1. Aia hoi, owau, o Moroni, ke hoopau nei i ka mooolelo a koʻu makuakane o Moramona. Aia hoi, he mau mea kakaikahi wale no kaʻu e palapala ai, a o ua mau mea nei kaʻu i kauoha ia mai ai e koʻu makuakane.

2. Ano, eia kekahi, mahope iho o ke kaua nui a weliweli ma Kumora, ua imi ia ko Nepai poe, ka poe i pakele aku iloko o ka aina hema, e ko Lamana poe, a pau loa ae la lakou i ka luku ia;

3. A ua pepehi ia no hoi koʻu makuakane e lakou; a owau hoi, ke koe wale nei no e kakau i ka mooolelo kaumaha no ka luku ia ana o koʻu poe kanaka. Aka hoi, ua hala aku la lakou, a ke hooko nei au i ke kauoha a koʻu makuakane. A ina paha e pepehi mai lakou iaʻu, aole au i ike;

4. Nolaila, e kakau iho no au a e huna iho i na mooolelo iloko o ka honua, a ma kahi aʻu e hele aku ai he mea ole ia.

5. Aia hoi, ua hana iho koʻu makuakane i keia mooolelo, na kakau oia i ke kumu o ia mea. A, aia hoi, e kakau no au ia mea no hoi, ina he wahi kaawale koʻu ma na papa; aka, aole pela; a ua nele au i na pohaku metala ole, no ka mea, owau wale iho la no; ua pepehi ia koʻu makuakane ma ke kaua, a me koʻu poe hanauna a pau, a, aole oʻu makamaka aohe hoi kahi e hele aku ai; a o ka loihi o ka ka Haku ae ana iaʻu e ola, aole au i ike.

6. Aia hoi, ua hala aku la eha haneri makahiki mai ka hiki ana mai o ko kakou Haku a Mea e Ola ai.

7. A, aia hoi, ua imi ae la ko Lamana poe i koʻu poe kanaka, i ko Nepai, ia kulanakauhale aku ia kulanakauhale aku, a ia wahi aku ia wahi aku, a pau loa ae la lakou; a nui ko lakou haule ana; he oiaio, he nui a he kupanaha hoi ka luku ia ana o koʻu poe kanaka, ko Nepai poe.

8. A, aia hoi, o ka lima o ka Haku nana ia mea i hana. A, eia hoi kekahi, ke kaua pu nei ko Lamana poe kekahi me kekahi; a ma ka ili a pau o keia aina e kaa mau ana ka pepehi kanaka a me ka hookahe koko; aole kekahi mea i ike i ka hope o ke kaua.

9. Ano hoi, aole au e olelo hou no lakou, no ka mea, aohe kekahi mea, ke ole ko Lamana poe a me ka poe powa, e ola nei maluna iho o ka ili o ka aina;

10. Aohe kekahi mea i ike i ke Akua oiaio, koe wale no na haumana a Iesu, ka poe i noho ma ka aina a hiki i ka wa i nui loa ai ka hewa o na kanaka, i ae ole ai ka Haku ia lakou e noho me na kanaka; a ina paha lakou maluna iho o ka ili o ka aina, aole kekahi kanaka i ike.

11. Aka hoi, ua ike maua me koʻu makuakane ia lakou, a ua lawelawe mai la lakou ia maua.

12. A o ka mea e loaa ana keia mooolelo, a e hoohewa ole iho ia mea no na mea hemahema iloko o ia mea, oia ke ike auanei i na mea nui aku i keia mau mea. Aia hoi, owau no o Moroni; a ina ua hiki, ina e hoike aku au i na mea a pau ia oukou.

13. Aia hoi, ke hoopau nei au i kaʻu olelo ana no keia poe kanaka. Owau no ke keiki a Moramona, a he mamo koʻu makuakane na Nepai;

14. A owau no hoi ka mea nana e huna iho i keia mooolelo i ka Haku; a he mea waiwai ole na papa o ia mea, no ke kauoha a ka Haku. No ka mea, ua olelo oiaio oia, aole e loaa i kekahi mea ia mau mea e loaa ai ka waiwai; aka, o ka mooolelo maluna iho o ia mau mea he mea maikai loa ia; a o ka mea nana e hoopuka mai ia mea i ka malamalama, ia ia ka Haku e hoopomaikai ai.

15. No ka mea, e hiki ole i kekahi mea ke loaa ka mana e hoopuka mai ia mea i ka malamalama, ke ole e haawi ia mai ia ia e ke Akua; no ka mea, e makemake ana ke Akua e hana ia auanei ia mea me ka manao i kona hoonani ia wale no, a i ka pomaikai o ka poe kanaka berita kahiko, i hoopuehu loihi ia o ka Haku.

16. A pomaikai oia ka mea e hoopuka mai auanei i keia mea i ka malamalama; no ka mea, e hoopuka ia mai auanei ia noloko mai o ka pouli i ka malamalama, e like me ka olelo a ke Akua; he oiaio, e hoopuka ia mai auanei ia mea noloko mai o ka honua, a e alohi mai auanei noloko mai o ka pouli, a hiki i ka ike o na kanaka; a e hana ia auanei ia mea ma ka mana o ke Akua;

17. A ina he mau hemahema kekahi, he mau hemahema ia mau mea no ke kanaka. Aka hoi, aole makou i ike i kekahi hemahema. Ua ike nae ke Akua i na mea a pau; nolaila, o ka mea e hoohewa mai ana, e makaala oia o lilo auanei oia i ke ahi o gehena.

18. A o ka mea e olelo ana, E hoike mai iaʻu, a i ole, e hahau ia oe; e makaala oia o kena aku oia i ka mea i papa ia e ka Haku.

19. No ka mea, o ka mea e hoohewa wikiwiki aku ana, e hoohewa wikiwiki hou ia mai auanei oia; no ka mea, e like me kana mau hana, pela auanei kona uku; nolaila, o ka mea e hahau aku ana, e hahau hou ia mai auanei oia e ka Haku.

20. E nana i ka mea a ka palapala hemolele i olelo mai ai: Mai hahau ke kanaka, a mai hoohewa aku no hoi; no ka mea, naʻu no ka hoohewa ana, wahi a ka Haku; a naʻu no hoi ka hoopai ana, a naʻu no e uku aku.

21. A o ka mea e ha aku ana i ka inaina a me na paio e ku e i ka hana a ka Haku, a e ku e i ka poe kanaka berita a ka Haku, no ko ka hale o Iseraela, a e olelo ae auanei: E hoopau aku no makou i ka hana a ka Haku, a e hoomanao ole ka Haku i kana berita ana i hana ai i ko ka hale o Iseraela, oia ke hookokoke ana e kua ia ilalo a e hoolei ia aku iloko o ke ahi;

22. No ka mea, e olokaa aku no na manao paa mau loa o ka Haku, a hiki i ka hooko ia ana o kana mau olelo hoopomaikai a pau.

23. E imi iho i na wanana a Isaia. Aia hoi, aole hiki iaʻu ke kakau iho ia mau mea. He oiaio, aia hoi, ke i aku nei au ia oukou, o kela poe hoano, ka poe i hala aku la mamua oʻu, ka poe i noho ma keia aina, e hea aku auanei lakou; he oiaio, mai ka lepo ae lakou e hea aku ai i ka Haku; a me ke ola o ka Haku, e hoomanao no oia i ka berita ana i hana ai me lakou.

24. A ua ike oia i ka lakou mau pule, i pule ia aku no ko lakou poe hoahanau. A ua ike oia i ko lakou manaoio; no ka mea, ma kona inoa ua hiki ia lakou ke hooneenee aku i na mauna; a ma kona inoa ua hiki ia lakou ke hoohaalulu i ka honua; a ma ka mana o kana olelo ua hoohiolo aku lakou i na halepaahao i ka honua; he oiaio, aole i hiki i ka umu ahi ke hoeha ia lakou; aole hoi i na holoholona hihiu, aole hoi i na nahesa niho awa, no ka mana o kana olelo.

25. A, aia hoi, ua pule aku la lakou nona, no ka mea a ka Haku e hookuu mai ai e hoopuka mai i keia mau mea.

26. A he mea e pono ole ai no kekahi e olelo ae, aole e puka mai ana ia mau mea, no ka mea, e puka io mai no auanei ia mau mea, no ka mea, ua olelo mai ka Haku ia mea; no ka mea, noloko mai o ka honua e puka mai ai auanei ia mau mea, ma o ka lima la o ka Haku, a ua hiki ole i kekahi ke alalai ia mea; a e puka mai no ia mea ma kekahi la i ka wa e olelo ia ana, ua hoopau ia ae la na hana mana; a e puka mai auanei no ia mea me he mea la e olelo ana kekahi mea mai ka make mai.

27. A e puka mai no ia mea ma kekahi la i ka wa a ke koko o na mea hoano e hea aku ai i ka Haku, no na huipu malu ana a me na hana a ka pouli;

28. He oiaio, e puka mai no ia mea ma kekahi la i ka wa e hoole ia mai ai ka mana o ke Akua, a e hoohaumia ia ai na ekalesia, a e hookiekie ia ai ma ka haaheo o ko lakou mau naau; he oia¬io, ma kekahi la i ka wa a na luna o na ekalesia, a me na kumu, e hookiekie ia ae ai ma ka haaheo o ko lakou mau naau, ma ka paonioni ana i ka poe i komo iloko o ko lakou mau ekalesia;

29. He oiaio, e puka mai no ia ma kekahi la i ka wa o lohe ia ai no na ahi, a me na makani ino, a me na mahu o ka uahi ma na aina e;

30. A e lohe ia no hoi no na kaua, a me na lono o na kaua, a me na olai i kela wahi keia wahi;

31. He oiaio, e puka mai no ia ma kekahi la, i ka wa e nui ana na mea haumia maluna iho o ka ili o ka honua; a o na pepehi kanaka kekahi, a me ka powa ana, a me ka wahahee ana, a me na hoopunipuni ana, a me na moekolohe, a me na ano a pau o na mea hoopailua; i ka wa e olelo ai na mea he nui wale: E hana i kela mea i keia mea, a he mea ole ia, no ka mea, e kokua no ka Haku i na mea me ia ano ma ka la hope. Aka, auwe ka poe o ia ano, no ka mea, aia no lakou iloko o ke au awaawa, a me na mea paa o ka hewa.

32. He oiaio, e puka mai no ia ma kekahi la, i ka wa i kukulu ia ai na ekalesia e olelo ae ana: E hele mai ioʻu nei, a e kala ia ko oukou mau hala no ko oukou kala.

33. E ka poe kanaka hewa, kekee, a ai oolea, no ke aha la oukou i kukulu ai i na ekalesia no oukou iho e loaa ai ka waiwai? No ke aha la oukou i hoano e ai i ka olelo hemolele a ke Akua, i lawe ai oukou i ka hoohewa ia ana maluna iho o ko oukou mau uhane? Aia hoi, e nana oukou i na hoike ana a ke Akua. No ka mea hoi, ke hele mai la ka manawa, a ma ia la e hooko ia ai keia mau mea a pau.

34. Aia hoi, ua hoike mai la ka Haku iaʻu i na mea nui a kupanaha no na mea e hiki koke mai ana ma ia la, i ka wa o keia mau mea e puka mai ai mawaena o oukou.

35. Aia hoi, ke olelo aku nei au ia oukou me he mea la eia oukou maanei, aole nae pela. Aka hoi, ua hoike mai la o Iesu Kristo ia oukou iaʻu nei, a ua ike au i ko oukou hana ana;

36. A ua ike au ke hele la oukou ma ka haaheo o ko oukou mau naau; a, aohe mea, koe he kakaikahi wale no, i hookiekie ole ai ia lakou iho maluna ma ka haaheo o ko lakou mau naau, ma ke komo ana i ka lole nani loa, ma ka paonioni ana, a me na paio, a me ka lokoino, a me na hoomaau ana, a me na ano a pau o na hewa; a o ko oukou mau ekalesia, he oiaio, o lakou a pau, ua lilo i haumia no ka haaheo o ko oukou mau naau.

37. No ka mea hoi, ke aloha nui nei oukou i ke kala, a me ko oukou waiwai, a me ko oukou lole nani, a me ka hoonani ana i ko oukou mau hale pule, mamua o ko oukou aloha i ka poe hu¬ne a me ka poe nele, i ka poe mai a me ka poe pilikia.

38. E ka poe haumia, ka poe hookamani, ka poe kumu, ka poe e kuai ana ia oukou iho no ka mea e ino ana, no ke aha la oukou i hoohaumia ai i ka ekalesia hemolele o ke Akua? No ke aha la oukou i hilahila ai e lawe maluna iho o oukou i ka inoa o Kristo? No ke aha la oukou, no ka mahalo ana o ko ke ao nei, i manao ai aole e oi aku ana ka nani o ka pomaikai pau ole, mamua o kela poino e make ole ana?

39. No ke aha la oukou e hoonani iho ai ia oukou iho me ka mea aole ona ola, a e ae aku nae i ka poe pololi, a me ka poe nele, a me ka poe kapa ole, a me ka poe mai, a me ka poe pilikia, e maalo ae ma o oukou la, a hoomaopopo ole aku ia lakou?

40. He oiaio, no ke aha la oukou e kukulu iho ai i ko oukou mau mea ino malu, e loaa ai ka waiwai, a hoouwe ai i na wahinekanemake imua o ka Haku, a me na keiki makua ole hoi e uwe ai imua o ka Haku; a me ke koko no hoi o ko lakou mau makuakane, a me ka lakou mau kane, e hea aku ai i ka Haku mai ka lepo ae, no ka hoopai maluna iho o ko oukou mau poo?

41. Aia hoi ke kau ae la ka pahikaua o ka hoopai maluna ae o oukou; a e hiki koke mai ana ka manawa ana e hoopai iho ai i ke koko o ka poe hoano maluna iho o oukou, no ka mea, aole oia e hoomanawanui hou aku i ko lakou hea ana.