1. A eia kekahi, hele aku la au mawaena o ko Nepai poe, a mihi iho la i ka hoohiki aʻu i hana ai, i kokua hou ole ai au ia lakou; a haawi hou mai la lakou iaʻu i ka noho alihi kaua ana o ko lakou poe kaua; no ka mea, nana mai la lakou iaʻu me he mea la ua hiki iaʻu ke hoopakele aku ia lakou mai ko lakou mau popilikia ae.

2. Aka hoi, ua nele au i ka manaolana ole, no ka mea, ua ike au i na hoopai o ka Haku e hiki mai ana maluna iho o lakou; no ka mea, aole lakou i mihi i ko lakou mau hala, aka, aumeume aku la no ko lakou mau ola, me ke kahea ole aku i kela Mea nana lakou i hana.

3. A eia kekahi, hele mai la ko Lamana poe e ku e ia makou i ka wa a makou i hee aku ai i ke kulanakauhale o Ioredane; aka hoi, ua hooauhee ia aku lakou ihope, i ole ai lakou i hoopio i ke kulanakauhale ia manawa.

4. A hele hou mai la lakou e ku e ia makou, a malama iho la makou i ke kulanakauhale. A ua malama ia no hoi na kulanakauhale e ae he nui e ko Nepai poe, a keakea aku la ua mau wahi paa nei ia lakou, i hiki ole ai ia lakou ke komo iloko o ka aina e waiho ana imua o makou, e luku mai i ka poe kanaka o ko makou aina.

5. Aka, o kela aina o keia aina a makou i kaalo ai, a i hoakoakoa ole ia mai ka poe kanaka olaila, ua luku ia e ko Lamana poe, a o ko lakou mau kulanakauhale, a me na kauhale, a me na kulanakauhale paa i ka pa, ua puhi ia i ke ahi; a pela i hala aku ai ka makahiki ekolu haneri kanahikukumamaiwa.

6. A eia kekahi, ma ka makahiki ekolu haneri kanawalu, hele hou mai la ko Lamana poe ia makou e kaua, a ku e aku makou ia lakou me ka wiwo ole; aka, ua make hewa nae, no ka mea, no ka nui loa o ko lakou poe, hehi mai la lakou i ka poe kanaka o Nepai malalo iho o ko lakou mau wawae.

7. A eia kekahi, hee hou aku la makou, a o ka poe i mama loa i ka holo mamua o ko Lamana poe, pakele aku la lakou, a o ka poe i mama ole aku i ka holo mamua o ko Lamana poe, ua ulupa ia ilalo a luku ia.

8. Ano hoi, aole au o Moramona, i makemake e hoowalania aku i na naau o na kanaka, ma ka hoike ana imua o lakou i ka ike weliweli o ke koko a me ka luku, me ia i waiho ia mai ai imua o koʻu mau maka, aka, ke ike nei au e hoike oiaio ia aku auanei keia mau mea, a me na mea a pau i huna ia, e hoike ia aku maluna iho o na kua o na hale.

9. A e hiki io aku ana no hoi ka ike no keia mau mea i ke koena o keia poe kanaka, a i ka poe Genetile no hoi, ka poe a ka Haku i olelo mai ai e hoopuehu ae auanei i keia poe kanaka, a e manao ia ua poe kanaka nei me he mea ole la mawaena o lakou, nolaila, ke kakau nei au he mooolelo uuku i hoopokole ia, me ka aa ole nae e kakau iho i ka mooolelo a pau o na mea aʻu i ike ai, no ke kauoha i loaa ai iaʻu, i loaa ole ai no hoi ia oukou ke kaniuhu nui loa no ka hewa o keia poe kanaka.

10. Ano hoi, o keia kaʻu e olelo aku nei i ka lakou poe hua, a i ka poe Genetile no hoi, ka poe e manao ana no ko ka hale o Iseraela, e hoomaopopo ana a e ike ana i kahi a ko lakou mau mea pomaikai e hele mai ai.

11. No ka mea hoi, ua ike au o ka poe me neia e kaniuhu lakou no ka poino o ko ka hale o Iseraela; he oiaio, e kaniuhu lakou no ka luku ia ana o keia poe kanaka; e kaniuhu lakou no ka mihi ole ana o keia poe kanaka, i hiki ke apo ia mai ai lakou nei iloko o na lima o Iesu.

12. Ano, ua palapala ia aku ua mau mea nei i ke koena o ko ka hale o Iakoba; a ua palapala ia aku mamuli o keia ano, no ka mea, ua ike ia e ke Akua aole e hoopuka ae ka hewa ia mau mea ia lakou la; a e huna ia iho ia mau mea i ka Haku, i hiki ai ia mau mea ke puka ae ma kona manawa ku pono.

13. A oia no ke kauoha i loaa ai iaʻu; a, aia hoi, e puka mai no ia mau mea mamuli o ke kauoha a ka Haku, ia ia e ike ai he pono, ma kona naauao.

14. A, aia hoi, e hele aku no ia mau mea i ka poe hoomaloka la o ka poe Iudaio; a no keia kumu e hele aku auanei ia mau mea; i hoohuli ia ai lakou e manaoio o Iesu no ke Kristo, ke Keiki a ke Akua ola; i hooko mai ai ka Makua, ma o kona mea la i aloha loa ai, i kona manao nui a mau loa, ma ka hoihoi hou ana i ka poe Iudaio, oia hoi i ko ka hale o Iseraela a pau, i ko lakou aina hooilina, a ka Haku ko lakou Akua i haawi mai ai ia lakou, i ka hooko ana i kana berita.

15. A i manaoio loa ai no hoi ka poe hua a keia poe kanaka i kona euanelio, ka mea e hele mai ana ia lakou mai ka poe Genetile mai; no ka mea, e hoopuehu ia aku keia poe kanaka, a e lilo auanei i lahuikanaka haulaula, ekaeka, a e hoopailua ia, e oi aku ana mamua o ke ano o ka mea i ike ia ai mawaena o makou maimua loa mai; he oiaio, mamua o ka mea i ike ia ai mawaena o ko Lamana poe; a o keia no ko lakou hoomaloka a hoomanakii.

16. No ka mea hoi, o ka Uhane o ka Haku ua oki kona paio ana i keia manawa me ko lakou poe kupuna, a aia no lakou aole o Kristo a me ke Akua me lakou ma ke ao nei, a ua lauwili ia lakou i o a ia nei e like me ka opala imua o ka makani.

17. He lahuikanaka lakou e olioli ai i kekahi manawa, a ia lakou o Kristo i Kahuhipa no lakou; he oiaio, ua alakai ia lakou e ke Akua, ka Makua.

18. Aka, ano hoi, ua alakai ia aku lakou i o a ia nei e Satana, e like me ka opala i puhi ia imua o ka makani, a me he moku la i aleale ia i o a ia nei maluna iho o na ale, me ka pea a heleuma ole, a i ole ia, me kekahi mea ole e hookele ai ia ia; a e like me ua moku nei, pela no hoi lakou.

19. A, aia hoi, ua hookaawale ka Haku i na mea e pomaikai ai lakou, na mea a lakou i hiki ai ke loaa ma ka aina, no ka poe Genetile, ka poe e loaa ai auanei ka aina.

20. Aka hoi, e hiki mai auanei keia, e hoa ia aku a e hoopuehu ia aku lakou e ka poe Genetile; a mahope iho o ko lakou hoa ia ana a hoopuehu ia ana e ka poe Genetile, aia hoi, alaila e hoomanao no ka Haku i ka berita ana i hana mai ai ia Aberahama, a iko ka hale o Iseraela a pau.

21. A e hoomanao no hoi ka Haku i na pule a ka poe pono, i pule ia aku ai ia ia no lakou nei.

22. Alaila, e ka poe Genetile e, pehea la e hiki ai ia oukou ke ku imua o ka mana o ke Akua, ke ole oukou e mihi a e huli mai, mai ko oukou mau aoao ino mai!

23. Aole anei oukou i ike aia no oukou ma na lima o ke Akua? Aole anei oukou i ike aia no ia ia ka mana a pau, a ma kana kauoha nui e owili ia auanei ka honua nei me he pepa la?

24. Nolaila, ea, e mihi oukou, a e hoohaahaa ia oukou iho imua ona, o puka mai auanei oia ma ka hoopai ia oukou; o hele ae auanei he koena o ka poe mamo a Iakoba mawaena o oukou me he liona la, a e haehae liilii ia oukou, a, aole mea e hoopakele ai.