1. A hele mai la no hoi na kaula he nui ma na la o Koma, a wanana mai la no ka luku ia ana o kela poe kanaka nui, ke ole lakou e mihi a huli aku i ka Haku, a e haalele aku i ko lakou mau pepehi kanaka ana a me ka hana hewa.

2. A eia kekahi, ua hoomalau ia ae ka poe kaula e na kanaka, a holo mai la lakou io Koma la no ka maluhia, no ka mea, imi ae la na kanaka e pepehi ia lakou;

3. A wanana mai la lakou ia Koma i na mea he nui; a ua hoopomaikai ia iho la oia ma ke koena a pau o kona mau la.

4. A ola ae la oia a elemakule loa, a hanau ae la o Sibaloma nana; a noho iho la o Sibaloma ma kona hakahaka. A kipi ae la ka hoahanau ponoi o Sibaloma ia ia; a hoomaka ae la kekahi kaua nui loa ma ka aina a pau.

5. A eia kekahi, kena ae la ka hoahanau o Sibaloma e pepehi ia a make na kaula a pau, ka poe i wanana no ka luku ia ana o na kanaka;

6. A he popilikia nui ma ka aina a pau, no ka mea, ua hoike ae la lakou e hiki mai auanei ka poino nui loa aku maluna o ka aina, a maluna iho no hoi o na kanaka, a e nui loa auanei ka luku mawaena o lakou, he mea i ike ole e ia mamua kona like maluna iho o ka ili o ka aina; a e lilo ko lakou mau iwi me he mau puu lepo la maluna iho o ka ili o ka honua, ke ole lakou e mihi i ko lakou hewa.

7. A hoolohe ole aku la lakou i ka leo o ka Haku, no ko lakou mau hui hewa pu ana; nolaila, hoomaka ae la na kaua a me na paio ma ka aina a pau, a me na wi a me na ahulau no hoi, a ua nui loa ka luku ia ana, he mea i ike ole e ia mamua kona like maluna iho o ka ili o ka honua, a hiki mai la keia a pau ma na la o Sibaloma.

8. A hoomaka ae la na kanaka e mihi i ko lakou hewa; a ia lakou i hana ai ia mea, aloha mai la ka Haku ia lakou.

9. A eia kekahi, ua pepehi ia o Sibaloma a make, a lawe ia ae la o Seta iloko o ka noho pio ana; a noho pio iho la oia i kona mau la a pau.

10. A eia kekahi, loaa iho la ia Aha, kana keiki, ke aupuni; a noho alii iho la oia maluna o ka poe kanaka i kona mau la a pau. A hana iho la oia i na ano a pau o ka hewa ma kona mau la, a ma ua mea la oia i hookahe aku ai i ke koko a nui loa; a ua kakaikahi kona mau la.

11. A o Etema, he mamo ia na Aha, loaa iho la ia ia ke aupuni; a hana aku la no hoi oia i ka mea i hewa ma kona mau la,

12. A eia kekahi, ma na la o Etema, hele mai la na kaula he nui, a wanana hou mai la i na kanaka; he oiaio, wanana mai la lakou, e anai loa mai auanei ka Haku ia lakou la mai ka ili aku o ka honua, ke ole lakou e mihi i ko lakou mau hewa.

13. A eia kekahi, hoopaakiki iho la na kanaka i ko lakou mau naau, aole no e hoolohe aku i ka lakou nei mau olelo; a kaniuhu iho la ka poe kaula, a haele aku la maiwaena aku o na kanaka.

14. A eia kekahi, hooko aku la o Etema i ke kanawai me ka hewa ma kona mau la a pau; a hanau ae la o Morona nana. A noho iho la o Morona ma kona hakahaka; a hana iho la o Morona i ka mea i hewa imua o ka Haku.

15. A eia kekahi, ala ae la kekahi kipikipi ana mawaena o na kanaka, no kela hui malu pu ana i kukulu ia e loaa ai ka mana a me ka waiwai; a ala ae la kekahi kanaka ikaika ma ka hewa mawaena o lakou, a kaua ae la ia Morona, a ma kela kaua hoohiolo ae la i ka hapalua o ke aupuni; a malama iho la oia i ka hapalua o ke aupuni no na makahiki he nui.

16. A eia kekahi, hoohiolo aku la o Morona ia ia, a loaa hou iho la ke aupuni.

17. A eia kekahi, ala ae la kekahi kanaka ikaika hou; a he mamo ia na ke kaikaina o Iareda.

18. A hoohiolo ae la oia ia Morona a loaa iho la ke aupuni ia ia; nolaila, noho pio iho la o Morona i ke koena a pau o kona mau la; a hanau ae la o Korianatora nana.

19. A eia kekahi, noho pio iho la o Korianatora i kona mau la a pau.

20. A ma na la o Korianatora hele mai la no hoi na kaula he nui, a wanana mai la no na mea nui a kupanaha, a hea ae la i ka mihi i na kanaka, a i ole lakou e mihi, e hoopai mai ka Haku ia lakou i ko lakou luku loa ia ana;

21. A na ka Haku hoi e hoouna mai a e lawe mai i kekahi lahuikanaka hou e noho ma ka aina, ma o kona mana la, mamuli o ke ano ana i lawe mai ai i ko lakou poe kupuna.

22. A hoomalau aku la lakou i na olelo a pau a ka poe kaula, no ko lakou hui pu malu a me na mea hoopailua ino.

23. A eia kekahi, hanau ae la o Etera na Korianatora, a ma¬ke aku la ia; ua noho pio oia i kona mau la a pau.