1. A eia kekahi, aia no na la o Etera ma na la o Korianatuma; a o Korianatuma no ke alii maluna iho o ka aina a pau.

2. A he kaula a ka Haku o Etera; nolaila, hele mai la o Etera ma na la o Korianatuma, a hoomaka ae la e wanana aku i na kanaka, no ka mea, aole e hiki ke kaohi ia oia no ka Uhane o ka Haku iloko ona;

3. No ka mea, hea aku la oia mai ke kakahiaka, a hiki aku i ka napoo ana o ka la, e kauleo ana i na kanaka e manaoio i ke Akua i ka mihi, o luku ia auanei lakou, i ka i ana ia lakou: Ma ka manaoio i hooko ia mai ai na mea a pau;

4. Nolaila, o ka mea e manaoio ana i ke Akua, ua hiki ke manaolana me ke kanalua ole no kekahi ao maikai nui ae, he oiaio, he wahi ma ka lima akau o ke Akua, a o ua manaolana nei e hiki mai ana ia no ka manaoio, e lilo ana i heleuma i na uhane o kanaka, e hoolilo ana ia lakou i paa, a i panee ole, e hoomahuahua mau ana ma na hana maikai; i alakai ia e hoonani aku i ke Akua.

5. A eia kekahi, wanana aku la o Etera i na mea nui a kupanaha i na kanaka, i na mea a lakou i manaoio ole ai, no ko lakou ike ole ia mau mea.

6. Ano, ke makemake nei au o Moroni, e olelo iki aku no keia mau mea; ke makemake nei au e hoike aku i ko ke ao nei, o ka manaoio oia no ka mea i manaolana ia ai a i ike ole ia ai; nolaila, mai hoole aku no ko oukou ike ole aku, no ka mea, aole e loaa ana ia oukou ka hoike, a pau ae la ka hoao ia ana o ko oukou manaoio;

7. No ka mea, ma ka manaoio hoike mai la o Kristo ia ia iho i ko makou poe kupuna, mahope mai o kona ala ana mai ka ma¬ke mai; a hoike ole mai oia ia ia iho ia lakou, a hiki i ka wa mahope o ko lakou manaoio ana ia ia; nolaila, he mea e pono ai i manaoio kekahi poe ia ia, no ka mea, hoike ole mai oia ia ia iho i ko ke ao nei.

8. Aka, no ka manaoio o na kanaka, ua hoike mai la oia ia ia iho i ko ke ao nei, a hoonani aku la i ka inoa o ka Makua, a hoomakaukau mai la i alanui i hiki ai i na mea e ae ma ia mea, ke lilo i poe hoaloaa o ka haawina lani, i hiki ia lakou ke manaolana no keia mau mea a lakou i ike ole ai;

9. Nolaila, ua hiki no hoi ia oukou ke loaa ka manaolana, a e lilo i poe hoaloaa o ka haawina, ina e manaoio oukou.

10. Aia hoi, ma ka manaoio, ua kahea ia ka poe o ka wa kahiko mamuli o ka aoao hemolele o ke Akua;

11. Nolaila, ma ka manaoio ua haawi ia mai ke kanawai o Mose. Aka, ma ka haawina o kana Keiki, ua hoomakaukau mai ke Akua i ala maikai nui ae; a ma ka manaoio ia mea i hooko ia ai;

12. No ka mea, ina aole he manaoio mawaena o ka poe keiki a kanaka, ua hiki ole i ke Akua ke hana mai i hana mana mawaena o lakou; nolaila, ua hoike ole mai oia ia ia iho, a hiki i ka wa mahope o ko lakou manaoio ana.

13. Aia hoi, o ka manaoio no ia o Alama laua me Amuleka ka mea i hoohiolo aku ai i ka halepaahao i ka honua.

14. Aia hoi, o ka manaoio no ia o Nepai laua me Lehi i hana ai i ka hoomalule ana maluna o ko Lamana poe, i bapetizo ia ai lakou me ke ahi a me ka Uhane Hemolele.

15. Aia hoi, o ka manaoio no ia o Amona a me kona mau hoahanau, i hana ai i ka hana mana nui mawaena o ko Lamana poe;

16. He oiaio, a o ka poe a pau nana i hana i na hana mana, hana aku la lakou ia mau mea ma ka manaoio, o ka poe mamua o Kristo, a me ka poe no hoi mahope iho.

17. A ma ka manaoio, loaa iho la i na haumana ekolu he olelo hoopomaikai, i ole ai lakou e hoao i ka make; a loaa ole ia lakou ka olelo hoopomaikai a hiki i ka wa mahope iho o ko lakou manaoio ana.

18. Aohe no i hana ia i kekahi manawa na hana mana, a hiki i ka wa mahope iho o ko lakou manaoio ana; nolaila, ua manaoio e lakou i ke Keiki a ke Akua.

19. A he nui no ka poe, no ka ikaika loa o ko lakou manaoio, he oiaio, mamua o ka hiki ana mai o Kristo, ua hiki ole ke alalai ia lakou mailoko ae o ka paku, aka, ike oiaio aku la me ko lakou mau maka i na mea a lakou i ike iho ai me ka maka o ka manaoio, a ua hauoli lakou.

20. A, aia hoi, ua ike kakou ma keia mooolelo, o kekahi o keia poe oia no ke kaikaina o Iareda; no ka mea, no ka nui o kona manaoio i ke Akua, i ka wa a ke Akua i o mai ai i kona manamana lima, ua hiki ole ia ia ke huna iho ia mea mai ka ike ana aku o ke kaikaina o Iareda, no kana olelo ana i olelo mai ai ia ia, a o ua olelo nei ua loaa ia ia ma ka manaoio.

21. A mahope iho o ko ke kaikaina o Iareda ike ana i ka manamana lima o ka Haku, no ka olelo hoopomaikai a ke kaikaina o Iareda i loaa mai ai ma ka manaoio, ua hiki ole i ka Haku ke aua aku i kekahi mea mai kona ike ana aku; nolaila, hoike mai la oia ia ia i na mea a pau, no ka mea, aole e hiki ke alalai hou ia oia mailoko ae o ka paku.

22. A ma ka manaoio i loaa ai i koʻu poe kupuna ka olelo hoopomaikai, e hiki auanei keia mau mea i ko lakou poe hoahanau ma o ka poe Genetile la; nolaila, ua kauoha mai la ka Haku iaʻu, he oiaio, o Iesu Kristo.

23. A i aku la au ia ia: E ka Haku, e hoomaewaewa mai auanei ka poe Genetile i keia mau mea, no ko makou nawaliwali ma ka palapala ana; no ka mea, e ka Haku, ua hana mai oe ia makou i mana ma ka olelo ma o ka manaoio la, aka, aole nae oe i hana mai ia makou i mana ma ka palapala ana; no ka mea, ua hana mai oe i keia poe kanaka a pau i hiki ai ia lakou ke olelo nui aku, no ka Uhane Hemolele au i haawi mai ai ia lakou;

24. A ua hana mai oe ia makou i hiki ai ia makou ke palapala uuku wale iho no, no ka hemahema o ko makou mau lima. Aia hoi, aole no oe i hana mai ia makou i mana ma ka palapala ana e like me ke kaikaina o Iareda, no ka mea, hana mai la oe ia ia, a o na mea ana i palapala iho ai, ua mana e like me oe, i ka hoopio ana i ke kanaka e heluhelu ana ia mau mea.

25. A ua hana mai oe i ka makou mau huaolelo i mana a i nui, i hiki ole ai ia makou ke palapala iho ia mau mea; nolaila, i ka wa a makou e kakau iho ana, ike iho la makou i ko makou nawaliwali, a hina iho la no ka hoonohonoho ana i ka makou mau huaolelo; a ke makau nei au o hoomaewaewa mai auanei ka poe Genetile i ka makou mau huaolelo.

26. A iaʻu i olelo aku ai i keia, olelo mai la ka Haku iaʻu, i ka i ana: E hoomaewaewa ana ka poe lapuwale, aka, e uwe auanei lakou; a ua lawa koʻu lokomaikai no ka poe akahai, i loaa ole ai ia lakou ka lanakila no ko oukou nawaliwali;

27. A ina e hele mai na kanaka ioʻu nei, naʻu no e hoike aku i ko lakou nawaliwali ia lakou. Ke haawi aku nei au i ka nawaliwali i na kanaka, i haahaa ai lakou; a ua lawa koʻu lokomaikai no na kanaka a pau e hoohaahaa ana ia lakou iho imua oʻu; no ka mea, ina e hoohaahaa mai lakou ia lakou iho imua oʻu, a manaoio mai iloko oʻu, alaila e hoolilo aku au i na mea nawaliwali i ikaika ia lakou.

28. Aia hoi, e hoike aku no au i ka poe Genetile i ko lakou nawaliwali, a e hoike aku no au ia lakou, e lawe mai ana ka manaoio, ka manaolana, a me ke aloha ioʻu nei-ka punawai o ka pono a pau.

29. A i ka lohe ana oʻu, o Moroni, i keia mau olelo, ua hooluolu ia mai au, a i aku la: E ka Haku, e hana ia kou makemake pono, no ka mea, ua ike au e hana ana oe i na keiki a kanaka e like me ko lakou manaoio;

30. No ka mea, olelo aku la ke kaikaina o Iareda i ka mauna Zerina: E neenee ae, a ua hooneenee ia ae ia. A ina aole he manaoio kona, ina ua neenee ole ae ia; no ia mea, e hana ana oe mahope o ka manaoio ana o na kanaka;

31. No ka mea, pela oe i hoike mai ai ia oe iho i kau poe haumana. No ka mea, mahope iho o ko lakou manaoio ana, a olelo aku la ma kou inoa, ua hoike mai oe ia oe iho ia lakou ma ka mana nui;

32. A ke hoomanao nei no hoi au ua olelo mai oe, ua hoomakaukau iho oe i hale no kanaka; he oiaio, mawaena o na wahi i noho ai o kou Makua, ma ia mea i hiki i kanaka ke loaa ka manaolana maikai nui ae; no ia mea, e manaolana ke kanaka e pono ai, a i ole ia, ua hiki ole ia ia ke loaa ka hooilina, ma kahi au i hoomakaukau iho ai.

33. A eia hou, ke hoomanao nei au ua olelo mai oe, ua aloha mai oe i ko ke ao nei, a hiki i ka waiho ana i kou ola ilalo no ko ke ao nei, i hiki ia oe ke lawe hou ia mea e hoomakaukau ai i wahi no na keiki a kanaka.

34. Ano, ua ike au o ua aloha nei i loaa ai ia oe no na keiki a kanaka, he aloha io no ia; nolaila, i ole na kanaka i loaa ai ke aloha io, ua hiki ole ia lakou ke loaa ua wahi la au i hoomakaukau ai ma na wahi i noho ai o kou Makua.

35. Nolaila, ua ike au ma ia mea au i olelo mai ai, ina aole ka poe Genetile e loaa ke aloha io, no ko makou nawaliwali, nau no lakou e hoao aku, a kaili aku i ko lakou talena, he oiaio, i ka mea i loaa ai ia lakou, a e haawi mai i ka poe nona ka nui loa aku.

36. A eia kekahi, pule aku la au i ka Haku, i haawi aku ai oia i ka poe Genetile i ka lokomaikai, i loaa ai ia lakou ke aloha io.

37. A eia kekahi, i mai la ka Haku iaʻu: Ina aole o lakou aloha io, he mea ole ia ia oe, ua kupaa oe; nolaila, e hoomaemae ia kou mau aahu. A no kou ike ana i kou nawaliwali, e hooikaika ia auanei oe, a hiki aku i ka noho ana ilalo ma kahi aʻu i hoomakaukau iho ai ma na wahi i noho ai o koʻu Makua.

38. Ano, ke uwe aloha aku nei owau, o Moroni, i ka poe Genetile, he oiaio, a i kuu poe hoahanau no hoi aʻu e aloha nei, a hiki i ka wa e halawai pu ai kakou imua o ka noho hookolokolo o Kristo, kahi e ike ai na kanaka a pau, aole o koʻu mau aahu i kikokiko ia me ko oukou koko;

39. Alaila, e ike no oukou ua ike au ia Iesu, a ua kamailio mai oia iaʻu, he maka he maka, a ua hai mai oia iaʻu ma ka haahaa moakaka; e like me ke kanaka e hai ana i kona hoa ma kuu olelo iho, no keia mau mea;

40. A he kakaikahi wale no kaʻu i kakau iho ai, no kuu nawaliwali ma ke kakau ana.

41. Ano, ua makemake au e kauleo aku ia oukou e imi ia Iesu nei, nona ka poe kaula a me ka poe aposetolo i palapala ai, i noho pu ai me oukou a mau loa aku ka lokomaikai o ke Akua ka Makua, a me ka Haku o Iesu Kristo no hoi, a me ka Uhane Hemolele, ka mea e hoike mai ana no laua. Amene.