1. A eia kekahi, aole ko Lamana poe i hele mai e kaua hou a hala aku la na makahiki hou he umi. A, aia hoi, ua hoohana au i koʻu poe kanaka, ko Nepai poe, ma ka hoomakaukau ana i ko lakou mau aina a me ko lakou mau mea kaua, no ka wa kaua.

2. A eia kekahi, olelo mai la ka Haku iaʻu, i mai la: E hea aku i keia poe kanaka, e mihi oukou, a e hele mai ioʻu nei, a e bapetizo ia oukou, a e kukulu hou iho i koʻu ekalesia, a e hookoe ia auanei oukou.

3. A hea aku la au i keia poe kanaka, aka, ua makehewa, a ua hoomaopopo ole lakou na ka Haku lakou i hookoe mai, a haawi mai la ia lakou i manawa e mihi ai. A, aia hoi, hoopaakiki iho la lakou i ko lakou mau naau e ku e i ka Haku, i ko lakou Akua.

4. A eia kekahi, mahope iho o ka hala ana o keia mau makahiki he umi, oia hoi ke hui ia, ekolu haneri makahiki a me kanaono mai ka hiki ana mai o Kristo, hoouna mai la ke alii o ko Lamana poe i episetole ioʻu nei, e hoike ana ua episetole nei iaʻu e hoomakaukau ana lakou e hele hou mai e kaua mai ia makou.

5. A eia kekahi, kena ae la au i koʻu poe kanaka e hoakoakoa ia lakou iho ma kahi hookahi ma ka aina Neoneo, i kekahi kulanakauhale ma na mokuna, ma ka puali ololi e hiki aku ana iloko o ka aina hema.

6. A malaila makou i hoonoho ai i ko makou poe kaua, i hiki ai ia makou ke hooki i na puali kaua o ko Lamana poe, i loaa ole ai ia lakou kekahi o ko makou mau aina; nolaila, hana paa iho la makou e ku e aku ia lakou me ko makou ikaika a pau.

7. A eia kekahi, ma ka makahiki ekolu haneri kanaonokumamakahi, iho mai la ko Lamana poe i ke kulanakauhale o Neoneo, e kaua ku e mai ia makou; a eia kekahi, ma ua makahiki la, lanakila ae la makou maluna iho o lakou, a hoi hou ae la lakou i ko lakou mau aina iho.

8. A ma ka makahiki ekolu haneri a me kanaonokumamalua, iho hou mai la lakou e kaua. A lanakila hou ae la makou maluna iho o lakou, a luku nui aku la ia lakou, a ua hoolei ia aku ko lakou poe make iloko o ke kai.

9. Ano, no keia mea nui a koʻu poe kanaka, a ko Nepai poe i hana ai, hoomaka ae la lakou e kaena aku ma ko lakou ikaika iho, a hoomaka ae la hoi e hoohiki imua o na lani, e hoopai aku lakou no lakou iho no ke koko o ko lakou poe hoahanau, ka poe i luku ia e ko lakou poe enemi.

10. A hoohiki lakou ma na lani, a ma ka noho alii no hoi o ke Akua, e pii aku lakou e kaua ku e aku i ko lakou poe enemi, a e hooki aku ia lakou mai ka ili aku o ka aina.

11. A eia kekahi, hoole loa aku la wau, o Moramona, ma neia hope iho, e noho alihi kaua a i luna no keia poe kanaka, no ko lakou hewa a ino hoi.

12. Aia hoi, ua alakai ae la au ia lakou, me ko lakou hewa nae, ua alakai au ia lakou i na manawa he nui i ke kaua, a ua aloha aku ia lakou, e like me ke aloha o ke Akua iloko oʻu, me kuu naau a pau; a ua ninini ia iho kuu naau me ka pule i koʻu Akua a pau ae la ka la, no lakou; aka, me ka manaoio ole nae, no ka paakiki o ko lakou mau naau.

13. A pakolu koʻu hoopakele ana ia lakou, mailoko mai o na lima o ko lakou poe enemi, a ua mihi ole lakou i ko lakou mau hewa.

14. A ia lakou i hoohiki ai ma na mea a pau i papa ia mai ia lakou, e ko lakou Haku a me ka Mea e Ola ai o Iesu Kristo, e pii aku i ko lakou poe enemi e kaua, a e hoopai aku lakou no lakou iho no ke koko o ko lakou poe hoahanau, aia hoi, pae mai la ka leo o ka Haku iaʻu, i ka i ana:

15. Naʻu no ka hoopai aku, naʻu no e uku aku; a no ka mihi ole ana o keia poe kanaka mahope iho o koʻu hoopakele ana ia lakou, aia hoi, e hooki ia aku auanei lakou mai ka ili aku o ka honua.

16. A eia kekahi, hoole loa aku la au e pii ku e aku i koʻu poe enemi; a hana iho la no au me ka ka Haku i kauoha mai ai iaʻu; a ku iho la au me he ike maka hana ole la e hoike aku i ko ke ao nei i na mea aʻu i ike ai a i lohe ai, e like me na hoike ana mai o ka Uhane, ka mea i hoike mai ai no na mea e hiki mai ana.

17. Nolaila, ea, ke palapala aku nei au ia oukou, e ka poe Genetile, a ia oukou no hoi, e ko ka hale o Iseraela, i ka wa e hoomaka ai ka hana, e kokoke ana oukou e hoomakaukau e hoi i ka aina o ko oukou hooilina;

18. He oiaio, aia hoi, ke palapala aku nei au i ko na welau a pau o ka honua; he oiaio, ia oukou hoi, e na ohana he umikumamalua o Iseraela, ka poe e hookolokolo ia auanei e like me ka oukou mau hana, e ka poe umikumamalua a Iesu i wae ai e lilo i poe haumana nana ma ka aina o Ierusalema.

19. A ke palapala aku nei no hoi au i ke koena o keia poe kanaka, ka poe e hookolokolo ia auanei no hoi e ka poe umikumamalua a Iesu i wae mai ai ma keia aina; a e hookolokolo ia auanei lakou nei e ka poe umikumamalua e ae a Iesu i wae ai ma ka aina o Ierusalema.

20. A ke hoike mai nei ka Uhane i keia mau mea iaʻu; nolaila, ke palapala aku nei au ia oukou a pau. A no keia kumu ke palapala aku nei au ia oukou a pau. A no keia kumu ke palapala aku nei au ia oukou, i ike ai oukou e ku auanei oukou a pau imua o ka noho hookolokolo o Kristo, he oiaio, o kela mea keia mea e pili ana i ka ohana ano kanaka a pau o Adamu; a e ku auanei oukou e hookolokolo ia no ka oukou mau hana, ina paha he maikai ia mau mea, ina paha he ino;

21. A i manaoio ai no hoi oukou i ka euanelio o Iesu Kristo, ka mea a oukou e loaa ai auanei mawaena o oukou; i loaa ai hoi i ka poe Iudaio, ka poe kanaka berita o ka Haku, he hoike e ae, okoa ka mea a lakou i ike ai a i lohe ai: O Iesu ka mea a lakou i pepehi ai, oia no ke Kristo oiaio, a me ke Akua oiaio;

22. A ke makemake nei au e hiki iaʻu ke hoohuli mai ia oukou a pau, e ko na welau o ka honua, e mihi a e hoomakaukau e ku imua o ka noho hookolokolo o Kristo.