1. A eia kekahi, iho aku la o Iareda, a me kona kaikaina, a me ko laua mau ohana, a me ka poe makamaka no hoi o Iareda a me kona kaikaina, ilalo iloko o ke awawa a ma ka akau, (a o Nimeroda ka inoa o ke awawa, ua kapa ia mamuli o ke kanaka koa i ka hahai holoholona,) me na pua holoholona a lakou i houluulu iho ai, o ke kane a me ka wahine, o kela ano keia ano.

2. A hoomoe iho la lakou i na pahele, a hoopahele ae la i na manu o ka lewa, a hoomakaukau iho la no hoi lakou i wahi ipu, a iloko olaila lakou i hali ai i na ia o na wai;

3. A hali pu ae la no hoi lakou i ka desereta me lakou, ma ka unuhi ana, he nalo meli ia; a pela lakou i hali pu ai me lakou i na puulu o na nalo meli, a me na ano a pau o na mea maluna o ka ili o ka aina, o na anoano o kela ano keia ano.

4. A eia kekahi, ia lakou i hiki ai ilalo iloko o ke awawa o Nimeroda, iho mai la ka Haku a kamailio pu mai la me ke kaikaina o Iareda; a iloko oia o kekahi ao, a ike ole aku la ke kaikaina o Iareda ia ia.

5. A eia kekahi, kauoha mai la ka Haku ia lakou, e hele aku lakou iloko o ka waonahele, he oiaio, iloko o kela hapa kahi a na kanaka i hele ole ai mamua. A eia kekahi, hele aku la ka Haku imua o lakou, a kamailio pu mai la me lakou, ia ia i ku ai iloko kahi ao, a kuhikuhi mai la i kahi a lakou e hele aku ai.

6. A eia kekahi, hele aku la lakou ma ka waonahele, a kapili iho la i na moku, a iloko o ia mau mea lakou i holo mai ai i keia kapa o na wai he nui wale, e kuhikuhi mau ia ana lakou ma ka lima o ka Haku.

7. A, aole ka Haku i ae mai i noho iho ai lakou ma kela aoao o ke kai ma ka waonahele, aka, ua makemake oia i hele mai lakou a hiki i ka aina i olelo mua ia ai, i maikai loa mamua o na aina e ae a pau, a ka Haku ke Akua i malama ai no kekahi lahuikanaka pono;

8. A ua hoohiki mai iloko o kona huhu i ke kaikaina o Iareda, o na mea e loaa ana ia lakou keia aina i olelo mua ia ai, mai ia manawa aku a mau loa aku, e hookauwa aku lakou nana, ke Akua oiaio hookahi, a i ole ia, e kahili ia aku lakou i ka wa e iho mai ai ka nui o kona inaina maluna iho o lakou.

9. Ano, ua hiki ia kakou ke ike i na olelo kupaa a ke Akua no keia aina, he aina ia o ka pomaikai, a o ka lahuikanaka e loaa ana ia ia lakou, e hoomana aku lakou i ke Akua, a i ole ia, e kahili ia aku auanei lakou i ka wa e iho mai ai ka nui o kona inaina maluna iho o lakou. A e hiki mai ana ka nui o kona inaina maluna iho o lakou, i ka wa i oo ai lakou ma ka hewa;

10. No ka mea hoi, he aina keia i maikai loa mamua o na aina e ae a pau; nolaila, o ka mea e loaa ana ia, e hookauwa no oia na ke Akua, a i ole ia, e kahili ia aku oia; no ka mea, oia no ka olelo kupaa mau loa a ke Akua. A, aole e kahili ia aku na keiki o ka aina, a hiki aku i ka wa i piha ai ka hewa o lakou.

11. A e hiki mai ana keia ia oukou, e ka poe Genetile, i hiki ia oukou ke ike i na olelo kupaa a ke Akua, i hiki ai ia oukou ke mihi, a e hoomau ole ma ko oukou mau hewa a hiki wale i ka wa i piha ai, i lawe ole ai oukou i ka nui o ka inaina o ke Akua ilalo maluna iho o oukou, e like me ka poe kamaaina o ka aina i hana ai mamua aku.

12. Aia hoi, he aina i wae ia keia, a o ka lahuikanaka e loaa ana ia, e hookuu ia lakou mai ka noho luhi ana ae, a mai ka noho pio ana ae, a mai na lahuikanaka a pau malalo iho o ka lani, ina e hookauwa aku lakou na ke Akua o ka aina, oia no o Iesu Kristo, ka mea i hoike ia aku ai ma na mea a makou i palapala ai.

13. Ano, ke hoomau aku nei au me kaʻu mooolelo; no ka mea, eia kekahi, lawe mai la ka Haku ia Iareda a me kona poe hoahanau i kela kai nui e hookaawale ana i na aina. A ia lakou i hiki aku ai i ke kai, kukulu iho la lakou i ko lakou mau halelewa; a kapa iho la lakou i ka inoa o ia wahi o Morianakuma; a noho iho lakou iloko o na halelewa; a noho iho la ma na halelewa ma ke kahakai no na makahiki eha.

14. A eia kekahi, i ka pau ana o na makahiki eha, hele hou mai la ka Haku i ke kaikaina la o Iareda, a ku iho la maloko o kahi ao a kamailio mai la me ia. A no na hora ekolu i kamailio mai ai ka Haku me ke kaikaina o Iareda, a hoohewa mai la ia ia no kona hoomanao ole ana e hea aku i ka inoa o ka Haku.

15. A mihi iho la ke kaikaina o Iareda i ka ino ana i hana ai, a hea aku la i ka inoa o ka Haku no kona poe hoahanau pu me ia. A i mai la ka Haku ia ia: E kala aku no au ia oe a i kou poe hoahanau, i ko lakou mau hala; aka, mai lawehala hou oe ma keia hope, no ka mea, e hoomanao oe aole e hooikaika mau koʻu Uhane i kanaka; nolaila, ina e lawehala oukou a hiki aku i ke oo loa ana, e hooki ia aku auanei oukou mai ke alo aku o ka Haku. A oia no koʻu mau manao maluna o ka aina aʻu e haawi aku ai ia oukou i hooilina no oukou; no ka mea, he aina maikai ia mamua o na aina e ae a pau.

16. A i mai la ka Haku: E hele e hana, a e kapili, mamuli o ke ano o na moku a oukou i hana ai mamua aku nei. A eia kekahi, hana aku la ke kaikaina o Iareda, a me kona poe hoahanau no hoi, a kapili iho i na moku mamuli o ke ano a lakou i kapili e ai, e like me na ao ana o ka Haku. A ua uuku ua mau moku nei a ua mama maluna o ke kai, e like me ka mama o kahi manu maluna o ke kai;

17. A ua kapili ia ia mau moku mamuli o kahi ano, i pilipaa loa ai lakou, i hiki ai ke hoopiha ia lakou me ka wai e like me ka bola; a ua pilipaa kolalo e like me kahi bola; a o na aoao olaila ua pilipaa e like me kahi bola; a he ihu lua lakou; a ua pilipaa koluna e like me kahi bola; a o ka loihi oia hoi ka loihi o kekahi laau; a o ka puka olaila, i kona wa i pani ia ai, na pilipaa e like me kahi bola.

18. A eia kekahi, hea aku la ke kaikaina o Iareda i ka Haku, i ka i ana: E ka Haku ua hooko au i ka hana au i kauoha mai ai iaʻu, a ua hana au i na moku e like me oe i kuhikuhi mai ai iaʻu.

19. A, aia hoi, e ka Haku e, aohe o lakou malamalama iloko, e ike i kahi a makou e hookele ai. A e make auanei no hoi makou, no ka mea, ua hiki ole ia makou ke hanu aku, koe wale no ke ea iloko o lakou; nolaila, e make auanei makou.

20. A i mai la ka Haku i ke kaikaina o Iareda; Aia hoi, e hana oe i kekahi puka maluna olaila, a malalo no hoi olaila; a i kou wa e pilikia ai no ka ea ole, e wehe oe i ka pani o ka puka, olaila, a e loaa ai ke ea. A ina paha e komo ke kai iloko maluna iho ou, alaila, e pani oe i ka puka olaila, i ole ai oukou e make i ke kai.

21. A eia kekahi, hana iho la ke kaikaina o Iareda pela, e like me ka ka Haku i kauoha mai ai.

22. A hea aku la oia i ka Haku, i ka i ana: E ka Haku, ua hana au me oe i kauoha mai ai iaʻu; a ua hoomakaukau au i na moku no koʻu poe kanaka, a aia, aohe he malamalama iloko o lakou. Aia hoi, e ka Haku, e ae mai anei oe i holo aku ai makou i kela kapa o keia moana nui ma ka pouli?

23. A i mai la ka Haku i ke kaikaina o Iareda: Heaha la kou makemake aʻu e hana aku ai, i loaa ai ia oukou ka malamalama iloko o ko oukou mau moku? No ka mea, aole e hiki ia oukou ke loaa na puka aniani, no ka mea, e ulupa liilii ia auanei ia mau mea; aole no hoi e lawe pu i ke ahi me oukou, no ka mea, aole oukou e hele ma ka malamalama o ke ahi;

24. No ka mea hoi, e like auanei oukou me he kohola la mawaena konu o ke kai; no ka mea, e lele aku auanei na ale nui maluna iho o oukou. Aka hoi, e lawe hou no au ia oukou iluna noloko mai o na hohonu o ke kai; no ka mea, ua puka aku la na makani noloko aku o koʻu waha, a o na ua a me na wai nui no hoi kaʻu i hoouna aku ai.

25. A, aia hoi, ke hoomakaukau nei au ia oukou no keia mau mea; no ka mea, ea, ua hiki ole ia oukou ke hele aku i kela kapa o keia hohonu nui, ke hoomakaukau ole au ia oukou no na ale o ke kai, a me na makani i puka aku ai, a me na wai nui e hiki mai ana. Nolaila, heaha la kou makemake aʻu e hoomakaukau iho ai no oukou, i loaa ai ia oukou ka malamalama, ia oukou e ale ia ai iloko o na hohonu o ke kai?