Ka Buke A Etera

1. Ano, ke hoomaka nei au, o Moroni, e kakau iho i kahi mooolelo o kela poe kamaaina kahiko, ka poe i anai ia mai ai ma ka lima o ka Haku mai ka ili aku o keia aina akau.

2. A ke lawe nei au i kaʻu mooolelo mai na papa he iwakaluakumamaha mai, a ka poe kanaka o Limai i loaa ai, oia no ka i kapa ia ka buke a Etera.

3. A me aʻu i manao ai o ka hapa mua o keia mooolelo, e olelo ana no ka hana ia ana o ke ao nei, a o Adamu no hoi, a he mooolelo mai ia manawa mai a hiki wale mai i ka halepakui nui, a me na mea i hana ia mawaena o na keiki a kanaka a hiki mai ia manawa, ua loaa no ia mawaena o ka poe Iudaio;

4. Nolaila, aole au i kakau i kela mau mea i hana ia ai mai na la o Adamu mai a hiki wale i kela manawa; aka, aia no ia mau mea maluna iho o na papa; a o ka mea e loaa ana ia mau mea, nona hoi ka mana e hiki ia ia ke loaa ka mooolelo a pau.

5. Aka hoi, ke kakau ole nei au i ka mooolelo a pau, aka, he hapa wale no kaʻu e kakau nei, mai ka halepakui mai a hiki i ka wa i anai ia ai lakou a pau.

6. A penei wau e kakau iho nei i ka mooolelo. O ka mea nana i kakau iho i ua mooolelo nei, oia o Etera, a he mamo ia na Korianatora;

7. A o Korianatora ke keiki a Morona;

8. A o Morona ke keiki a Etema;

9. A o Etema ke keiki a Aha;

10. A o Aha ke keiki a Seta;

11. A o Seta ke keiki a Sibalona;

12. A o Sibalona ke keiki a Koma;

13. A o Koma ke keiki a Korianatuma;

14. A o Korianatuma ke keiki a Amanigada;

15. A o Amanigada ke keiki a Aarona;

16. A he mamo o Aarona na Heta, oia no ke keiki a Hearatoma;

17. A o Hearatoma ke keiki a Liba;

18. A o Liba ke keiki a Kisa;

19. A o Kisa ke keiki a Koruma;

20. A o Koruma ke keiki a Levi;

21. A o Levi ke keiki a Kima;

22. A o Kima ke keiki a Morianatona;

23. A he mamo o Morianatona na Ripalakisa;

24. A o Ripalakisa ke keiki a Seza;

25. A o Seza ke keiki a Heta;

26. A o Heta ke keiki a Koma;

27. A o Koma ke keiki a Korianatuma;

28. A o Korianatuma ke keiki a Emera;

29. A o Emera ke keiki a Omera;

30. A o Omera ke keiki a Sule;

31. A o Sule ke keiki a Kiba;

32. A o Kiba ke keiki a Oriha, oia no ke keiki a Iareda;

33. A o keia Iareda hele mai la ia me kona kaikaina, a me ko laua mau ohana, me kekahi poe e ae me ko lakou mau ohana, mai ka halepakui nui mai, i ka manawa a ka Haku i hookahuli ai i ka olelo a na kanaka, a hoohiki ma kona huhu, e hoopuehu ia aku lakou maluna iho o ka ili a pau o ka honua; a e like me ka olelo a ka Haku, ua hoopuehu ia aku na kanaka.

34. A he kanaka nui a ikaika ke kaikaina o Iareda, a he kanaka i kokua nui ia e ka Haku; no ka mea, i ae la o Iareda, kona kaikuaana ia ia: E hea aku i ka Haku, i ole ai oia e hookahuli mai ia kaua i lohe ole ai kaua i ka kaua mau olelo.

35. A eia kekahi, hea aku la ke kaikaina o Iareda i ka Haku, a aloha mai la ka Haku ia Iareda; nolaila, aole oia i hookahuli mai i ka olelo a Iareda; a o Iareda laua me kona kaikaina ua hookahuli ole ia.

36. Alaila, i ae la o Iareda i kona kaikaina: E hea hou aku i ka Haku, a malia paha e hoohuli ae oia i kona huhu mai ko kaua poe makamaka ae, i ole ai oia e hookahuli i ka lakou olelo.

37. A eia kekahi, hea aku la ke kaikaina o Iareda i ka Haku, a aloha mai la ka Haku i ko laua poe makamaka, a me ko lakou mau ohana no hoi, i ole i hookahuli ia lakou.

38. A eia kekahi, olelo hou ae la o Iareda i kona kaikaina, i ka i ana: O hele a e ninau aku i ka Haku, ina paha e kipaku mai oia ia kakou mailoko ae o ka aina, a ina e kipaku mai oia ia kakou mailoko ae o ka aina, e hea aku ia ia kahi e hele aku ai kakou. A owai la ke ike anoai e hali aku ka Haku ia kakou i kahi aina i maikai loa mamua o ka honua a pau. A ina pela, e malama loa kakou i ka Haku, i loaa ai ia ia kakou i hooilina no kakou.

39. A eia kekahi, hea aku la ke kaikaina o Iareda i ka Haku, e like me ka mea i olelo ia ai ma ka waha o Iareda.

40. A hoolohe mai la ka Haku i ke kaikaina o Iareda, a aloha mai la ia ia, a olelo mai la ia ia:

41. O hele a e houluulu iho i kou mau pua holoholona, o ke kane a me ka wahine, o kela ano o keia ano; a i na hua no hoi o ka honua o kela ano keia ano, a me kou mau ohana; a o Iareda no hoi, kou kaikuaana, a me kona ohana; a o kou poe makamaka a me ko lakou mau ohana, a me ka poe makamaka o Iareda a me ko lakou mau ohana.

42. A ia oe e hana ai i keia mea, e hele aku no oe ma ke alo o lakou ilalo iloko o ke awawa, aia ma ka akau ia. A malaila au e halawai pu ai me oe, a e hele aku no au imua ou iloko o kekahi aina i maikai loa mamua o ka aina a pau o ka honua nei.

43. A malaila au e hoopomaikai aku ai ia oe a me kau poe hua, a e hoala mai naʻu o kau poe hua, a o ka poe hua a kou kaikuaana, a me ka poe e hele pu ana me oe, he lahuikanaka nui. A e kela ole aku kekahi mamua o ka lahuikanaka aʻu e hoala ai noʻu nei o kau poe hua, maluna iho o ka ili a pau o ka honua nei. A pela hoi au e hana aku ai ia oe, no ka mea, o keia manawa loihi ua hea mai oe iaʻu.