1. Ano, hoomaka ae la he poino nui maluna iho o ka aina a pau, no ka hewa o na kanaka, a ma ia mea, ina e kau aku ke kanaka i kana mea paahana a i kana pahikaua paha ma kona papa, kahi ana i kau iho ai ia mea, aia hoi, ma ia la ae, ua hiki ole ia ia ke loaa ia mea, no ka nui o ka poino maluna iho o ka aina.

2. Nolaila, hoopili aku la kela kanaka keia kanaka i ka mea nona ponoi, me kona mau lima, a, aohe oia e noi ana, aohe no hoi e haawi ana; a hoopaa ae la kela kanaka keia kanaka i ke au o kana pahikaua, ma kona lima akau, no ka hoomalu ana i kona waiwai a me kona ola iho, a me kana mau wahine a me kana mau keiki.

3. Ano, mahope aku o na makahiki elua, a mahope aku o ka make ana o Sareda, aia hoi, ala ae la ke kaikaina o Sareda, a kaua mai la ia Korianatuma, a ma ua kaua nei, hooauhee aku la o Korianatuma ia ia, a alualu ae la ia ia i ka waonahele o Akisa.

4. A eia kekahi, kaua mai la ke kaikaina o Sareda ia ia ma ka waonahele o Akisa; a lilo iho la ke kaua i eha loa, a he nui na tausani i haule ma ka pahikaua.

5. A eia kekahi, hoopuni ae la o Korianatuma i ka waonahele, a hele ae la ke kaikaina o Sareda mailoko ae o ka waonahele ma ka po, a pepehi mai la i kekahi poe o ka poe kaua o Korianatuma, i ko lakou wa i ona ai.

6. A hele ae la oia i ka aina o Morona, a hoonoho iho la ia ia iho maluna iho o ka noho alii o Korianatuma.

7. A eia kekahi, noho iho la o Korianatuma me kona poe kaua ma ka waonahele, no na makahiki elua, a loaa iho la ia ia ka ikaika nui i kona poe kaua.

8. Ano, loaa iho la no hoi i ke kaikaina o Sareda, o Gileada kona inoa, ka ikaika nui i kona poe kaua, no ka poe hui pu malu ana.

9. A eia kekahi, pepehi ae la kana kahuna nui ia ia, ia ia i noho ai maluna iho o kona noho alii.

10. A eia kekahi, pepehi ae la kekahi o ka poe hui pu malu ana i ke kahuna nui ma kahi alahele malu, a loaa ia ia iho ke aupuni; a o Liba kona inoa; a he kanaka nunui o Liba, i kela aku mamua o na kanaka a pau mawaena o ka poe kanaka.

11. A eia kekahi, ma ka makahiki mua o Liba, pii ae la o Korianatuma i ka kaina o Morona, a kaua aku la ia Liba.

12. A eia kekahi, hakaka ae la oia me Liba, a ma ia hakaka ana hahau mai la o Liba maluna iho o kona lima, a ua eha iho la oia; aka hoi, hooikaika aku la imua ka poe kaua o Korianatuma maluna o Liba, a hee aku la oia i na mokuna ma ke kahakai.

13. A eia kekahi, alualu ae la o Korianatuma ia ia; a kaua mai la o Liba ia ia ma ke kahakai.

14. A uhau mai la o Liba i ka poe kaua o Korianatuma, i hee hou aku ai lakou i ka waonahele o Akisa.

15. A eia kekahi, alualu mai la o Liba ia ia, a hiki aku oia i na kula papu o Agosa. A ua lawe ae la o Korianatuma i na kanaka a pau me ia, ia ia i hee aku ai imua o Liba ma kela hapa o ka aina, kahi ana i hee aku ai.

16. A ia ia i hiki aku ai i na kula papu o Agosa, kaua aku la oia ia Liba, a hahau aku la maluna iho ona a make aku la ia; aka hoi, hele mai la ke kaikaina o Liba e ku e ia Korianatuma ma ka hakahaka ona, a lilo iho la ke kaua i eha loa, a ma ia kaua ana hee hou aku la o Korianatuma imua o ka poe kaua o ke kaikaina o Liba.

17. Ano, o ka inoa o ke kaikaina o Liba o Siza ia. A eia kekahi, alualu mai la o Siza mahope o Korianatuma, a hoohiolo iho la oia i na kulanakauhale he nui, a luku iho la i na wahine a me na keiki, a puhi ae la i na kulanakauhale olaila;

18. A kui ae la ka makau no Siza mawaena o ka aina a pau; he oiaio, lono ia ae la ka leo mawaena o ka aina, O wai la ka mea hiki ke ku imua o ka poe kaua o Siza? Aia hoi, ke kahili ae la oia i ka honua imua ona!

19. A eia kekahi, hoomaka ae la na kanaka e houluulu ae ma ka poe kaua, mawaena o ka aina a pau.

20. A ua mahele ia lakou, a holo aku la kekahi hapa o lakou i ka poe kaua la o Siza, a kekahi hapa hoi holo ae la lakou i ka poe kaua la o Korianatuma.

21. A no ka nui a me ka loihi a ke kaua, a no ka loihi o ka hookahe koko ana a me ka luku, ua uhi ia ka ili a pau o ka aina me na heana o ka poe make;

22. A no ka wikiwiki a me ka hikiwawe o ke kaua, aole i waiho ia kekahi mea e kanu iho i ka poe make, aka, hele ae la lakou mai ka hookahe ana aku i ke koko i ka hookahe ana i ke koko, e waiho ana i na heana o na kanaka, na wahine, a me na keiki, i haliilii ia maluna iho o ka ili o ka aina, e lilo i mea e ai ia ai e na ilo o ke kino;

23. A hele ae la ka pilau o ia mau mea maluna o ka ili o ka aina, oia, maluna iho o ka ili a pau o ka aina; nolaila, hoopilikia ia iho la na kanaka ma ka la a ma ka po, no ka pilau olaila;

24. Aole nae o Siza i hooki aku i ke alualu ana mai ia Korianatuma, no ka mea, ua hoohiki oia e hoopai ae ia Korianatuma no ke koko o kona kaikuaana ka mea i pepehi ia, a no ka olelo a ka Haku i hiki mai ai ia Etera, aole o Koriauatuma e haule iho ma ka pahikaua.

25. A pela kakou e ike nei ua hoopai mai ka Haku ia lakou ma ka piha ana o kona inaina, a ua hoomakaukau aku ko lakou hewa a mau mea hoopailua, i ala no ko lakou luku mau loa ia ana.

26. A eia kekahi, alualu mai la o Siza ia Korianatuma i ka hikina, a hiki i ke kahakai, a malaila oia i kaua aku ai ia Siza no na la ekolu;

27. A no ka weliweli o ka luku mawaeua o na puali kaua o Siza, ua hoomaka ae la na kanaka e makau, a hoomaka ae la e auhee aku imua o na puali kaua o Korianatuma; a auhee ae la lakou i ka aina o Korihora, a kahili ae la i ka poe kamaaina imua o lakou, i ka poe a pau i hui pu ole me lakou;

28. A kukulu iho la lakou i ko lakou mau halelewa ma ke awawa o Korihora. A kukulu iho la o Korianatuma i kona mau halelewa ma ke awawa o Sura. Ano, ua kokoke ke awawa o Sura i ka puu o Komanora; no ia mea, houluulu mai la o Korianatuma i ka poe kaua ona i kahi hookahi, maluna iho o ka puu Komanora, a puhi aku la i ka pu i na puali kaua o Siza, e kono aku ia lakou e hele mai i ke kaua.

29. A eia kekahi, hele mai la lakou, aka, ua hooauhee hou ia aku; a hele mai la lakou i ka lua o ka manawa; a ua hooauhee hou ia aku lakou i ka lua o ka manawa. A eia kekahi, hele hou mai la lakou i ke kolu o ka manawa, a lilo iho la ke kaua i eha loa.

30. A eia kekahi, uhau mai la o Siza maluna iho o Korianatuma, a hoeha mai la oia ia ia i na palapu hohonu he nui, a no ke kahe ana o ko Korianatuma koko, maule iho la oia, a ua kaikai ia aku me he mea la ua make oia.

31. Ano, no ka make nui ana aku o na kanaka, na wahine, a me na keiki, ma na aoao elua, kauoha ae la o Siza i kona poe kanaka, aole lakou e alualu i na puali kaua o Korianatuma; nolaila, hoi ae la lakou i ko lakou wahi i hoomoana ai.