1. Ano, eia kekahi, ma ka makahiki ekolu haneri a me kanaonokumamakolu, pii aku la ko Nepai poe me ka poe kaua o lakou e kaua aku i ko Lamana poe mawaho o ka aina Neoneo.

2. A ua hooauhee hou ia aku na puali kaua o ko Nepai poe ihope i ka aina Neoneo. A oiai lakou i maloeloe, hele mai la he poe kaua hou o ko Lamana poe maluna iho o lakou; a ua kaua hahana iho la lakou, a loaa iho la i ko Lamana poe ke kulanakauhale Neoneo, a luku iho la i na mea he nui wale o ko Nepai poe, a lawe pio ae la i na mea he nui;

3. A hee aku la ke koena a hui iho la me ka poe i noho ma ke kulanakauhale o Teanakuma. Ano, e waiho ana ke kulanakauhale o Teanakuma ma na mokuna ma ke kahakai; a ua kokoke no hoi ia i ke kulanakauhale Neoneo.

4. A no ka pii ana aku o na puali kaua o ko Nepai poe i ko Lamana poe la, ka hoomaka ana o lakou e hahau ia; no ka mea, ina aole ia mea, ina ua hiki ole i ko Lamana poe ke loaa ka mana maluna o lakou.

5. Aka hoi, e loaa auanei ka poe hewa i na hoopai o ke Akua; a ma o ka poe hewa la, i hoopai ia aku ai ka poe hewa; no ka mea, na ka poe hewa no i hooeueu ae i na naau o na keiki a kanaka i ka hookahe koko ana.

6. A eia kekahi, hoomakaukau iho la ko Lamana poe e hele mai e ku e i ke kulanakauhale o Teanakuma.

7. A eia kekahi, ma ka makahiki ekolu haneri a me kanaonokumamaha, hele mai la ko Lamana poe e ku e mai i ke kulanakauhale o Teanakuma, i hiki ia lakou ke loaa ke kulanakauhale o Teanakuma no hoi.

8. A ua kipaku ia aku lakou a hooauhee ia aku e ko Nepai poe. A i ka wa a ko Nepai poe i ike ai ua hooauhee aku lakou i ko Lamana poe, kaena hou aku la lakou no ko lakou ikaika; a hele aku la lakou ma ko lakou ikaika iho, a loaa hou iho la ke kulanakauhale Neoneo.

9. Ano, ua hana ia keia mau mea a pau, a he nui na tausani i luku ia ma na aoao elua, o ko Nepai poe a me ko Lamana poe no hoi.

10. A eia kekahi, ua hala aku la ka makahiki ekolu haneri kanaonokumamaono, a hele hou mai la ko Lamana poe i ko Nepai poe e kaua; aole nae ko Nepai poe i mihi i ka ino a lakou i hana ai, aka, hoopaakiki mau iho la ma ko lakou hewa.

11. A ua hiki ole i ke alelo ke hai aku, aole hoi i ke kanaka ke kakau, i ka mooolelo a pau loa o ka mea weliweli o ke koko a me ka luku mawaena o na kanaka, o ko Nepai poe a me ko Lamana poe no hoi; a ua hoopaakiki ia iho kela naau keia naau, a lealea iho la lakou ma ka hookahe mau ana i ke koko.

12. Aole loa he hewa nui mamua mawaena o ka poe mamo a Lehi, aole no hoi mawaena o ko ka hale a pau o Iseraela, e like me na olelo a ka Haku, me keia mawaena o keia poe kanaka.

13. A eia kekahi, loaa iho la i ko Lamana poe ke kulanakauhale Neoneo, a o keia mea no ka nui loa aku o ko lakou poe mamua o ko ko Nepai poe.

14. A hele ae la no hoi lakou e ku e i ke kulanakauhale o Teanakuma, a hooauhee ae la i ka poe mailoko aku ona, a lawe ae la i na pio he nui, o na wahine a me na keiki no hoi, a kaumaha aku la ia lakou i mau mohai i ko lakou mau akua kii.

15. A eia kekahi, ma ka makahiki ekolu haneri a me kanaonokumamahiku, ua huhu ko Nepai poe no ka mohai ana o ko Lamana poe i ko lakou poe wahine a me ka lakou poe keiki, a hele aku la lakou e ku e aku i ko Lamana poe me ka inaina nui, a lanakila hou ae la lakou maluna iho o ko Lamana poe, a hooauhee ae la ia lakou mailoko aku o ko lakou mau aina;

16. A aole no i hele hou mai ko Lamana poe e ku e i ko Nepai poe, a hiki wale aku i ka makahiki ekolu haneri a me kanahikukumamalima.

17. A ma ua makahiki nei iho mai la lakou e ku e i ko Nepai poe me ka lakou ikaika a pau; a ua helu ole ia lakou no ka nui loa o lakou.

18. A ma ia hope aku aole i loaa hou i ko Nepai poe ka mana maluna o ko Lamana poe, aka hoomaka ae la e kahili ia ae e lakou e like me ka hau imua o ka la.

19. A iho mai la ko Lamana poe e ku e i ke kulanakauhale Neoneo; a ua kaua ia he kaua ino nui loa ma ka aina Neoneo, a ua lanakila ae la lakou ma ua kaua nei maluna o ko Nepai poe.

20. A hee hou aku la lakou imua o lakou la, a hiki aku la lakou i ke kulanakauhale o Boaza; a malaila lakou i ku ai e ku e i ko Lamana poe me ka wiwo ole nui, a lanakila ole ko Lamana poe maluna iho o lakou a hiki i ka lua o ka manawa a lakou i hele mai ai.

21. A ia lakou i hiki mai ai i ka lua o ka manawa, ua hooauhee ia aku a luku ia ko Nepai poe me ka luku nui loa; a o ka lakou poe wahine a me ka lakou poe keiki ua mohai hou ia aku i na akua kii.

22. A eia kekahi, hee hou ae la ko Nepai poe imua o lakou la, me ka lawe pu i na kanaka a pau me lakou, oloko iho o na kulanakauhale a me na kauhale no hoi.

23. Ano, o Moramona wau, i koʻu ike ana, ua aneane ko Lamana poe e lanakila maluna iho o ka aina, nolaila, hele aku la au i ka puu Sima, a lawe ae la i na mooolelo a pau a Amarona i huna iho ai i ka Haku.