1. A eia kekahi, hooko iho la o Oriha i ke kanawai maluna o ka aina me ka pololei i kona mau la a pau, a he nui loa no hoi kona mau la.

2. A hanau ae la na keikikane a me na kaikamahine nana; he oiaio, hanau ae la he kanakolukumamakahi nana, a mawaena o lakou he iwakaluakumamakolu keikikane.

3. A eia kekahi, hanau ae la o Kiba nana i kona wa elemakule. A noho alii iho la o Kiba ma kona hakahaka; a hanau ae la o Korihora na Kiba.

4. A i ka makahiki kanakolukumamalua o Korihora, kipi ae la oia i kona makuakane, a hele ae la a noho iho la ma ka aina o Nehora; a hanau ae la na keikikane a me na kaikamahine nana; a lilo iho la lakou i poe maikai loa ma ka helehelena; nolaila, kauo ae la o Korihora i na kanaka he nui mahope ona.

5. A ia ia i houluulu iho ai he puali kaua, pii mai la oia i ka aina o Morona, kahi a ke alii i noho ai, a lawe pio ae la ia ia, a ma ia mea i ko ai ka olelo a ke kaikaina o Iareda, e lawe ia ai auanei lakou iloko o ka noho pio ana.

6. Ano, o ka aina o Morona, kahi a ke alii i noho ai, ua kokoke ia i ka aina i kapa ia o Neoneo e ko Nepai poe.

7. A eia kekahi, noho pio iho la o Kiba, a me kona poe kanaka, malalo iho o Korihora kana keiki, a hiki wale aku i kona wa elemakule loa; aka hoi, hanau ae la o Sule na Kiba, ma kona wa elemakule, oiai oia e noho pio ana.

8. A eia kekahi, ua huhu iho la o Sule i kona kaikuaana; a mahuahua ae la o Sule ma ka ikaika, a lilo i mea mana, mamuli o ka ikaika o ke kanaka; a ua mana no hoi ia i ka hooponopono.

9. Nolaila, hele ae la oia i ka puu Eperaima, e hoohehee iho la noloko mai o ka puu, a hana iho la i na pahikaua o ke kila na ka poe ana i kauo mai ai me ia; a mahope iho o kona kahiko ana ia lakou me na pahikaua, hoi ae la oia i ke kulanakauhale o Nehora, a hoouka kaua aku la i kona kaikuaana o Korihora, a ma ia mea, loaa iho la ia ia ke aupuni, a hoihoi hou ae la ia mea i kona makuakane, ia Kiba.

10. Ano, no keia mea a Sule i hana ai, hooili mai la kona makuakane i ke aupuni maluna iho ona; nolaila, hoomaka ae la oia e noho alii ma ka hakahaka o kona makuakane.

11. A eia kekahi, hooko iho la oia i ke kanawai ma ka pololei; a hoopalahalaha aku la i kona aupuni maluna iho o ka ili a pau o ka aina, no ka mea, ua lilo na kanaka i lehulehu loa.

12. A eia kekahi, hanau ae la na keikikane a me na kaikamahine he nui na Sule no hoi.

13. A mihi iho la o Korihora i na mea ino he nui ana i hana ai; nolaila, haawi ae la o Sule ia ia i mana ma kona aupuni.

14. A eia kekahi, na Korihora na keikikane a me na kaikamahine he nui. A aia mawaena o na keikikane a Korihora kekahi, o Noa kona inoa.

15. A eia kekahi, kipi aku la o Noa ia Sule, ke alii, a me kona makuakane Korihora no hoi, a kauo ae la ia Kohora, i kona hoahanau ponoi, a me kona poe hoahanau a pau a me kekahi poe he nui o na kanaka.

16. A hoouka kaua mai la oia ia Sule, ke alii, a ma ia mea loaa iho la ia ia ka aina o ko lakou hooilina mua; a lilo iho la oia i alii maluna o kela hapa o ka aina.

17. A eia kekahi, hoouka kaua hou mai la oia ia Sule, ke alii; a lawe aku la oia ia Sule, ke alii, a hali pio ae la ia ia i Morona.

18. A eia kekahi, ia ia e aneane ana e pepehi mai ia ia, nihi ae la na keiki a Sule iloko o ka hale o Noa ma ka po, a pepehi aku la ia ia, a wawahi ae la i ka pani o ka halepaahao, a kai ae la i ko lakou makuakane mawaho, a hoonoho iho la ia ia maluna iho o kona noho alii ma kona aupuni iho.

19. Nolaila, kukulu iho la ke keiki a Noa i kona aupuni ma kona hakahaka; aole nae lakou i loaa hou ka mana maluna o Sule ke alii; a o ka poe kanaka malalo iho o ka noho alii ana o Sule, ke alii, ua pomaikai nui loa iho la lakou a mahuahua ikaika ae la.

20. A ua mahele ia ka aina; a he mau aupuni elua, o ke aupuni o Sule, a me ke aupuni o Kohora, ke keiki a Noa.

21. A kena ae la o Kohora, ke keiki a Noa, i kona poe kanaka e kaua mai ia Sule, a ma ua kaua nei ua lanakila aku la o Sule maluna o lakou, a pepehi aku la ia Kohora a make.

22. Ano, he keikikane ka Kohora i kapa ia o Nimeroda; a haawi mai la o Nimeroda i ke aupuni o Kohora ia Sule, a loaa ia ia ke aloha ia mai ma na maka o Sule; no ia mea, haawi ae la o Sule i na lokomaikai nui maluna iho ona, a hana aku la oia ma ke aupuni o Sule e like me kona mau makemake;

23. A ma ke au ia Sule no hoi hele mai la na kaula mawaena o na kanaka, he poe i hoouna ia mai mai ka Haku mai, e wanana ana e lawe ana ka hewa a me ka hoomanakii ana o na kanaka he poino maluna iho o ka aina, a e luku ia lakou, ke ole lakou e mihi.

24. A eia kekahi, kuamuamu na kanaka i ka poe kaula, a hoomaewaewa ae la ia lakou. A hoopai aku la ke alii Sule i ua poe la a pau, ka poe i kuamuamu mai i ka poe kaula;

25. A kau iho la oia i kekahi kanawai mawaena o ka aina a puni, e haawi ana ia kanawai i ka mana i ka poe kaula, i hele aku ai lakou i kela wahi keia wahi a lakou e makemake ai; a ma o keia mea la ua kai ia mai na kanaka i ka mihi.

26. A no ka mihi ana o na kanaka i ko lakou mau hewa a me na hoomanakii ana, hookoe mai la no ka Haku ia lakou, a hoomaka ae la lakou e pomaikai hou ma ka aina. A eia kekahi, hanau mai la na keikikane a me na kaikamahine na Sule i kona wa elemakule.

27. A, aole he mau kaua hou ma na la o Sule; a hoomanao iho la oia i na mea nui a ka Haku i hana mai ai no kona poe kupuna i ka lawe ana mai ia lakou mai kela kapa o ka hohonu nui, iloko o ka aina i olelo mua ia ai, nolaila, hooko iho la oia i ke kanawai ma ka pololei i kona mau la a pau.