1. A kauoha mai la ka Haku i ke kaikaina o Iareda e iho ilalo mailuna iho o ka mauna, mai ke alo ae o ka Haku, a e kakau iho i na mea ana i ike ai; a ua papa ia ia mau mea e hiki mai i na keiki a kanaka, a hiki aku i ka wa mahope iho o kona kaulia ana maluna iho o ke kea; a no keia mea, malama iho la ke alii Mosia ia mau mea, i ole ai e hiki aku i ko ke ao nei, a hiki aku i ka wa mahope iho o ko Kristo hoike ana ia ia iho i kona poe kanaka.

2. A mahope iho o ko Kristo hoike io ana ia ia iho i kona poe kanaka, kauoha mai la ia e hoike ia mai ia mau mea.

3. Ano, mahope iho o ko lakou emi ana iho iloko o ka hoomaloka, a aohe he kanaka, koe wale no ko Lamana poe, a ua hoomalau mai lakou i ka euanelio o Kristo; nolaila, ua kauoha ia mai au e huna hou iho au ia mau mea iloko o ka honua.

4. Aia hoi, ua kakau iho au maluna iho o keia mau papa, i ua mau mea la a ke kaikaina o Iareda i ike ai; a aole loa i hoike ia mai na mea i oi aku, i na mea i hoike ia mai i ke kaikaina o Iareda;

5. Nolaila, ua kauoha mai la ka Haku iaʻu e kakau iho ia mau mea; a ua kakau iho no au ia mau mea. A kauoha mai la oia iaʻu e sila aku au ia mau mea; a ua kauoha mai la no hoi oia e sila aku au i ke ano o ia mau mea, no ia mea, ua sila aku au i na mea hoike i ke ano o na olelo, e like me ke kauoha a ka Haku.

6. No ka mea, i mai la ka Haku iaʻu: Aole e hele aku ia mau mea i ka poe Genetile la, a hiki aku i ka la a lakou e mihi ai i ko lakou hewa, a e lilo i maemae imua o ka Haku;

7. A ma ia la la a lakou e hana ai me ka mauaoio iloko oʻu, wahi a ka Haku, e like me ke kaikaina o Iareda i hana ai, i hiki ke hoomaemae ia lakou iloko oʻu, alaila au e hoike aku ai ia lakou i na mea a ke kaikaina o Iareda i ike ai, oia, i ka wehewehe ana ia lakou i koʻu mau hoikeana a pau, wahi a Iesu Kristo, ke Keiki a ke Akua, ka Makua o na lani a o ka honua, a me na mea a pau olaila i piha ai.

8. A o ka mea nana e paio ku e mai i ka Haku, e hoomainoino ia oia; a o ka mea nana e hoole mai i keia mau mea, e hoomainoino ia oia; no ka mea, ia lakou wau e hoike ole aku ai i na mea nui ae, wahi a Iesu Kristo, no ka mea, owau no ia ka mea nana e olelo nei;

9. A ma kaʻu kauoha ua wehe ia a ua pani ia na lani; a ma kaʻu olelo, e haalulu auanei ka honua; a ma kaʻu kauoha, e hala aku auanei ka poe kamaaina ona, me he mea la ma o ke ahi la;

10. A o ka mea e manaoio ole ana i kaʻu mau olelo, e manaoio ole ana oia i koʻu poe haumana; a ina aole wau e olelo nei, e noonoo pono mai oukou; no ka mea, e ike auanei oukou owau no ka mea e olelo ana, ma ka la hope.

11. Aka, o ka mea e manaoio ana i keia mau mea aʻu i olelo aku ai, e hele aku au io na la me na hoikeana o koʻu Uhane; a e ike no oia a e hoike aku. No ka mea, no koʻu Uhane, e ike auanei no oia ua oiaio keia mau mea; no ka mea, e ao hoohuli ana ia i na kanaka e hana i ka maikai;

12. O ka mea e ao hoohuli ana i na kanaka e hana i ka maikai, noʻu nei no ia; no ka mea, e hiki ole mai ana ka maikai mai kekahi mea e ae aku, aka mai oʻu wale aku nei no. Owau no ka mea hookahi e alakai ana i na kanaka e hana i ka maikai a pau; o ka mea e manaoio ole mai i kaʻu mau olelo, aole oia e manaoio mai iaʻu, owau no e ola nei; a o ka mea e manaoio ole mai iaʻu, aole oia e manaoio mai i ka Makua nana au i hoouna mai. No ka mea hoi, owau no ka Makua, owau no ka malamalama, a me ke ola, a me ka oiaio o ke ao nei.

13. E hele mai oukou ioʻu nei, e ka poe Genetile, a e hoike aku no au ia oukou i na mea nui ae, i ka ike i huna ia iho no ka manaoio ole.

14. E hele mai oukou ioʻu nei, e ko ka hale o Iseraela, a e hoike ia aku auanei ia oukou ka nani o na mea nui a ka Makua i hoahu iho ai no oukou, mai ka hookumu ia ana mai o ke ao nei; a ua hiki ole mai ia ia oukou, no ka manaoio ole.

15. Aia hoi, i ka wa a oukou i nahae ai i kela paku o ka manaoio ole, ka mea e kaohi ana ia oukou e noho ma ko oukou noho weliweli o ka naau hewa a paakiki, a me ka makapo o ka hoomaopopo ana, alaila, e hoike ia aku na mea nui a kupanaha, i huna ia mai ka hookumu ia ana mai o ke ao nei mai o oukou ae; he oiaio, i ka wa a oukou e hea aku ai i ka Makua ma koʻu inoa, me ka naau pepe a me ka uhane mihi, alaila, e ike no oukou ua hoomanao no ka Makua i ka berita ana i hana aku ai i ko oukou poe kupuna, e ko ka hale o Iseraela;

16. A, alaila, e wehewehe ia aku kaʻu mau hoikeana, aʻu i kauoha aku ai e palapala ia e kaʻu kauwa o Ioane, ma na maka o na kanaka a pau. E hoomanao, i ka wa a oukou e ike ai i keia mau mea, e ike no oukou ua kokoke mai ka manawa e hoike ia aku ai ia mau mea ma ka hana io;

17. Nolaila, i ka wa a oukou e loaa ai keia mooolelo, ua hiki ia oukou ke ike ua hoomaka ae la ka hana a ka Makua maluna iho o ka ili a pau o ka aina.

18. Nolaila, e mihi oukou, e ko na welau a pau o ka honua, a e hele mai ioʻu nei, a e manaoio i koʻu euanelio, a e bapetizo ia ma koʻu inoa; no ka mea, o ka mea e manaoio mai, a e bapetizo ia, e hoola ia oia; aka, o ka mea e manaoio ole mai, e hoohewa ia oia; a e hahai no na ouli i ka poe manaoio mai i koʻu inoa.

19. A pomaikai oia ka mea i loaa e onipaa ana i koʻu inoa, ma ka la hope, no ka mea, e hookiekie ia ae oia iluna e noho ma ke aupuni i hoomakaukau ia ai nona mai ka hookumu ia ana mai o ke ao nei. A, aia hoi, owau no ka mea nana i olelo aku i keia mea. Amene.