1. Ano hoi, he makemake koʻu e olelo aku i kekahi mau mea i ke koena o keia poe kanaka, ka poe i hoola ia mai, ina paha e haawi aku ke Akua ia lakou i kaʻu mau olelo, i ike ai lakou no na mea o ko lakou poe kupuna; he oiaio, ke olelo aku nei au ia oukou, e ke koena o ko ka hale a Iseraela; a eia na olelo aʻu e olelo aku nei:

2. E ike oukou no ko ka hale o Iseraela oukou.

3. E ike oukou e hele mai oukou i ka mihi e pono ai, a i ole ia, aole e hiki ke hoola ia oukou.

4. E ike oukou e waiho iho oukou i ko oukou mau mea kaua ilalo e pono ei, a e lealea hou ole aku ma ka hookahe ana i ke koko, a e lalau hou ole aku ia mau mea, ke ole kauoha mai auanei ke Akua ia oukou.

5. E ike oukou e hiki aku oukou i ka ike no ko oukou poe kupuna e pono ai, a e mihi i ko oukou mau hala a me na hewa a pau, a e manaoio ia Iesu Kristo, oia no ke Keiki a ke Akua, a ua pepehi ia oia e ka poe Iudaio, a ma o ka mana la o ka Makua ua ala hou ae, a ma ia mea ua loaa ia ia ka lanakila maluna iho o ka lua kupapau; a iloko ona hoi ua ale ia ka hope awa o ka make.

6. A e lawe mai ana oia i ke alahouana o ka poe make, a ma ia mea e hoola ia ae ai ke kanaka e ku imua o kona noho hookolokolo.

7. A ua lawe mai oia i ka hoolapanai ia ana o ko ke ao nei, a ma ia mea o ka mea i loaa hewa ole imua ona ma ka la hookolokolo, e haawi ia mai ia ia e noho ma ke alo o ke Akua ma kona aupuni, e memele aku i na hoolea pau ole me ka poe mele maluna, i ka Makua, a i ke Keiki, a i ka Uhane Hemolele oia hookahi Akua, a ma ka noho ana o ka pomaikai aole he hopena.

8. Nolaila, e mihi, a e bapetizo ia ma ka inoa o Iesu, a e apo mai i ka euanelio o Kristo, e hoike ia ae auanei imua o oukou, aole ma keia mooolelo wale no, aka, ma ka mooolelo no hoi e hiki mai ana i ka poe Genetile mai ka poe Iudaio ae, a ua mooolelo nei e hiki mai auanei ia mai ka poe Genetile ae ia oukou.

9. No ka mea hoi, ua palapala ia keia i kumu i manaoio ai oukou i kela; a ina e manaoio oukou i kela, e manaoio no oukou i keia no hoi; a ina e manaoio oukou i keia, e ike oukou no ko oukou poe kupuna, a me na hana kupanaha no hoi i hana ia ai ma ka mana o ke Akua mawaena o lakou;

10. A e ike no hoi oukou he koena oukou o ka poe hua a Iakoba; nolaila, ua helu pu ia oukou mawaena o ka poe kanaka o ka berita mua; a ina paha e manaoio aku oukou ia Kristo, a bapetizo ia, me ka wai mamua, alaila, me ke ahi a me ka Uhane Hemolele, me ka hahai ana i ke kumu like o ko kakou Mea e Ola ai, e like me ka me ana i kauoha mai ai ia kakou, alaila, e pono auanei oukou ma ka la hookolokolo. Amene.