1. Ano, ke hoomau aku nei wau, o Moroni, i kaʻu mooolelo. Nolaila hoi, eia kekahi, no ka hui malu pu ana o Akisa a me kona poe makamaka, aia, hoohiolo ae la lakou i ke aupuni o Omera;

2. Aka hoi, ua aloha mai la ka Haku ia Omera, a i kana poe keikikane a i kana poe kaikamahine, ka poe i imi ole aku i kona make.

3. A ao mai la ka Haku ia Omera ma ka moeuhane, e hele aku oia mailoko aku o ka aina; nolaila, haalele aku la o Omera me kona ohana i ka aina, a kaahele aku la i na la he nui wale, a hiki ae la a kaalo ae la ma ka puu o Sima, a hiki ae la ma kahi o ko Nepai poe i anai ia ai, a mailaila aku i ka hikina, a hiki aku la i kahi i kapa ia o Abaloma, ma ke kahakai, a malaila oia i kukulu iho ai i kona halelewa, a me kana poe keikikane a me kana poe kaikamahine, a me ko kona hale a pau, koe o Iareda a me kona ohana.

4. A eia kekahi, ua poni ia ae la o Iareda i alii maluna o na kanaka, ma ka lima o ka hewa; a haawi ae la oia ia Akisa i kana kaikamahine i wahine nana.

5. A eia kekahi, imi iho la o Akisa i ke ola o kona makuahonowaikane; a noi aku la oia i ua poe la, ana i hoohiki ai ma ka hoohiki o ka poe o ka wa kahiko, a loaa iho la ia lakou ke poo o kona makuahonowaikane, ia ia i noho ai maluna o kona noho alii, e hoolohe ana i ka na kanaka;

6. No ka mea, no ka nui o ke kawowo ana o keia kuikahi malu a hewa, ua hoino iho ia mea i na naau o na kanaka a pau; nolaila, ua pepehi ia o Iareda maluna iho o kona noho alii, a noho alii iho la o Akisa ma kona hakahaka.

7. A eia kekahi, hoomaka ae la o Akisa e manao lili ae i kana keikikane, nolaila, hoopaa aku la oia ia ia iloko o ka halepaahao, a malama aku la ia ia me kahi ai uuku, a hiki aku i ka make ana ona.

8. Ano, ua huhu ke kaikaina o ka mea i make, (a o Nimara kona inoa,) i kona makuakane, no ka mea a kona makuakane i hana mai ai i kona kaikuaana.

9. A eia kekahi, houluulu ae la o Nimara i kekahi poe kanaka he uuku, a holo aku la oia mailoko aku o ka aina, a hele ae la a noho pu iho la me Omera.

10. A eia kekahi, hanau ae la na keikikane e ae na Akisa, a loaa iho la ia lakou na naau o na kanaka, me ka hoohiki e ana nae o lakou ia ia e hana aku i na ano a pau o ka hewa, e like me ka mea ana e makemake ai.

11. Ano, ua puniwaiwai ka poe kanaka o Akisa, e like me Akisa i puni mana ai; no ia mea, haawi ae la na keiki a Akisa ia lakou i ke kala, a ma o ua mea la alakai ae la lakou i ka nui loa o na kanaka mamuli o lakou;

12. A hoomaka ae la ke kaua mawaena o na keiki a Akisa a me Akisa, a mau ae la ia no na makahiki he nui; he oiaio, i ka luku ia ana aneane e pau loa na kanaka o ke aupuni; he oiaio, ua pau loa, he kanakolu wale no i koe, a me ka poe i holo pu aku me ko ka hale o Omera;

13. No ia mea, ua hoihoi hou ia o Omera i kona aina hooilina.

14. A eia kekahi, hoomaka ae la ka elemakule ana o Omera, aka hoi, ma kona wa elemakule hanau ae la o Emera nana; a poni iho la oia ia Emera, e noho alii ma kona hakahaka.

15. A mahope iho o kona poni ana ia Emera i alii, ike aku la oia i ka maluhia ma ka aina no na makahiki elua, a make aku la ia, me ka ike nae i na la he nui loa, i piha me ke kaniuhu. A eia kekahi, noho alii iho la o Emera ma kona hakahaka, a hoopiha iho la i na kapuai o kona makuakane.

16. A hoomaka hou ae la ka Haku e lawe aku i ka poino mai ka aina aku, a pomaikai nui loa iho la ko ka hale o Emera malalo iho o ke au ia Emera; a iloko o na makahiki kanaonokumamalua, ua lilo iho la lakou i ikaika loa, a lilo iho la i waiwai loa;

17. Me na ano a pau o ka hua, a o na hua liilii, a o na kilika, a o ka ie nani, a o ke gula, a o ke kala, a o na mea maikai;

18. A me na ano a pau no hoi o na holoholona, o na bipi kane, a me na bipi wahine, a o na hipa, a me na puaa, a o na kao, a me na ano e ae he nui wale no hoi o na holoholona i pono ke ai ia e kanaka;

19. A he poe lio no hoi ko lakou, a me na hoki, a he poe elepani kekahi, a me na kureloma, a me na kumoma; a he mau mea pono keia mau mea a pau no kanaka, a ua oi loa aku ka pono o na elepani, a me na kureloma, a me na kumoma.

20. A pela ka Haku i ninini mai ai i kona mau mea pomaikai maluna o keia aina, i maikai loa mamua o na aina e ae a pau; a kauoha mai la oia o ka mea nana e loaa ia aina, e loaa ia mea ma o ka Haku la, a i ole e anai ia lakou i ka wa a lakou i oo ai ma ka hewa; no ka mea, maluna o ka poe me neia, wahi a ka Haku, e ninini iho au i ka piha o koʻu inaina.

21. A hooko aku la o Emera i ke kanawai ma ka pono, i kona mau la a pau, a hanau ae la na keikikane a me na kaikamahine nana; a hanau ae la o Korianatuma nana; a poni iho la oia ia Korianatuma e noho alii ma kona hakahaka.

22. A mahope iho o kona poni ana ia Korianatuma e noho alii ma kona hakahaka, ola ae la ia i na makahiki eha, a ike aku la oia i ka maluhia ma ka aina; he oiaio, ike ae la ia i ke Keiki a ka pono, a hauoli iho la a kaena ae la ma kona la; a make aku la ia ma ka maluhia.

23. A eia kekahi, hele ae la o Korianatuma ma na kapuai o kona makuakane, a kukulu iho la i na kulanakauhale kaulana he nui, a lawelawe ae la i ka mea i maikai i kona poe kanaka, i kona mau la a pau. A eia kekahi, aohe ana keiki, a hiki wale i kona wa elemakule loa.

24. A make aku la kana wahine, a hookahi haneri kumamalua makahiki ona. A lawe ae la o Korianatuma i kekahi wahine puupaa opio, i wahine nana, ma kona wa elemakule, a hanau ae la na keikikane a me na kaikamahine nana; nolaila, ola aku la oia a hiki aku i ka hookahi haneri kanahakumamalua makahiki ona.

25. A eia kekahi, hanau ae la o Koma nana, a noho alii iho la o Koma ma kona hakahaka; a noho alii iho la ia hookahi kanaha a me na makahiki keu eiwa, a hanau ae la o Heta nana; a hanau ae la na keikikane a me na kaikamahine e ae no hoi nana.

26. A ua laha hou aku la na kanaka maluna iho o ka ili o ka aina, a hoomaka hou ae la he hewa nui wale maluna o ka ili o ka aina, a hoomaka ae la o Heta e apo hou aku i na mea malu o ka wa kahiko, e pepehi iho ai i kona makuakane.

27. A eia kekahi, kaili aku la oia i ka noho alii o kona makuakane; no ka mea, pepehi ae la oia ia ia a make loa me kana pahikaua iho; a noho alii iho la oia ma kona hakahaka.

28. A hiki hou mai la na kaula ma ka aina, e hea ana i ka mihi ia lakou; e hoomakaukau iho lakou i ke alanui o ka Haku, a i ole e hiki mai kekahi poino maluna iho o ka ili o ka aina; he oiaio, e hiki mai ka wi nui, a ma ia mea e luku ia ai lakou, ina aole lakou e mihi.

29. Aka, manaoio ole iho la na kanaka i na olelo a ka poe kaula, aka, hookuke ae la lakou i ua poe kaula la mawaho; a hoolei ae la lakou i kekahi poe o ua poe la iloko o na lua, a haalele ae la ia lakou e make. A eia kekahi, hana ae la lakou i keia mau mea a pau mamuli o ke kauoha o ke alii o Heta.

30. A eia kekahi, hoomaka ae la ka wi nui maluna o ka aina, a hoomaka ae la ka poe kamaaina e luku emo ole loa ia, no ka wi; no ka mea, aohe he ua maluna iho o ka ili o ka honua;

31. A puka mai la na nahesa niho awa no hoi maluna iho o ka ili o ka aina, a hoomake mai la i na kanaka he nui. A hoomaka ae la ko lakou mau pua holoholona e holo aku imua o na nahesa niho awa, i ka aina hema, i kapa ia e ko Nepai poe o Zarahemela.

32. A eia kekahi, he nui na mea o lakou i make ma ke ala; aka hoi, ua holo aku kekahi poe iloko o ka aina hema.

33. A hooki iho la ka Haku i na nahesa i alualu hou ole ai ia lakou, aka, i alalai mai ai lakou i ke ala, i hiki ole ai i na kanaka ke maalo ae; i haule iho ai ka mea e hoao ana e maalo ae, ma o na nahesa niho awa la.

34. A eia kekahi, hahai aku la na kanaka i ke ala o na holoholona, a ai iho la i na heana o ka poe i haule iho ma ke ala, a pau ae la ua poe heana la i ka ai ia e lakou. Ano, i ka wa a na kanaka i ike ai e make ana lakou, hoomaka ae la lakou e mihi i ko lakou mau hewa, a e hea aku i ka Haku.

35. A eia kekahi, ia lakou i hoohaahaa nui ai ia lakou iho imua o ka Haku, hoouna mai la ia i ka ua maluna iho o ka ili o ka honua, a hoomaka ae la na kanaka e ola hou, a hoomaka ae la ka hua e hoohua ia mai ma na aina akau, a ma na aina a pau a puni. A hoike mai la ka Haku i kona mana ia lakou, ma ka hoola ana ia lakou mai ka wi mai.