Ka Buke A Moramona

1. Ano, ke kakau nei owau, o Moramona, i mooolelo o na mea aʻu i ike ai a i lohe ai no hoi, a kapa aku ia mea, ka buke a Moramona.

2. A kokoke i ka manawa a Amarona i huna iho ai i na mooolelo no ka Haku, hele mai la oia ioʻu nei, (he umi paha oʻu makahiki; a ua hoomaka au e ao ia mai ma kekahi mau mea, mamuli o ke ano o ke ao ia ana o koʻu poe kanaka,) a i mai la o Amarona iaʻu: Ke ike nei au he keiki kuoo oe, a ua hiki wawe ma ka ike;

3. Nolaila, ia oe e aneane ai i ka iwakaluakumamaha makahiki, ke makemake nei au e hoomanao oe i na mea au e ike ai no keia lahuikanaka; a ia oe e hiki ai ia makahiki, e hele aku oe i ka aina o Anatuma, i kekahi puu, e kapa ia no ia o Sima; a malaila wau i waiho iho ai no ka Haku i na mea kaha laa a pau no keia lahuikanaka.

4. A aia hoi, e lawe oe i na papa a Nepai iou la, a o na mea i koe e waiho oe ma kahi o ia mau mea e waiho nei; a e kahakaha oe ma na papa a Nepai, i na mea a pau au i ike ai no keia lahuikanaka.

5. A he mamo no wau, o Moramona, na Nepai, (a o ka inoa o koʻu makuakane o Moramona no ia,) hoomanao iho la au i na mea a Amarona i kauoha mai ai iaʻu.

6. A eia kekahi, ma ka umikumamakahi makahiki oʻu, ua hali ia ae la au e koʻu makuakane iloko o ka aina hema, a hiki i ka aina o Zarahemela;

7. Ua uhi ia ae la ka ili a pau o ka aina me na hale, a ua aneane lehulehu loa na kanaka, me he mea la me ke one o ke kai.

8. A eia kekahi, ma keia makahiki, hoomaka ae la kekahi kaua mawaena o ko Nepai poe, o lakou no ko Nepai, a me ko Iakoba, a me ko Iosepa, a me ko Zorama; a o keia kaua mawaena ia o ko Nepai poe, a me ko Lamana poe, a me ko Lemuela, a me ko Isemaela.

9. Ano, o ko Lamana, a me ko Lemuela, a me ko Isemaela, ua kapa ia ko Lamana poe, a o na aoao elua oia ko Nepai poe a me ko Lamana poe.

10. A eia kekahi, hoomaka ae la ke kaua mawaena o lakou ma na mokuna o Zarahemela, ma na wai o Sidona.

11. A eia kekahi, ua houluulu ae la ko Nepai poe i na kanaka he nui loa i kahi hookahi, a ua oi aku ko lakou nui mamua o na tausani he kanakolu. A ma ua makahiki hookahi nei ua nui na kaua a lakou i hoili ai, a ua lanakila ae la ko Nepai poe maluna o ko Lamana poe, a luku aku la he nui loa o lakou.

12. A eia kekahi, haalele iho la ko Lamana poe i ko lakou manao, a ua maluhia iho la ka aina, a ua mau ka maluhia no na makahiki eha paha, i hookahe ole ia ai ke koko.

13. Aka, lanakila ae la ka hewa maluna iho o ka ili o ka aina a puni, a no ia mea, lawe aku la ka Haku i kana poe haumana i aloha ia, a ua hooki ia iho la ka hana ia ana o na hana mana a me ka hoola ana, no ka hewa o na kanaka.

14. A, ua ole na haawina mai ka Haku mai, aole hoi i hiki mai ka Uhane Hemolele maluna iho o kekahi mea, no ko lakou hewa a hoomaloka.

15. A he umikumamalima makahiki oʻu, a he naau kuoo koʻu ma kekahi mau mea, nolaila, ua ike ia au e ka Haku, a hoao aku la, a ike iho la i ka lokomaikai o Iesu.

16. A hoao aku la au e hai aku i ka olelo i keia lahuikanaka, aka, ua papani ia mai la kuu waha, a ua papa ia mai au ma ka hai ana aku ia lakou; no ka mea hoi, ua kipi paakiki aku la lakou i ko lakou Akua, no ka hewa o lakou, a ua lawe ia aku ka poe haumana i aloha ia mailoko aku o ka aina.

17. Aka, kali iho la au mawaena o lakou, aka, ua papa ia mai au e hai ole aku ia lakou, no ka paakiki o ko lakou mau naau; a no ka paakiki o ko lakou mau naau, ua hoopoino ia ka aina no lakou.

18. A hoopilikia iho la ua poe powa Gadianatona nei, e noho ana mawaena o ko Lamana poe, i ka aina, a hoomaka ae la ko ka aina e huna iho i ko lakou mau waiwai ma ka honua; a lilo iho la ia mau mea i pahee, no ka mea, ua hoopoino ka Haku i ka aina, i hiki ole ai ia lakou ke hoopaa ia mau mea, aole hoi loaa hou aku ia mau mea.

19. A eia kekahi, ma ka aina, o na anaana, a me na hoopiopio, a me na hana o na uhane hoopunipuni; a ua hana ia ka mana o ka mea ino maluna iho o ka ili a pau o ka aina, i ka hooko ana i na olelo a pau a Abinadi, a o Samuela, ka Lamana no hoi.