1. A eia kekahi, hanau ae la o Omera nana, a noho alii ae la o Omera ma kona hakahaka. A hanau ae la o Iareda na Omera; a hanau ae la na keikikane a me na kaikamahine na Iareda.

2. A kipi mai la o Iareda i kona makuakane a hele ae la a noho iho la ma ka aina o Heta. A eia kekahi, hoomalimali ae la oia i na kanaka he nui wale, no na olelo maalea ana, a hiki i ka wa i loaa ai ka hapalua o ke aupuni ia ia.

3. A ia ia i loaa ai ka hapalua o ke aupuni, kaua mai la oia i kona makuakane, a lawe ae la oia i kona makuakane iloko o ka noho pio ana, a hookauwa mai la ia ia ma ka noho pio ana.

4. Ano, ma na la o ke au ia Omera, e noho pio ana oia i ka hapalua o kona mau la. A eia kekahi, hanau ae la na keikikane a me na kaikamahine nana, a mawaena o lakou o Eseroma a me Korianatuma;

5. A ua huhu nui loa laua no na hana a Iareda, ko laua kaikuaana, a houluulu ae la laua i puali kaua, a kaua aku la ia Iareda. A eia kekahi, kaua aku la laua ia ia ma ka po.

6. A ia ia i luku aku ai i ka poe kaua o Iareda, ua aneane laua e pepehi aku ia ia no hoi; a noi ae la oia ia laua e pepehi ole mai ia ia, a nana no e haawi mai i ke aupuni i kona makuakane. A ae aku la laua ia ia i kona ola.

7. Ano, kaumaha nui loa iho la o Iareda no ka lilo o ke aupuni, no ka mea, ua kau iho la oia i kona naau maluna o ke aupuni, a maluna o ka hanohano o ke ao nei.

8. Ano, ua akamai loa ke kaikamahine a Iareda, a i ka ike ana i na kaumaha o kona makuakane, manao iho la oia e imi i mea e hiki ai ia ia ke hoihoi hou i ke aupuni i kona makuakane.

9. Ano, ua maikai loa ka helehelena o ke kaikamahine a Iareda. A eia kekahi, kamailio ae la oia me kona makuakane; a i ae la ia ia: Ma o ke aha la la ke kaumaha nui o koʻu makuakane me neia? Aole anei oia i heluhelu i ka mooolelo a ko kakou poe kupuna i lawe mai ai, mai kela kapa o ka hohonu nui? Ano hoi, aole anei he mooolelo kekahi no ka poe o ka wa kahiko, ma o ko lakou mau manao kuka malu la i loaa ai ia lakou na aupuni a me ka hanohano nui?

10. Ano la, e hoouna aku koʻu makuakane ia Akisa, ke keiki a Kimanora; a, aia hoi, ua ui au, a e haa no au imua ona, a e hoolealea aku au ia ia, i makemake mai ai oia iaʻu i wahine nana; nolaila, ina e noi mai oia ia oe e haawi aku iaʻu i wahine nana, alaila, e olelo aku oe: E haawi aku no au ia ia, ina e lawe mai oe ioʻu nei i ke poo o koʻu makuakane, ke alii.

11. A, he hoaaloha o Omera no Akisa, nolaila, ia Iareda i hoouna ae ai ia Akisa, haa ae la ke kaikamahine a Iareda imua ona, a lealea iho la oia ia ia la, a makemake iho la oia ia ia i wahine nana.

12. A eia kekahi, i ae la oia ia Iareda: E haawi mai oe ia ia iaʻu, i wahine naʻu. A i aku la o Iareda ia ia: E haawi aku no au ia ia ia oe, ina e lawe mai oe ioʻu nei i ke poo o koʻu makuakane, ke alii

13. A eia kekahi, hoakoakoa ae la o Akisa iloko i ka hale o Iareda i kona poe hoahanau a pau, a i ae la ia lakou: E hoohiki mai anei oukou iaʻu e onipaa mai oukou iaʻu, ma ka mea aʻu e noi aku ai ia oukou?

14. A eia kekahi, hoohiki ae la lakou a pau ia ia, ma ke Akua o ka lani, a ma na lani no hoi, a ma ka honua hoi, a ma ko lakou mau poo iho, o ka mea e hoano e mai i ke kokua ana ae a Akisa e noi ai, e lilo kona poo; a o ka mea e hai aku i ka mea a Akisa e hoike ae ai ia lakou, oia ke kaili ia aku kona ola.

15. A eia kekahi, pela lakou i hui pu ai me Akisa. A haawi ae la o Akisa ia lakou i na hoohiki i haawi ia mai e ka poe o ka wa kahiko, ka poe nana i imi no hoi i ka mana, i haawi ia mai ai mai mua mai, mai ia Kaina mai, he pepehi kanaka ia mai kinohi mai.

16. A ua malama ia ia mau mea ma ka mana o ke diabolo e lawelawe aku i keia mau hoohiki i na kanaka, e hoopaa iho ia lakou ma ka pouli, e kokua i ka poe e imi ana i ka mana, e loaa ai ka mana, a e pepehi kanaka, a e powa, a e wahahee, a e hana i na ano a pau o ka hewa a me ka moekolohe.

17. A o ke kaikamahine a Iareda oia ka mea nana i hookomo iho iloko o kona naau e imi aku i ua mau mea nei o ka wa kahiko; a hahao ae la o Iareda ia mea iloko o ka naau o Akisa; nolaila, hana ae la o Akisa ia mea i kona poe hoahanau a me na makamaka, e alakai ana ia lakou, ma o na olelo hoomalimali la, e hana i kela mea i keia mea ana i makemake ai.

18. A eia kekahi, hana iho la lakou i kekahi hui malu pu ana, e like me ka poe o ka wa kahiko; a o keia hui malu pu ana he mea hoopailua a hewa ia maluna ae o na mea a pau, ma ka maka o ke Akua;

19. No ka mea, aole e hana ana ka Haku ma na hui malu ana, aole hoi ona makemake e hookahe aku ke kanaka i ke koko, aka, ma na mea a pau ua papa mai la ia mea, mai ka makamua mai o na kanaka.

20. Ano, aole au, o Moroni, i kakau i ke ano o ko lakou mau hoohiki a me na hui pu ana, no ka mea, ua hoike ia mai iaʻu aia no keia mau mea mawaena o na kanaka a pau, a aia no ia mau mea mawaena o ko Lamana poe;

21. Ma o ua mau mea la i hiki mai ai ka anai ia ana o keia poe kanaka, ka poe aʻu e olelo nei, a me ka anai ia ana no hoi o ka poe kanaka o Nepai;

22. A o ka lahuikanaka e kokua ana i na hui malu pu ana me ia, e loaa ai ka mana a me ka waiwai, a hiki i ka wa e laha aku ai ia mau mea maluna o ka lahuikanaka, aia hoi, e anai ia aku auanei lakou, no ka mea, aole e ae aku ka Haku i ke koko o kona poe hoano, ka mea e hookahe ia aku auanei e lakou, e hea mau aku ia ia mai ka lepo ae no ka hoopai maluna o lakou, a eia nae aole oia i hoopai aku ia lakou;

23. Nolaila, e ka poe Genetile, he mea naauao i ke Akua i hoike ia aku ai keia mau mea ia oukou, i hiki ia oukou ma ia mea ke mihi i ko oukou mau hewa, a e ae ole aku i keia hui pu malu pepehi kanaka ana e kau mai maluna iho o oukou, na mea i kukulu ia iho ai e loaa ka mana a me ka waiwai, a i ka hana hoi, he oiaio, i ka hana hoi o ka luku e hiki mai maluna iho o oukou; he oiaio, o ka pahikaua o ka hoopai o ke Akua mau loa, e haule iho maluna o oukou, i ko oukou hoohiolo ia ana a luku ia ana, ina e ae aku oukou i keia mau mea e hana ia;

24. Nolaila, ke kauoha aku nei ka Haku ia oukou, i ka wa a oukou e ike ai i keia mau mea e hiki mai mawaena o oukou, e ala ae oukou me ka noonoo iho i ko oukou noho weliweli ana, no keia hui malu pu ana mawaena auanei o oukou, a i ole, auwe ia mea, no ke koko o ka poe i pepehi ia; no ka mea, e hea ae ana lakou mai ka lepo ae no ka hoopai maluna iho o ia mea, a maluna iho no hoi o ka poe nana ia mea e kukulu iho.

25. No ka mea e hiki mai ana keia, o ka mea nana ia mea e kukulu iho, e imi ana oia e hoohiolo aku i ke kuokoa ana o na aina, na lahuikanaka a me na aukanaka a pau; a e lawe mai ana ia i ka anai ia ana o na kanaka a pau, no ka mea, ua kukulu ia iho e ke diabolo, oia no ka makua o na wahahee a pau; oia hookahi no ua mea wahahee la nana i hoowalewale i ko kakou mau kupuna mua; he oiaio, oia no ua mea wahahee hookahi la nana i hookonokono aku i na kanaka e pepehi kanaka, mai kinohi mai; nana i hoopaakiki iho i na naau o na kanaka, i pepehi aku ai lakou i ka poe kaula, a hailuku ia lakou, a hookuke mai ia lakou ma waho, mai kinohi mai.

26. No ia mea, ua kauoha ia au, o Moroni e kakau iho i keia mau mea, i hoopau ia aku ai ka hewa, a i hiki mai ai ka manawa, i ole ai o Satana he mana maluna iho o na naau o na keiki a kanaka, aka, i ao hoohuli ia ai lakou e hana mau i ka maikai i hele mai ai lakou i ka punawai o ka pono a pau, a e hoola ia.