke i aku nei au ia oukou, e manaolana oukou ma o ke kalahala ana la o Kristo a me ka mana o kona alahouana, e hoala ia i ke ola mau loa; a o keia mea no ko oukou manaoio ia ia e like me ka olelo paa;

42. Nolaila, ina he manaoio ko ke kanaka, he manaolana no hoi kona e pono ai; no ka mea, me ka manaoio ole, aole loa he manaolana.

43. A eia hou, ke i aku nei au ia oukou, aole e hiki ia ia ke loaa ka manaoio a me ka manaolana, ke ole akahai oia, a haahaa ma ka naau;

44. Ina pela, ua makehewa kona manaoio a manaolana, no ka mea, aole e apono ia kekahi mea imua o ke Akua, o ka poe akahai a haahaa ma ka naau wale no, a ina akahai ke kanaka, a haahaa ma ka naau, a e hai ana ma ka mana o ka Uhane Hemolele, o Iesu no ke Kristo, he aloha kona e pono ai; no ka mea, ina aole he aloha kona, he mea ole oia; nolaila he aloha kona e pono ai.

45. O ke aloha ua hoomanawanui, a he lokomaikai, a ua paonioni ole, a ua haakei ole, e imi ole ana i kona mea iho, aole huhu hiki wawe ia, aole noonoo ino, aole e hauoli ana ma ka hewa, aka, e hauoli ana ma ka pono, ua ahonui i na mea a pau, ua manaoio i na mea a pau, ua manaolana i na mea a pau, ua hoomanawanui i na mea a pau;

46. Nolaila, e oʻu poe hoahanau i aloha ia, ina aole he aloha ko oukou, he mea ole oukou, no ka mea, e pau ole ana ke aloha. Nolaila, e hoopili aku i ke aloha, oia no ka mea nui loa o na mea a pau, no ka mea, e pau ana na mea a pau;

47. Aka, o keia aloha io, oia no ke aloha maemae o Kristo, a e mau loa ana no ia no ka wa pau ole; a o na mea i loaa me ia mea pu ma ka la hope, e pomaikai auanei lakou.

48. Nolaila, e oʻu poe hoahanau, e pule aku i ka Makua me ka ikaika a pau o ka naau, i hoopiha ia ai oukou me keia aloha ana i haawi mai ai maluna iho o ka poe hahai oiaio a pau i kana Keiki, o lesu Kristo, i lilo ai oukou i poe keiki na ke Akua, a i kona wa i ikea mai ai, e like auanei kakou me ia; no ka mea, e ike kakou ia ia i kona ano maoli, i loaa ai ia kakou keia manaolana, e hoomaemae ia ai kakou e like me kona maemae. Amene.