1. Ano, ua kakau iho au, o Moroni nei, i na olelo i kauoha ia mai ai iaʻu, e like me koʻu hoomanao ana; a ua hai aku au ia oe i na mea aʻu i sila aku ai; nolaila, mai hoopa aku ia mau mea, e hiki ai ia oe ke unuhi; no ka mea, ua papa ia mai ia mea ia oe, ke ole he mea naauao ia mahope i ke Akua.

2. A, aia hoi, anoai paha e ae ia no oe, i hoike aku ai oe i na papa i kela poe, ka poe e kokua auanei e hoopuka mai i keia mooolelo;

3. A e hoike ia aku auanei ia mau mea i na mea ekolu ma ka mana o ke Akua; nolaila, e ike no lakou me ka oiaio, he oiaio no ua mau mea nei.

4. A ma ka waha o na mea ike maka ekolu, e hookupaa ia ai keia mau mea; a o ka hoike ana o na mea ekolu, a me keia mooolelo, iloko olaila e hoike ia aku ai ka mana o ke Akua, a me kana olelo no hoi, ka mea a ka Makua, a me ke Keiki, a me ka Uhane Hemolele e hoike aku ana, e ku auanei keia mau mea a pau i mea hoike e ku e aku i ko ke ao nei, ma ka la hope.

5. A ina paha e mihi lakou, a e hele mai i ka Makua la ma ka inoa o Iesu, e hookipa ia no lakou iloko o ke aupuni o ke Akua.

6. Ano, ina aohe oʻu mana no keia mau mea, e noonoo pono oukou, no ka mea, e ike auanei oukou he mana koʻu, ia oukou e ike mai ai iaʻu, a e ku pu iho kakou imua o ke Akua ma ka la hope. Amene.