1. Ano, ke hoomau aku nei au e hoopau aku i kaʻu mooolelo no ka anai ia ana o ka lahuikanaka nona aʻu e kakau nei.

2. No ka mea, hoomalau mai la lakou i na olelo a pau a Etera; no ka mea, hai io aku la oia ia lakou no na mea a pau, mai ka makamua mai o kanaka; a mahope iho o ka emi ana o na wai mai ka ili aku o keia aina, lilo iho la ia i aina maikai loa mamua o na aina e ae a pau, he aina i wae ia e ka Haku; nolaila, ua makemake ka Haku i na kanaka a pau e hookauwa aku nana, ka poe e noho ana maluna iho o ka ili ona;

3. A o a kahi no ia o ka Ierusalema Hou, ka mea e iho mai ana mailoko mai o ka lani, a me ka wahilaa hemolele o ka Haku.

4. Aia hoi, ike aku la o Etera i na la o Kristo, a olelo mai la no ia no kekahi Ierusalema Hou maluna iho o keia aina;

5. A olelo mai la no hoi oia no ko ka hale o Iseraela, a me ka Ierusalema kahi a Lehi e hele mai ai; mahope aku o kona anai ia ana, e kukulu hou ia auanei ia i kulanakauhale hemolele i ka Haku; nolaila, ua hiki ole ke kapa ia ia he Ierusalema Hou, no ka mea, he kulanakauhale ia i ka wa kahiko, aka, e kukulu hou ia ana ia, a e lilo iho i kulanakauhale hemolele o ka Haku; a e kukulu ia auanei ia i ko ka hale o Iseraela;

6. A e kukulu ia auanei he Ierusalema Hou maluna iho o keia aina, i ke koena o ka poe hua a Iosepa, no keia mau mea aia no he aka;

7. No ka mea, me Iosepa i lawe ae ai i kona makuakane ilalo iloko o ka aina o Aigupita, pela oia i make ai ilaila; nolaila, lawe mai la ka Haku he koena o ka poe hua a Iosepa, mailoko mai o ka aina o Ierusalema, i hiki ai ia ia ke aloha mai i ka poe hua a Iosepa, i ole ai lakou e make, me ia i aloha mai ai i ka makuakane o Iosepa, i make ole oia;

8. Nolaila, e kukulu ia auanei ke koena o ko ka hale o Iosepa maluna iho o keia aina; a e lilo auanei ia i aina hooilina no lakou; a e kukulu iho auanei lakou i kulanakauhale hemolele i ka Haku, e like me Ierusalema o ka wa kahiko; a e hoohoka hou ole ia lakou ma ia hope, a hiki aku i ka hopena, i ka wa o ka honua e pau aku ai.

9. A he lani hou a he honua hou auanei; a e like auanei laua me ko ke kahiko, ua hala aku nae na mea kahiko, a ua lilo na mea a pau i mea hou.

10. Alaila, e hiki mai ana ka Ierusalema Hou; a pomaikai ka poe e noho ana iloko olaila, no ka mea, o lakou no ka poe nona na aahu i keokeo ma o ke koko la o ke Keikihipa; a o lakou no ka poe i helu pu ia mawaena o ke koena o ka poe hua a Iosepa, ka poe no ko ka hale o Iseraela.

11. Alaila, e hiki mai ana no hoi ka Ierusalema o ka wa kahiko; a o ka poe kamaaina ona, ua pomaikai lakou, no ka mea, ua holoi ia lakou ma ke koko o ke Keikihipa; a o lakou no ka poe i hoopuehu ia aku a i houluulu ia mai, mai na kihi eha mai o ka honua nei, a mai na aina akau mai, a he poe hoaloaa o ka hooko ia ana o ka berita a ke Akua i hana mai ai me ko lakou kupunakane o Aberahama.

12. A i ka wa e hiki mai ai keia mau mea, e hooko ia ka palapala hemolele, ka mea e olelo nei: Aia no he poe ua mua mamua, e lilo ana auanei i hope; a aia no he poe ua hope mamua, e lilo ana auanei i mua.

13. A e anehe ana au e kakau hou iho, aka, ua papa ia mai au; aka, ua nui a kupanaha no na wanana a Etera, aka, ua manao lakou ia ia me he ole la, a hookuke mai la ia ia mawaho, a pee iho la oia ma ka poopoo o kahi pohaku ma ka la, a ma ka po hele aku la oia e nana ana i na mea e hiki mai aua maluna o na kanaka.

14. A ia ia i noho ai ma ka lua o kahi pohaku, kakau iho la oia i na mea i koe o keia mooolelo; e nana ana ma ka po i na luku i hiki mai maluna iho o na kanaka.

15. A eia kekahi ma ua makahiki hookahi la i hookuke ia mai ai oia maiwaena ae o na kanaka, hoomaka ae la kekahi kaua nui mawaeua o na kanaka, no ka mea, he nui no na mea i ea ae, he poe kanaka ikaika lakou, a imi ae la e luku ae ia Korianatuma ma o ko lakou mau mea kuka malu la o ka hewa, i olelo e ia ai.

16. Ano, o Korianatuma, ua hoonaauao iho ia ia iho ma na mea akamai a pau o ke kaua, a ma ka maalea a pau o ko ke ao nei, nolaila, kaua aku la oia i ka poe a pau i imi e luku mai ia ia;

17. Aka, aole oia i mihi, aole hoi o kana mau keikikane a mau kaikamahine nani; aole no hoi na keikikane a me na kaikamahine nani a Kohora; aole no hoi na keikikane a me na kaikamahine nani a Korihora; a, aole loa kekahi o na keikikane a me na kaikamahine nani maluna iho o ka ili o ka honua a pau i mihi i ko lakou mau hewa;

18. Nolaila, eia kekahi, ma ka makahiki mua a Etera i noho ai iloko o ka poopoo o kahi pohaku, he nui na kanaka i pepehi ia ma ka pahikaua a kela poe hui pu malu ana e kaua ana ia Korianatuma, i loaa ai ia lakou ke aupuni.

19. A eia kekahi, kaua nui aku la na keikikane a Korianatuma, a kahe nui iho la ke koko.

20. A ma ka makahiki lua, hiki mai la ka olelo a ka Haku io Etera la, e hale aku ia a wanana aku ia Korianatuma, ina e mihi oia, a me ko kona hale a pau, e haawi mai no ka Haku ia ia i kona aupuni, a e hookoe mai i na kanaka;

21. A i ole ia, e luku ia auanei lakou, a me ko kona hale a pau, koe oia wale iho no, a e ola wale no oia e ike i ka hooko ia ana o na wanana i olelo e ia ai, no kekahi lahuikanaka e ae e loaa ana ka aina i hooilina no lakou; a e kanu ia auanei o Korianatuma e lakou; a e luku ia kela mea keia mea, o Korianatuma wale no koe.

22. A eia kekahi, aole o Korianatuma i mihi, aole hoi ko kona hale, aohe hoi na kanaka; a aole oki iho na kaua; a imi ae la lakou e pepehi mai ia Etera, aka, holo aku la oia mai ke alo aku o lakou, a pee hou iho la ma ka poopoo o ka pohaku.

23. A eia kekahi, ala ae la o Sareda, a kaua mai la no hoi oia ia Korianatuma; a lanakila ae la oia maluna iho ona, a, ma ke kolu o ka makahiki lawe pio ae la oia la ia ia.

24. A lanakila ae la na keiki a Korianatuma maluna o Sareda, ma ka ha o ka makahiki, a loaa hou mai la ke aupuni no ko lakou makuakane.

25. Ano, hoomaka ae la ke kaua maluna iho o ka ili a pau o ka aina, o kela kanaka keia kanaka me kona poe hui, e kaua ana no ka mea ana i makemake ai.

26. A me na powa kekahi, a me na ano a pau o ka hewa maluna iho o ka ili a pau o ka aina.

27. A eia kekahi, ua huhu nui loa o Korianatuma ia Sareda, a hele ku e aku la oia ia ia me na puali kaua ona, e kaua; a halawai pu lakou me ka huhu nui; a hoouka ae la lakou ma ke awawa o Gilegala; a lilo iho la ke kaua i eha loa.

28. A eia kekahi, kaua ku e mai la o Sareda ia ia no na la ekolu. A eia kekahi, hooauhee aku la o Korianatuma ia ia, a alualu ae la ia ia a hiki aku oia i na kula papu o Hesalona.

29. A eia kekahi, kaua hou mai la o Sareda ia ia ma na kula papu; a, aia, lanakila ae la oia maluna o Korianatuma, a hooauhee mai la ia ia ihope i ke awawa o Gilegala.

30. A kaua hou aku la o Korianatuma ia Sareda ma ke awawa o Gilegala, a ma ua kaua nei lanakila ae la oia maluna o Sareda, a pepehi aku la ia ia a make loa.

31. A hoeha ae la o Sareda ia Korianatuma ma kona uha, i hele hou ole ai oia i ke kaua no na makahiki elua, a ma ia manawa e hookahe ana na kanaka a pau maluna iho o ka ili a pau o ka aina i ke koko, a, aohe mea nana lakou e kaohi.