1. Ano hoi, ke olelo nei no hoi au no ka poe e manaoio ole ana ia Kristo.

2. Aia hoi, e manaoio anei oukou ma ka la o ko oukou ike ia ana, i ka wa a ka Haku e hiki mai ai; he oiaio, o kela la nui i ka wa o ka honua e owili pu ia ai me he pepa la, a e hehee ai na kumu mua i ka wela loa; he oiaio, ma kela la nui i ka wa a oukou e kai ia ae ai e ku imua o ke Keikihipa a ke Akua, alaila, e olelo anei oukou, aohe he Akua?

3. Alaila, e hoole hou anei oukou i ke Kristo, a, ua hiki anei ia oukou ke nana aku i ke Keikihipa a ke Akua? Ke manao nei anei oukou e noho pu auanei oukou me ia malalo iho o ka ike paka i ko oukou hewa? Ke manao nei anei oukou ua hiki ia oukou ke olioli e noho pu me kela Mea Hemolele, i ka wa e hoowalania ia ai na uhane o oukou me ka ike paka i ka hewa ma ka oukou hana ino mau ana i kona mau kanawai?

4. Aia hoi, ke i aku nei au ia oukou e oi aku ko oukou poino ke noho pu me ke Akua hemolele a pono, malalo iho o ko oukou ike paka i ko oukou paumaele imua ona, mamua o ka noho pu ana o oukou me na uhane i hoohewa ia iloko o gehena.

5. No ka mea hoi, i ka wa a oukou e lawe ia ae ai e ike i ko oukou olohelohe imua o ke Akua, a me ka nani o ke Akua no hoi, a me ka hemolele o Iesu Kristo, e hoaa no ia mea i ka lapalapa o ke ahi hiki ole ke kinai ia maluna iho o oukou.

6. Nolaila, ea, e ka poe hoomaloka, e huli mai i ka Haku; e hea ikaika aku i ka Makua ma ka inoa o Iesu Kristo, i loaa ai paha oukou, me ke kina ole, maemae, maikai a keokeo, i hoomaemae ia ai ma ke koko o ke Keikihipa, ma kela la nui hope.

7. A eia hou kaʻu e olelo aku nei ia oukou, ka poe e hoole ana i na hoikeana a ke Akua, a olelo ae: Ua hoopau ia ae la ia mau mea, aole no na hoikeana, aole no hoi na wanana, aole hoi na haawina, aole hoi hoola ana, aole hoi olelo ana me na olelo e, a me na hoomaopopo ana i na olelo e.

8. Aia hoi, ke i aku nei au ia oukou, o ka mea e hoole ana i keia mau mea, ua ike ole oia i ka euanelio o Kristo; he oiaio, ua heluhelu ole oia i na palapala hemolele; ina pela, ua hoomaopopo ole oia ia mau mea.

9. No ka mea, aole anei kakou i heluhelu, oia like no o ke Akua, inehinei, a i keia la no, a no ka wa pau ole; a iloko ona aole he ano lauwili, aole loa hoi he luli iki?

10. Ano, ina ua noonoo wale oukou ia oukou iho he akua e lauwili ana, a iloko ona he luli iki, alaila, ua noonoo wale oukou ia oukou iho i kekahi akua, aole oia he Akua o na hana mana.

11. Aka hoi, e hoike aku no au ia oukou i ke Akua o na hana mana, oia no ke Akua o Aberahama, a o ke Akua o Isaaka, a o ke Akua o Iakoba; a oia no ke Akua hookahi nana i hana mai i na lani a me ka honua, a me ko lakou mau mea a pau i piha ai.

12. Aia hoi, hana mai la oia ia Adamu; a ma o Adamu la i hiki mai ai ka haule ana o kanaka. A no ka haule ana o kanaka, hiki mai la o Iesu Kristo, oia no ka Makua a me ke Keiki; a no Iesu Kristo, hiki mai la ka hoolapanai ia ana o kanaka.

13. A no ka hoolapanai ia ana o kanaka, i hiki mai ai ma o Iesu Kristo la, ua lawe hou ia aku lakou i ke alo o ka Haku; he oiaio, ma keia mea no ka hoolapanai ia ana o na kanaka a pau, no ka mea, e lawe mai ana ka make o Kristo i ke alahouana, oia ka mea e lawe mai ana i ka hoolapanai ana mai ka hiamoe mau loa mai, a mai ua hiamoe ana la e hoala ia ae auanei na kanaka a pau ma ka mana o ke Akua, i ka wa e kani ai ka pu; a e puka mai auanei lakou, o ka poe uuku a me ka poe nui, a e ku auanei lakou a pau imua o kona wahi hookolokolo, i hoolapanai ia mai ai a hookuu ia mai ai mai keia apo mau loa mai o ka make, a o ua make nei he make kino ia;

14. Alaila, e hiki mai ana ka hooponopono o ka Mea Hemolele maluna iho o lakou; alaila, e hiki mai ana ka manawa, o ka mea i paumaele, e mau no kona paumaele; a o ka mea i pono, e mau no kona pono; o ka mea olioli, e mau no kona olioli; a o ka mea olioli ole, e mau no kona olioli ole.

15. Ano, e ka poe a pau i noonoo wale ia oukou iho i ke akua i hiki ole ke hana i na hana mana, ke ninau nei au ia oukou, ua hala aku anei keia mau mea a pau, aʻu i olelo ai? Ua hiki mai anei ka hopena i keia manawa? Aia hoi, ke i aku nei au ia oukou, aole; a aole i hooki ke Akua i ka noho ana i Akua o na hana mana.

16. Aia hoi, aole anei he kupanaha ma ko kakou mau maka, na mea a ke Akua i hana ai? He oiaio, a owai la ka mea i hiki ke hoomaopopo i na hana kupanaha a ke Akua?

17. Owai la ka mea e olelo ae: Aole he hana mana, ka hana ia ana o ka lani a me ka honua ma kana olelo; a ma ka mana o kana olelo, ua hana ia ke kanaka noloko mai o ka lepo o ka honua; a ma ka mana o kana olelo, ua hana ia na hana mana?

18. A owai la ka mea e olelo ae: Aole o Iesu Kristo i hana i na hana mana ikaika he nui wale? A ua nui na hana mana ikaika i hana ia ai ma na lima o ka poe aposetolo.

19. A ina ua hana ia na hana mana mamua, alaila, no ke aha la ke Akua i hooki ai i ka noho ana i Akua o na hana mana, a, aole nae oia e loli iki? Aia hoi, ke i aku nei au ia oukou, aole oia e loli ana; ina pela, e pau kona noho Akua ana; aka, aole loa e pau kona noho Akua ana, a he Akua no hoi ia o na hana mana.

20. A o ke kumu i hooki ai oia i ka hana ana i na hana mana mawaena o na keiki a kanaka, no ka emi ana ia o lakou iloko o ka hoomaloka, a no ka haalele ana i ke ala pololei, a no ka ike ole ana i ke Akua ka mea e pono ai lakou ke paulele aku.

21. Aia hoi, ke i aku nei au ia oukou, o ka mea e manaoio ana ia Kristo, me ke kanalua ole, o kela mea keia mea ana e noi aku ai i ka Makua ma ka inoa o Kristo e haawi ia mai ia ia ia; a no na mea a pau keia olelo hoolana, a hiki aku i ko na welau o ka honua.

22. No ka mea hoi, penei wahi a Iesu Kristo i kana mau haumana e kali ana; he oiaio, a i kana poe haumana a pau no hoi, me ka lohe ana o ka lehulehu: E hele aku oukou i na aina a pau, a e hai aku i ka euanelio i na kanaka a pau;

23. A o ka mea e manaoio mai a bapetizo ia, e hoola ia oia, aka, o ka mea manaoio ole mai, e hoohewa ia oia.

24. A eia no na ouli e pili pu aku i ka poe e manaoio mai iaʻu, ma koʻu inoa lakou e mahiki aku ai i na daimonio; e olelo no hoi lakou ma na olelo e; e kaikai no lakou i na nahesa; a ina e inu lakou i ka mea make, aole lakou e poino ia mea; e kau no lakou i ko lakou mau lima maluna iho o ka poe mai, a e ola no lakou;

25. A o ka mea e manaoio mai i koʻu inoa, me ke kanalua ole, ia ia au e hooiaio aku ai i kaʻu mau olelo a pau, a hiki aku i na welau o ka honua.

26. Ano hoi, owai la ka mea e hiki ke ku e i na hana a ka Haku? Owai la ka mea e hiki ke hoole aku i kana mau olelo? Owai la ka mea e ea ae e ku e aku i ka mana loa o ka Haku? Owai la ka mea e hoowahawaha i na hana a ka Haku? Owai la ka mea e hoowahawaha i na keiki a Kristo? Aia hoi, o oukou, ka poe e hoowahawaha ana i na hana a ka Haku, no ka mea, e kahaha no oukou a make iho.

27. Nolaila, ea, mai hoowahawaha, a mai kahaha, aka, e hoolohe i na olelo a ka Haku, a e noi aku i ka Makua ma ka inoa o Iesu no kela mea keia mea a oukou e nele ai. Mai kanalua, aka, e manaoio, a e hoomaka e like me na manawa kahiko, a e hele mai i ka Haku la me ko oukou naau a pau, a e hooikaika aku i ke ola no oukou iho me ka makau a me ka haalulu imua ona.

28. E naauao oukou ma na la o ko oukou noho ana ma ka honua; e hoomaemae ia oukou iho i na mea paumaele a pau; mai noi aku, e hiki ia oukou ke hoomaunauna iho ia mea maluna o ko oukou mau kuko, aka, e noi aku me ka manao naueue ole, i ae ole aku ai oukou i ka hoowalewale, aka i hookauwa aku ai oukou na ke Akua ola a oiaio.

29. E makaala i bapetizo ole ia ai oukou me ka pono ole; e makaala i ai ole ai oukou i ka ahaaina a ka Haku me ka pono ole; aka, e makaala e hana i na mea a pau ma ka pono, a e hana ia mea ma ka inoa o Iesu Kristo, ke keiki a ke Akua ola; a ina e hana oukou i keia a hoomau aku a hiki wale i ka hopena, aole oukou e hoolei ia aku mawaho.

30. Aia hoi, ke olelo aku nei au ia oukou me he mea la e olelo ana au mai ka make ae; no ka mea, ua ike au e lohe no auanei oukou i kaʻu mau olelo.

31. Mai hoohewa mai iaʻu no koʻu hemahema; aohe no hoi i kuu makuakane, no kona hemahema; aohe no hoi i ka poe nana i kakau iho mamua aku ona, aka, e oi aku ko oukou pono ke aloha aku i ke Akua no kona hoike ana ia oukou i ko makou mau hemahema, i ao ia ai oukou e naauao loa mamua o ko makou.

32. Ano hoi, ua kakau iho makou i keia mooolelo mamuli o ko makou ike i na kaha, i kapa ia mawaena o makou ko Aigupita i hooponopono ia, a ua haawi ia mailalo mai a hoano e ia e makou, mamuli o ke ano o ka makou olelo.

33. A ina ua nui ku pono ko makou mau papa, ina ua kakau iho makou ma ka olelo Hebera; aka, ua hoano e ia no hoi ka olelo Hebera e makou; a ina ua hiki ia makou ke kakau iho ma ka olelo Hebera, alaila, aole loaa ia oukou na hemahema ma ka makou mooolelo.

34. Aka, ua ike no ka Haku i na mea a makou i kakau iho ai, a aole hoi kekahi lahuikanaka e ae i ike i ka makou olelo, no laila, ua hoomakaukau oia i na mea no ka hoike ana i ke ano o ia mau mea.

35. A ua kakau ia keia mau mea, i hiki ia makou ke hoomaemae iho i ko makou aahu i ke koko o ko makou poe hoahanau, ka poe i emi iho iloko o ka hoomaloka.

36. A, aia hoi, o keia mau mea a makou i noi aku ai no ko makou poe hoahanau, he oiaio, oia no ka hoihoi hou ia ana o lakou i ka ike no Kristo, ua like ia me na pule a ka poe hoano a pau, ka poe i noho mua ma ka aina.

37. A na ka Haku, o Iesu Kristo e ae mai e hooko ia ai na pule a lakou e like me ko lakou manaoio; a na ke Akua ka Makua e hoomanao mai i ka berita ana i hana ai me ko ka hale o Iseraela; a nana e hoopomaikai mai ia lakou no ka wa pau ole, ma o ka manaoio la ma ka inoa o Iesu Kristo. Amene.