Mokuna 6
1. Ano, ke hoomau nei au, o Moroni, e kakau iho i ka mooolelo o Iareda a me kona kaikaina.
2. No ka mea, eia kekahi, mahope mai o ka ka Haku hoomakaukau ana i na pohaku a ke kaikaina o Iareda i hali aku ai maluna o ka mauna, iho mai la ke kaikaina o Iareda malalo mailuna mai o ka mauna, a waiho iho la oia i na pohaku iloko o na moku i hoomakaukau ia ai, kekahi mamua, kekahi mahope; a, aia hoi, hoomalamalama mai la lakou i na moku olaila.
3. A pela ka Haku i hoomakaukau mai ai i na pohaku e alohi mai iloko o ka pouli, e hoomalamalama mai i na kanaka, i na wahine, a me na keiki, i ole ai lakou e holo aku i kela kapa o na kai nui ma ka pouli.
4. A eia kekahi, ia lakou i hoomakaukau iho ai i na ano a pau o ka ai, i hiki ia lakou ma ia mea ke ola maluna o ke kai, a me ka ai no hoi no ko lakou mau pua a mau ohana holoholona, a me kela holoholona keia holoholona a o na manu a lakou e hali pu ai me lakou. A eia kekahi, ia lakou i hana ai i keia mau mea a pau, ee aku la lakou maluna o ko lakou mau moku, a hookuu aku la iloko o ke kai, e haawi ana ia lakou iho i ka Haku, i ko lakou Akua.
5. A eia kekahi, hoonou iho la ka Haku ke Akua i ka makani ikaika loa maluna iho o ka ili o na kai, i ka aina i olelo mua ia ai; a pela lakou i oala ia ai maluna o na ale o ke kai imua o ka makani.
6. A eia kekahi, ua kanu ia lakou i na manawa he nui wale iloko o ka hohonu o ke kai, no na ale nui i popoi ae maluna iho o lakou, a pela hoi me na ino nui a weliweli i hana ia ma ka ikaika loa o ka makani.
7. A eia kekahi, ia lakou i kanu ia ai iloko o ka hohonu, aohe he kai i hiki ke hoopilikia mai ia lakou, oiai ua pilipaa ko lakou mau moku me he bola la, a ua pilipaa no hoi na moku e like me ka halelana o Noa; nolaila, ia lakou i hoopuni ia ai a puni me na kai he nui, hea aku la lakou i ka Haku, a lawe hou ae la oia ia lakou maluna o ka ili o na kai.
8. A eia kekahi, aole i oki iki ka pa ana o ka makani i ka aina i olelo mua ia ai, oiai lakou maluna o na kai; a pela lakou i puhi ia ai imua o ka makani;
9. A himeni aku la lakou i na himeni hoolea i ka Haku; he oiaio, himeni aku la ke kaikaina o Iareda i na himeni hoolea i ka Haku, a aloha aku la a hoolea aku la oia i ka Haku a pau ae la ka la; a i ka po ana, aole lakou i hooki iho i ka hoolea ana aku i ka Haku.
10. A pela lakou i puhi ia mai ai; a, ua hiki ole i na kupueu nui o ke kai ke wawahi mai ia lakou, aole hoi i hiki i ke kohola ke hana ino mai ia lakou; a he malamalama mau ko lakou, ina maluna o ke kai paha, a i ole malalo paha.
11. A pela lakou i puhi ia mai ai, ekolu haneri a me hookahi kanahakumamaha la maluna o ke kai;
12. A pae iuka lakou ma ke kahakai o ka aina i olelo mua ia ai. A i ka wa a lakou i ku iho ai i ko lakou mau wawae maluna o na kahakai o ka aina i olelo mua ia ai, kulou iho la lakou ma ka ili o ka aina, a hoohaahaa iho la ia lakou iho imua o ka Haku, a hookahe ae la i ka waimaka o ka olioli imua o ka Haku, no ka nui loa o kona mau lokomaikai aloha maluna o lakou.
13. A eia kekahi, hele aku la lakou maluna o ka ili o ka aina, a hoomaka ae la e mahi i ka honua.
14. A na Iareda na keikikane eha; a ua kapa ia lakou o Iakoma, a o Gilega, a o Maha, a me Oriha.
15. A ua hanau ae la na keikikane a me na kaikamahine na ke kaikaina o Iareda no hoi.
16. A o na makamaka o Iareda me kona kaikaina, he iwakaluakumamalua o lakou; a hanau mai la no hoi na keikikane a me na kaikamahine na lakou, mamua o ko lakou hiki ana i ka aina i olelo mua ia ai; a nolaila, hoomaka ae la lakou e lilo i poe lehulehu.
17. A ua ao ia ae lakou e hele haahaa imua o ka Haku; a ua ao ia no hoi lakou mailuna mai.
18. A eia kekahi, hoomaka ae la lakou e kawowo aku maluna iho o ka ili o ka aina, a e mahuahua a e mahi i ka honua; a mahuahua i ko lakou ikaika ma ka aina.
19. A hoomaka ae la ke kaikaina o Iareda e elemakule, a ike iho la e iho koke ana no oia i ka lua kupapau; no ia mea, i ae la oia ia Iareda: Ina kaua e houluulu mai i ko kaua poe kanaka i kahi hookahi, e hiki ia kaua ke helu aku ia lakou, e hiki ai ia kaua ke lohe i ka lakou mea e makemake mai ai ia kaua, mamua o ko kaua iho ana i ko kaua mau lua kupapau.
20. A nolaila, ua houluulu ia mai la na kanaka i kahi hookahi. Ano, he iwakaluakumamalua no ka nui o na keikikane a me na kaikamahine a ke kaikaina o Iareda; a he umikumamalua ka nui o na keikikane a me na kaikamahine a Iareda, o na keikikane ana eha o lakou.
21. A eia kekahi, helu ae la laua i ko laua poe kanaka; a mahope mai o ko laua helu ana ia lakou, ninau ae la laua ia lakou i na mea a lakou i makemake ai na laua e hana, mamua o ko laua iho ana i ko laua mau lua kupapau.
22. A eia kekahi, makemake mai la na kanaka ia laua, e poni iho laua i kekahi o ka laua mau keikikane i alii maluna iho o lakou.
23. Ano hoi, he mea kaumaha keia ia laua; a i aku la ke kaikaina o Iareda ia lakou: He oiaio, e alakai ana keia mea iloko o ka noho pio ana.
24. Aka, i ae la o Iareda i kona kaikaina: E ae aku ia lakou i loaa ai he alii ia lakou. A nolaila, i aku la oia ia lakou: E koho mai oukou mailoko ae o ko maua mau keikikane i alii, oia, i ka mea a oukou e makemake ai.
25. A eia kekahi, koho ae la lakou i ka makahiapo a ke kaikaina o Iareda; a o Pagaga kona inoa. A eia kekahi, hoole aku la oia, aole hoi e lilo i alii no lakou. A makemake mai la na kanaka i kona makuakane e koi ae ia ia; aka, makemake ole kona makuakane ia mea; a kauoha aku la oia ia lakou: Aole lakou e koi aku i kekahi kanaka e lilo i alii no lakou.
26. A eia kekahi, koho ae la lakou i na kaikaina a pau o Pagaga, a, aole o lakou makemake.
27. A eia kekahi, aole no hoi o na keikikane a Iareda, o lakou a pau, koe hookahi wale no; a o Oriha, ua poni ia oia i alii maluna o na kanaka.
28. A hoomaka ae la oia e noho alii, a hoomaka ae la na kanaka e pomaikai; a lilo iho la lakou i poe waiwai loa.
29. A eia kekahi, make aku la o Iareda, a me kona kaikaina no hoi.
30. A eia kekahi, hele haahaa ae la o Oriha imua o ka Haku, a hoomanao iho la i na mea nui a ka Haku i hana mai ai i kona makuakane, a ao aku la no hoi i kona poe kanaka i na mea nui a ka Haku i hana mai ai i ko lakou poe makuakane.