1. A eia kekahi, hele aku la ke kaikaina o Iareda, (ano, ewalu no ka nui o na moku i hoomakaukau ia ai,) i ka mauna a lakou i kapa aku ai o mauna Selema, no ke kiekie loa ona, a hoohehee iho la noloko mai o kahi pohaku i na pohaku uuku he umikumamaono; a ua keokeo a moakaka ia mau mea, e like me ke aniani moakaka lea; a hali ae la oia ia mau mea ma kona mau lima maluna o ka piko o ka mauna, a hea hou aku la i ka Haku, i ka i ana:

2. E ka Haku, ua olelo mai la oe, e hoopuni ia mai makou a puni me na wai nui e pono ai. Ano hoi, e nana mai oe, e ka Haku, a e huhu ole mai oe i kau kauwa nei no kona nawaliwali imua ou; no ka mea, ua ike makou ua hemolele oe, a e noho ana ma na lani; a ua pono ole makou imua ou; no ka haule ana, ua lilo ko makou ano maoli i ino mau; aka hoi, e ka Haku, ua haawi mai la oe i kauoha e kahea aku makou ia oe, i loaa mai ai ia makou mai ia oe mai, e like me ko makou mau makemake.

3. Aia hoi, e ka Haku, ua hahau mai oe ia makou no ko makou hala, a ua kipaku mai ia makou, a no keia mau makahiki he nui iloko makou o ka waonahele; ua lokomaikai mai nae oe ia makou. E ka Haku e, e nana mai iaʻu me ke aloha, a e hoohuli ae oe i kou huhu mai keia poe kanaka aku ou, a e ae ole mai e hele aku lakou i kela kapa o keia hohonu ooloku ma ka pouli, aka, e nana mai i keia mau mea aʻu i hoohehee iho ai noloko mai o ka pohaku.

4. A ua ike au, e ka Haku, ia oe no ka mana a pau, a ua hiki ke hana i kela mea i keia mea au i makemake ai no ka pomaikai o ke kanaka; nolaila, e hoopa mai i keia mau pohaku, e ka Haku, me kou manamana lima, a e hoomakaukau ia mau mea i alohi mai ai ia mau mea iloko o ka pouli; a e alohi mai ia mau mea ia makou iloko o na moku a makou i hoomakaukau ai, i loaa ai ka malamalama ia makou, oiai makou e hele ana i kela kapa o ke kai.

5. Aia hoi, e ka Haku, ua hiki ia oe ke hana i keia. Ua ike makou ua hiki ia oe ke hoike mai i ka mana nui, he mea uuku nae i ka nana aku i ka hoomaopopo ana o na kanaka.

6. A eia kekahi, i ka wa a ke kaikaina o Iareda i olelo aku ai i keia mau olelo, aia hoi, o mai la ka Haku i kona lima a hoopa pakahi iho la i na pohaku, me kona manamana lima; a ua wehe ia ka paku mai na maka ae o ke kaikaina o Iareda, a ike aku la oia i ka manamana lima o ka Haku; a ua like ia me ka manamana lima o ke kanaka, e like me ka io a me ke koko; a hina iho la ke kaikaina o Iareda ilalo imua o ka Haku, no ka mea, ua loohia oia me ka eehia.

7. A ike mai la ka Haku ua hina iho ke kaikaina o Iareda i ka honua; a i mai la ka Haku ia ia: E ala ae, no ke aha la oe i hina ai?

8. A i aku la oia i ka Haku: Ua ike aku la au i ka manamana lima o ka Haku, a makau iho la au o hahau mai oia iaʻu; no ka mea, aole au i ike he io a me ke koko ko ka Haku.

9. A i mai la ka Haku ia ia: No kou manaoio ua ike oe e lawe mai ana au maluna iho oʻu i ka io a me ke koko; a, aole loa i hele e mai kekahi kanaka imua oʻu me ka manaoio loa e like me oe nei; no ka mea, i ole pela, ua hiki ole ia oe ke ike mai i koʻu manamana lima. Ike mai la anei oe i na mea e ae i oi aku i keia?

10. A pane aku la oia: Aole; e ka Haku, e hoike mai ia oe iho iaʻu.

11. A i mai la ka Haku ia ia: E manaoio ana anei oe i na olelo aʻu e olelo aku ai?

12. A pane aku la oia: Ae, e ka Haku, ua ike au e olelo ana oe i ka oiaio, no ka mea, he Akua oe o ka oiaio, a ua hiki ole ke wahahee mai.

13. A ia ia i olelo aku ai i keia mau olelo, aia hoi, hoike mai la ka Haku ia ia iho ia ia, a i mai la: No kou ike ana i keia mau mea, ua hoola ia mai oe mai ka haule ana mai; nolaila, ua lawe hou ia mai oe imua o koʻu alo; nolaila, ke hoike aku nei au iaʻu iho ia oe.

14. Aia hoi, owau no ka mea i hoomakaukau ia mai ka hookumu ia ana mai o ke ao nei e hoolapanai aku i koʻu poe kanaka. Aia hoi, owau no o Iesu Kristo. Owau no ka Makua a me ke Keiki. Iloko oʻu e loaa ai i na kanaka a pau ka malamalama, a oia a mau loa, oia hoi ka poe e manaoio ana ma koʻu inoa; a e lilo auanei lakou i poe keikikane naʻu a i poe kaikamahine naʻu.

15. A, aole loa au i hoike e aku iaʻu iho i kanaka aʻu i hana ai, no ka mea, aole loa he kanaka i manaoio e mai iloko oʻu e like me oe nei. Ke ike mai nei anei oe ua hana ia aku oe mamuli o koʻu ano like? He oiaio, ua hana ia aku na kanaka a pau ma kinohou, mamuli o koʻu ano like ponoi.

16. Aia hoi, o keia kino, au e ike mai nei ano, oia no ke kino o koʻu uhane; a ua hana au i kanaka mamuli o ke kino o koʻu uhane; a e like me au e ikea nei e oe ma ka uhane, pela no au e ikea e koʻu poe kanaka ma ka io.

17. Ano, e like me au, o Moroni nei, i olelo aku ai, ua hiki ole iaʻu ke kakau iho i mooolelo a pau o na mea i kakau ia ai, nolaila, ua lawa au ke olelo aku, ua hoike mai la o Iesu ia ia iho i ua kanaka nei ma ka uhane, mamuli o ke ano a i ka like ana o ke kino hookahi, e like me ia i hoike mai ai ia ia iho i ko Nepai poe;

18. A lawelawe mai la Oia ia ia, me ia i lawelawe mai ai i ko Nepai poe; a o keia a pau, i ike ai ua kanaka nei oia ke Akua, no ka nui wale o na hana nui a ka Haku i hoike mai ai ia ia.

19. A no ka ike o ua kanaka nei, ua hiki ole ke alalai ia oia mai ka nana ana aku iloko o ka paku; a ike aku la oia i ka manamana lima o Iesu, a, ia ia i ike aku ai ia mea, hina iho la oia me ka makau; no ka mea, ike iho la oia o ka manamana lima no ia o ka Haku; a, aohe ona manaoio hou, no ka mea, ua ike oia me ke kanalua ole;

20. Nolaila, me keia ike lea i ke Akua, ua hiki ole ke alalai ia oia mailoko aku o ka paku; nolaila, ike aku la oia ia Iesu, a lawelawe mai la Oia ia ia.

21. A eia kekahi, olelo mai la ka Haku i ke kaikaina o Iareda: Aia hoi, mai hookuu aku i keia mau mea au i ike mai ai a i lohe ai, e hele aku i ko ke ao nei, a hiki aku i ka manawa aʻu e hoonani aku ai i kuu inoa ma ka io; nolaila, e hoahu iho oe i na mea au i ike ai a i lohe ai, a e hoike ole aku i kekahi kanaka.

22. A, aia hoi, ia oe e hele mai ai ioʻu nei, e kakau iho oe ia mau mea a e sila aku ia mau mea, i hiki ole ai i kekahi mea ke hoike mai i ke ano o ia mau mea; no ka mea, e kakau iho oe ia mau mea ma ka olelo i hiki ole ai ke heluhelu ia ia mau mea.

23. A, aia, o keia mau pohaku elua kaʻu e haawi aku nei ia oe, a e sila iho oe ia laua no hoi, me na mea au e kakau iho ai.

24. No ka mea, o ka olelo au e kakau iho ai, ua hookahuli aku au; nolaila, e hana au i koʻu manawa kupono iho, i hoonui ai ua mau pohaku nei, i na maka o na kanaka, i na mea au e kakau iho ai.

25. A i ka wa a ka Haku i olelo aku ai i keia mau olelo, hoike mai la oia i ke kaikaina o Iareda i ko ka honua a pau i hala aku la, a me ka poe a pau e hiki mai ana; a kaohi ole oia ia lakou mai kona ike ana aku, a hiki loa aku i na welau o ka honua;

26. No ka mea, ua i mai la oia ia ia mamua, ina e manaoio oia iloko ona, ua hiki ia ia ke hoike mai ia ia i na mea a pau-e hoike ia mai no ia ia ia; nolaila, ua hiki ole i ka Haku ke aua mai i kekahi mea mai ona aku; no ka mea, ua ike oia ua hiki i ka Haku ke hoike mai ia ia i na mea a pau.

27. A i mai la ka Haku ia ia: E kakau iho i ua mau mea nei a e sila iho, a naʻu e hoike aku ia mau mea ma koʻu manawa ku pono iho i na keiki a kanaka.

28. A eia kekahi, kauoha mai la ka Haku ia ia e sila iho i ua mau pohaku la elua i loaa ai ia ia, a e hoike ole aku ia mau mea, a hiki i ka wa a ka Haku e hoike aku ai ia mau mea i na keiki a kanaka.