1. A eia kekahi, ia Korianatuma i pohala aku ai mai kona mau palapu, hoomaka ae la oia e hoomanao iho i na olelo a Etera i olelo mai ai ia ia;

2. Ike aku la oia ua luku ia ma ka pahikaua ano, kokoke elua miliona o kona poe kanaka, a hoomaka ae la oia e kaniuhu ma kona naau; he oiaio, ua luku ia elua miliona o na kanaka ikaika, a me ka lakou poe wahine a me ka lakou poe keiki.

3. Hoomaka ae la oia e mihi i ka ino ana i hana ai; hoomaka ae la oia e hoomanao iho i na olelo i olelo ia ai ma ka waha o ka poe kaula a pau, a ike oia ia mau mea ua hooko ia mai, a hiki i keia manawa, o kela lihi iki keia lihi iki; a kaniuhu kona uhane, a hoole aku la e hooluolu ia mai.

4. A eia kekahi, palapala iho la oia i kekahi episetole ia Siza, e noi ana ia ia e hookoe mai i ka poe kanaka, a nana e haawi wale aku i ke aupuni, no ka pono o na ola o na kanaka.

5. A eia kekahi, ia Siza i loaa ai kona episetole, palapala mai la oia i kekahi episetole ia Korianatuma, ina e hookuu aku oia ia ia iho, e hiki ia ia ke pepehi mai ia ia me kana pahikaua iho, alaila e hookoe oia i na ola o na kanaka.

6. A eia kekahi, aole na kanaka i mihi i ko lakou mau hewa; a ua hooeu ia ka poe kanaka o Korianatuma ma ka inaina aku i ka poe kanaka o Siza; a ua hooeu ia ka poe kanaka o Siza ma ka inaina mai i ka poe kanaka o Korianatuma; nolaila, kaua mai la ka poe kanaka o Siza i ka poe kanaka o Korianatuma.

7. A ia Korianatuma i ike ai ua kokoke ia e haule iho, hee hou aku la ia imua o ka poe kanaka o Siza.

8. A eia kekahi, hiki aku la oia i na wai o Ripilianakuma, oia ma ka hoohalike ana, o Nui, o ka mea oi loa aku; nolaila, ia lakou i hiki aku ai i keia mau wai, kukulu iho la lakou i ko lakou mau halelewa; a kukulu iho no hoi o Siza i kona mau halelewa e kokoke ana ia lakou; a, nolaila, ia la ae, ua kaua ae la lakou.

9. A eia kekahi, kaua ae la lakou i kekahi kaua eha loa, a ma ia kaua ana ua eha hou o Koriauatuma, a maule iho la oia no ke kahe o ke koko.

10. A eia kekahi, hooikaika aku la na puali kaua o Korianatuma maluna o na puali kaua o Siza, a lanakila ae la lakou maluna o ua poe kaua la, i hooauhee aku ai lakou ia poe kaua imua o lakou; a hee aku la lakou i ka hema, a kukulu iho la lakou i ko lakou mau halelewa ma kahi i kapa ia o Ogata.

11. A kukulu iho la ka poe kaua o Korianatuma i ko lakou mau halelewa ma ka puu Rama; a oia puu hookahi no kahi a kuu makuakane o Moramona i huna iho ai i na mooolelo laa i ka Haku.

12. A eia kekahi, houluulu ae la lakou i na kanaka a pau, maluna iho o ka ili o ka aina, ka poe i pepehi ole ia, koe o Etera wale no.

13. A ike aku la o Etera i na hana a pau a na kanaka; a ike aku la oia o ka poe kanaka no ka aoao o Korianatuma, ua houluulu ia ae i ka poe kaua o Korianatuma; a o ka poe kanaka no ka aoao o Siza, ua houluulu ia aku i ka poe kaua o Siza;

14. Nolaila, e houluulu ana laua i na kanaka, no na makahiki eha, i hiki ia laua ke loaa na mea a pau maluna o ka ili o ka aina, i loaa ai ia lakou ka ikaika a pau i hiki ai ia laua ke loaa.

15. A eia kekahi, i ka wa a lakou i houluulu ai, o kela mea, keia mea i ka poe kaua ana i makemake ai, me ka lakou poe wa¬hine, a me ka lakou poe keiki; o na kanaka, na wahine, a me na keiki i kahiko ia me na mea kaua, na pale-lima, a me na pale-umauma, a me na pale-poo; a i kahiko ia mamuli o ke ano o ke kaua, a hele ae la lakou kekahi e ku e i kekahi, ma ke kaua; a kaua ae la lakou ia la a po, a lanakila ole.

16. A i ka po ana ua maluhiluhi lakou, a hoi ae la i ko lakou mau wahi hoomoana; a mahope iho o ko lakou hoi ana i ko lakou mau wahi hoomoana, hoomaka ae la lakou i ka aoa ana, a me ke kanikau ana, no ka make o ka poe i luku ia o ko lakou poe kanaka; a no ka nui o ko lakou kumakena ana, ko lakou aoa ana a kanikau ana, ua nui loa ke kupinai ana.

17. A eia kekahi, ma ia la ae, hele hou ae la lakou i ke kaua, a ua nui a weliweli ia la; aole nae lanakila ae la lakou, a i ka hiki hou ana mai o ka po, ua nui loa ke kupinai ana o lakou no ko lakou kumakena ana, a me ko lakou aoa ana, a me ko lakou kanikau ana, no ka make o ka poe i luku ia o ko lakou poe kanaka.

18. A eia kekahi, palapala hou aku la o Korianatuma i kekahi episetole ia Siza, e no i ana ia ia e hele hou ole mai oia e kaua, aka e lawe aku oia i ke aupuni, a e hookoe i na ola o na kanaka.

19. Aka hoi, ua oki ae la ka hooikaika ana o ka Uhane o ka Haku ia lakou, a he mana loa ko Satana maluna iho o na naau o na kanaka, no ka mea, ua hookuu ia ae lakou i ka paakiki o ko lakou mau naau, a me ka makapo o ko lakou hoomaopopo ana, i luku ia ai lakou; no ia mea la, hele hou ae la lakou i ke kaua.

20. A eia kekahi, kaua ae la lakou ia la a po, a i ka po ana hiamoe iho la lakou maluna o ka lakou mau pahikaua;

21. A ia la ae kaua ae la lakou a hiki wale mai la ka po;

22. A i ka po ana ua ona lakou i ka huhu, e like me ke kanaka i ona i ka waina; a moe hou iho la lakou maluna o na pahikaua a lakou;

23. A ia la ae kaua hou ae la lakou, a i ka po ana ua haule iho la lakou a pau ma ka pahikaua, koe wale no he kanalimakumamalua o ka poe kanaka o Korianatuma, a he kanaonokumamaiwa o ka poe kanaka o Siza.

24. A eia kekahi, hiamoe lakou maluna o na pahikaua a lakou ia po, a ia la ae kaua hou ae la lakou, a paio ae la lakou me ko lakou ikaika, me ka lakou mau pahikaua, a me ko lakou mau pale-lima, ia la a po;

25. A i ka po ana, aia no he kanakolukumamalua o ka poe kanaka o Siza, a he iwakaluakumamahiku o ka poe kanaka o Korianatuma.

26. A eia kekahi, ai lakou a hiamoe iho la, a hoomakaukau ae la no ka make i ka la apopo. A he poe kanaka nui a ikaika lakou ma ka ikaika o kanaka.

27. A eia kekahi, kaua ae la lakou no na hora ekolu, a maule iho la lakou no ke kahe o ke koko.

28. A eia kekahi, i ka wa a ka poe kanaka o Korianatuma i loaa ai ka ikaika pono, i hiki ia lakou ke hele, ua aneane lakou e hee aku no ko lakou mau ola, aka hoi, ala ae la o Siza, a me kona poe kanaka no hoi, a hoohiki iho la ia ma kona huhu e pepehi oia ia Korianatuma, a i ole ia, e make oia i ka pahikaua;

29. Nolaila, alualu ae la oia ia lakou, a ia la ae loaa lakou ia ia; a kaua hou ae la lakou me ka pahikaua. A eia kekahi, ia lakou a pau i haule iho ai ma ka pahikaua, koe wale no o Korianatuma laua me Siza, aia hoi, ua maule iho la o Siza me ke kahe o ke koko.

30. A eia kekahi, ia Korianatuma i hilinai iho ai maluna o kana pahikaua, i maha iki ai oia, ooki aku la oia i ke poo o Siza.

31. A eia kekahi, ia ia i ooki aku ai i ke poo o Siza, ala ae la o Siza ma kona mau lima a haule iho la; a mahope iho o kona aumeume ana no ka hanu, make aku la ia.

32. A eia kekahi, hina iho la o Korianatuma i ka honua, a lilo iho la me he mea la aole ona ola.

33. A olelo mai la ka Haku ia Etera, a i mai la ia ia: O hele aku. A hele aku la ia, a ike aku la ua ko ae la na olelo a pau a ka Haku; a hoopau aku la oia i kana mooolelo; (a, aole au i kakau iho i ka hapa-haneri,) a huna iho la oia ia mau mea, ma ke ano i loaa ai i ka poe kanaka o Limai ia mau mea.

34. Ano, o na olelo hope i kakau ia ai e Etera, eia no ia: Ina paha e makemake ana ka Haku e lawe ola ia aku owau, a ina paha loaa iaʻu ka makemake o ka Haku ma ke kino, he mea ole no ia, ina e hoola ia mai au iloko o ke aupuni o ke Akua. Amene.