1. A eia kekahi, ma ua makahiki hookahi la, hoomaka ae la ke kaua hou mawaena o ko Nepai poe a me ko Lamana poe. A ua opiopio au, aka, nunui nae koʻu kino, nolaila, hoonoho mai la ka poe kanaka o Nepai iaʻu, i luna no lakou, a i alihi kaua o ko lakou poe kaua.

2. Nolaila, ma ka umikumamaono makahiki oʻu, hele aku la au ma ke alo o kekahi poe kaua o ko Nepai poe, e ku e aku i ko Lamana poe; nolaila, ua hala aku la na makahiki ekolu haneri iwakaluakumamaono.

3. A eia kekahi, ma ka makahiki ekolu haneri iwakaluakumamahiku, hele mai la ko Lamana poe io makou nei me ka ikaika nui loa, a hooweliweli mai la lakou i ka poe kaua oʻu; nolaila, aole lakou e kaua aku, a hoomaka ae la lakou e auhee aku i na aina akau.

4. A eia kekahi, hiki aku la makou i ke kulanakauhale o Anagola, a komo aku la makou iloko o ke kulanakauhale, a hoomakaukau iho la e hoomalu ia makou iho i ko Lamana poe. A eia kekahi, hana paa iho la makou i ke kulanakauhale me ko makou ikaika; aka, me na hana paa a pau a makou, hele mai la no nae ko Lamana poe maluna iho o makou, a hooauhee mai la ia makou mailoko aku o ke kulanakauhale.

5. A hooauhee mai la no hoi lakou ia makou mailoko aku o ka aina o Davida.

6. A hele aku la makou a hiki aku la i ka aina o Iosua, ma na mokuna komohana, ma ke kahakai.

7. A eia kekahi, houluulu mai la makou i ko makou poe kanaka me ka hiki wawe i hiki ai, i hiki ia makou ke hoakoakoa ia lakou i kahi hookahi.

8. Aka hoi, ua piha ka aina i na powa a me ko Lamana poe; a oiai ka luku nui e kau ana maluna ae o koʻu poe kanaka, aole nae lakou i mihi i ka lakou mau hana ino, nolaila, ua laha aku ke koko a me ka luku maluna o ka ili a pau o ka aina, ma ka aoao o ko Nepai poe, a me ka aoao o ko Lamana poe no hoi; a he hookahuli loa mawaena o ka aina a pau.

9. Ano, he alii ko ko Lamana poe, a o Aarona kona inoa; a hele mai la oia e ku e mai ia makou me ka poe kaua he kanahakumamaha tausani. A ku e aku la au ia ia me hookahi kanaha a me kumamalua tausani. A eia kekahi, lanakila ae la au maluna iho ona me koʻu poe kaua, a hee aku la kela imua oʻu. Aia hoi, ua hana ia keia a pau, a ua hala aku la ekolu haneri a me kanakolu makahiki.

10. A eia kekahi, hoomaka ae la ko Nepai poe e mihi i ko lakou hewa, a hoomaka ae la e kahea aku e like me ia i wanana ia ai e Samuela, ke kaula; no ka mea hoi, aole kanaka i hiki ke hoopaa i ka mea nona ponoi, no na aihue, a me na powa, a me na mea pepehi kanaka, a me ka hana uhane hoopunipuni, a me ka anaana ma ka aina.

11. Pela i hoomaka ai ka uwe ana a me ke kanikau ana ma ka aina a pau, no keia mau mea; a ua nui loa aku mawaena o ka poe kanaka o Nepai.

12. A eia kekahi, i ka wa aʻu, a Moramona, i ike ai i ko lakou kanikau ana, a me ko lakou uwe ana, a me ko lakou kaumaha imua o ka Haku, hoomaka ae la kuu naau e hauoli iloko oʻu, i ka ike ana i na lokomaikai a me ke ahonui o ka Haku, nolaila, e manao ana no ia mea, e aloha mai no oia ia lakou, i lilo hou ai lakou i lahuikanaka pono.

13. Aka hoi, ua makehewa ua hauoli nei oʻu, no ka mea, o ko lakou kaniuhu ana aole ia i ka mihi, no ka lokomaikai o ke Akua, aka, o ke kaniuhu ana ia o ka poe i hoohewa ia, no ka ae mau ole mai o ka Haku ia lakou e loaa ka olioli ma ka hewa.

14. A, aole lakou i hele mai io Iesu la me na naau pepe a me na uhane mihi, aka, hoino aku la lakou i ke Akua, a ake ae la e make. Aka e aumeume no nae lakou me ka pahikaua no ko lakou mau ola.

15. A eia kekahi, hoi hou mai la koʻu kaumaha ioʻu nei, a ike iho la au ua hala ka la lokomaikai no lakou, ma ko ke kino a ma ko ka uhane no hoi, no ka mea, ike aku la au i na tausani o lakou i kua ia ilalo ma ke kipi akea ana i ko lakou Akua, a hoahu ia me he lepo la maluna o ka ili o ka aina. A pela i hala aku ai ekolu haneri makahiki a me kanahakumamaha.

16. A eia kekahi, ma ka makahiki ekolu haneri kanahakumamalima, hoomaka ae la ko Nepai poe e hee aku imua o ko Lamana poe, a ua alualu ia lakou a hiki wale aku lakou i ka aina o Iasona, mamua o ka hiki ana ke kaohi ia lakou i ko lakou hee ana.

17. A ua kokoke ke kulanakauhale o Iasona i ka aina, kahi a Amarona i waiho iho ai i na mooolelo no ka Haku, i ole ai e hoopau ia ia mau mea. A, aia hoi, ua hele aku au e like me ka olelo a Amarona, a lawe mai la i na papa a Nepai, a kakau iho la i mooolelo e like me na olelo a Amarona.

18. A kakau iho la au i mooolelo piha maluna iho o na papa a Nepai no ka hewa a me na mea ino a pau; aka, maluna iho o keia mau papa aole au i kakau i mooolelo nui o ko lakou hewa a me na mea ino, no ka mea, e mau loa ana ka hewa a me na mea ino imua o koʻu mau maka mai kuu wa i hiki ai ke nana i na aoao o kanaka.

19. A auwe au, no ko lakou hewa, no ka mea, ua hoopiha ia kuu naau me ke kaumaha no ko lakou hewa, i koʻu mau la a pau; aka hoi, ua ike au e hookiekie ia auanei au iluna ma ka la hope.

20. A eia kekahi, ma ua makahiki nei ua imi hou ia ka poe kanaka o Nepai, a hooauhee ia aku. A ua hooauhee ia aku makou a hiki wale aku makou i ka akau, i ka aina i kapa ia o Sema.

21. A eia kekahi, hana paa iho la makou i ke kulanakauhale o Sema, a hoakoakoa mai la makou i ko makou poe kanaka, i ka poe a pau i hiki, i hoopakele paha makou ia lakou mai ka luku ia ana.

22. A ma ka makahiki ekolu haneri kanahakumamaono, hoomaka ae la lakou e hele hou mai maluna iho o makou.

23. A eia kekahi, olelo aku la au i koʻu poe kanaka, a kauleo aku la ia lakou me ka ikaika nui, e ku wiwo ole imua o ko Lamana poe a e kaua aku no ka lakou mau wahine, a me ka lakou mau keiki, a me ko lakou mau hale, a me ko lakou mau wahi i noho ai.

24. A hooeueu ae la kaʻu mau olelo ia lakou i ka ikaika ma kekahi mau mea, a hee ole aku la lakou imua o ko Lamana poe, aka, ku iho la me ka wiwo ole e ku e aku ia lakou.

25. A kaua aku la makou me ka poe koa he kanakolu tausani e ku e aku ana i ka puali koa he kanalima tausani. A kupaa iho la makou imua o lakou me ka naueue ole, a hee aku la lakou imua o makou.

26. A eia kekahi, ia lakou i hee aku ai, alualu aku la makou ia lakou me na puali kaua o makou, a hoouka hou ae la ia lakou, a lanakila ae la maluna iho o lakou; aka hoi, aole me makou pu ka ikaika o ka Haku; he oiaio, ua waiho ia mai makou ia makou wale iho, i noho pu ole ai ka Uhane o ka Haku iloko o makou, nolaila, ua lilo iho la makou i poe nawaliwali, e like me ko makou poe hoahanau.

27. A kaniuhu iho la kuu naau no keia poino nui o koʻu poe kanaka; no ko lakou hewa a me ko lakou mau mea ino. Aka hoi, hele aku la makou e ku e aku i ko Lamana poe, a me ka poe powa o Gadianatona, a hiki aku i ka wa i loaa hou ai ia makou na aina o ko makou hooilina.

28. A ua hala aku la ka makahiki ekolu haneri a me kanahakumamaiwa. A ma ka makahiki ekolu haneri a me kanalima, hana iho la makou i ke kuikahi me ko Lamana poe a me ka poe powa o Gadianatona, maloko o ia mea ua mahele ia ko makou mau aina hooilina.

29. A haawi mai la ko Lamana poe i ka aina akau ia makou; he oiaio, a hiki wale aku i ka puali ololi e hiki aku ana iloko o ka aina hema. A haawi aku la makou i ko Lamana poe i ka aina hema a pau.