1. Ano, ke hoopau nei au i kuu mooolelo no ka luku ia ana o koʻu poe kanaka, ko Nepai poe. A eia kekahi, hele aku la makou imua o ko Lamana poe.

2. A palapala iho la wau, o Moramona, i episetole i ke alii o ko Lamana poe, a noi aku la ia ia e ae mai oia ia makou i houluulu ai makou i ko makou poe kanaka i ka aina o Kumora, ma kahi puu i kapa ia o Kumora, a malaila makou e kaua aku ai ia lakou.

3. A eia kekahi, ae mai la ke alii o ko Lamana poe iaʻu i ka mea aʻu i noi aku ai.

4. A hele aku la makou i ka aina o Kumora, a kukulu iho la makou i ko makou mau halelewa a puni ka puu Kumora; a ma kahi aina ia o na wai, na kahawai a me na punawai he nui; a maanei makou i manaolana ai e loaa ka lanakila maluna iho o ko Lamana poe.

5. A i ka wa i hala aku ai na makahiki ekolu haneri kanawalukumamaha, ua houluulu mai makou i ke koena a pau o ko makou poe kanaka i ka aina Kumora.

6. A eia kekahi, ia makou i houluulu mai ai i ko makou poe kanaka a pau ma kahi hookahi, i ka aina o Kumora, aia hoi, e elemakule ana owau, o Moramona; a i koʻu ike ana o ke aumeume hope ana keia o koʻu poe kanaka, a ua kauoha ia mai au e ka Hanu e ae ole aku i na mooolelo i haawi ia mai ai e ko makou poe kupuna, na mea i laa, e haule iho iloko o na lima o ko Lamana poe, (no ka mea, e hoopau no ko Lamana poe ia mau mea,) nolaila, kakau iho la au i keia mooolelo noloko mai o na papa a Nepai, a huna iho la iloko o ka puu Kumora, i na mooolelo i waiho ia mai ai iaʻu ma ka lima o ka Haku, koe nae keia mau papa aʻu i haawi aku ai i kaʻu keiki Moroni.

7. A eia kekahi, ike aku la koʻu poe kanaka, me ka lakou poe wahine a me ka lakou poe keiki, i na puali kaua o ko Lamana e hele mai ana io lakou nei; a me kela makau weliweli o ka make e hoopiha ana i na naau o ka poe hewa a pau, i kakali ai lakou e hoouka aku ia lakou la.

8. A hele mai la lakou e kaua mai ia makou, a ua hoopiha ia kela mea keia mea me ka weliweli, no ka lehulehu loa o lakou.

9. A eia kekahi, lele mai la lakou maluna iho o koʻu poe kanaka me ka pahikaua, a me ke kakaka, a me ka pua, a me ke koi lipi, a me na ano a pau o na mea kaua.

10. A ua kua ia koʻu poe kanaka ilalo, he oiaio, o koʻu umi tausani ka poe pu me au, a hina iho au iwaena konu me ka eha; a maalo ae la lakou iaʻu, a aole lakou i hoopau mai i kuu ola.

11. A ia lakou i hele ai mawaena a kua iho la i koʻu poe kanaka a pau ilalo, koe wale no he iwakaluakumamaha o makou, (a o kaʻu keiki Moroni kekahi mawaena o ua poe nei,) a ua ola makou mahope o ka make ana o ko makou poe kanaka, ike aku la makou ia la ae, i ka wa i hoi aku ai ko Lamana poe i ko lakou mau wahi i hoomoana ai, mai ka piko ae o ka puu Kumora, i ka umi tausani o koʻu poe kanaka ka poe i kua ia ilalo, i alakai ia aku ma ke alo e au;

12. A ike aku la no hoi makou i na tausani he umi o koʻu poe kanaka ka poe i alakai ia aku e kaʻu keiki Moroni.

13. A, aia hoi, ua haule iho la ka umi tausani o Gidigidona, a oia hoi kekahi mawaena konu;

14. A ua haule iho la o Lama me kona umi tausani; a ua haule iho la o Gilegala me kona umi tausani; a ua haule iho la o Limaa me kona umi tausani; ua haule iho la o Ioneama me kona umi tausani; a o Kameniha, a me Moroniha, a o Anationuma, a me Sibaloma, a o Sema, a o Iosa, ua haule iho me ko lakou umi tausani pakahi.

15. A eia kekahi, ua haule iho la na mea e ae he umi ma ka pahikaua, me ko lakou umi tausani pakahi; he oiaio, ua haule iho la koʻu poe kanaka a pau, koe nae ua iwakaluakumamaha la pu me au, a me kekahi poe he uuku no hoi, ka poe i pakele aku la iloko o na aina hema, a me kekahi poe he uuku, ka poe i haalele mai a hele aku la i ka aoao o ko Lamana poe, a o ko lakou io, me na iwi, a me ke koko e wahio la ma ka ili o ka honua, i waiho ia ma na lima o ka poe nana lakou i luku mai, e palaho ma ka aina, a e popopo a e hoi hou i ko lakou makuwahine la, o ka honua.

16. A ua haehae ia koʻu naau me ka eha nui, no ka poe i make o koʻu poe kanaka, a hea ae la au:

17. E ka poe maikai, pehea la i hiki ia oukou ke haalele aku i na aoao o ka Haku! E ka poe maikai, pehea la i hiki ia oukou ke hoomalau i kela Iesu, ka mea i ku me na lima hohola e apo mai ia oukou!

18. Aia hoi ina ua hana ole oukou i keia, ina ua haule ole oukou. Aka hoi, ua haule iho oukou, a ke uwe nei au i ko oukou make ana!

19. E na keikikane a me na kaikamahine maikai, e na makuakane a me na makuwahine, e na kane a me na wahine, e ka poe maikai e, pehea la i hiki ia oukou ke haule iho!

20. Aka hoi, ua hala aku la oukou, a ua hiki ole i ke kaniuhu ana oʻu ke hoihoi hou mai ia oukou;

21. A e hiki koke mai ana ka la e aahu ana ko oukou make i ka make ole, a o keia mau kino e popopo nei ma ka palaho e lilo koke no i mau kino palaho ole; alaila, e ku oukou imua o ka noho hookolokolo o Kristo, e hookolokolo ia e like me ka oukou mau hana; a ina paha he poe pono oukou, alaila, ua pomaikai pu oukou me ko oukou poe kupuna, ka poe i hele e aku mamua o oukou.

22. E! Ina ua mihi e oukou mamua o ka hiki ana o keia luku nui maluna iho o oukou. Aka hoi, ua hele aku oukou, a ke ike la ka Makua, he oiaio, o ka Makua mau loa o ka lani, i ko oukou noho ana; a ke hana la oia me oukou mamuli o kona pololei a me kona aloha.