1. A eia kekahi, o Seza, he mamo ia na Heta, no ka mea, ua make o Heta i ka wi, a me ko kona hale a pau, koe o Seza wale no; nolaila, hoomaka ae la o Seza e kukulu hou i kekahi lahuikanaka i mokumoku ia.

2. A eia kekahi, hoomanao iho la o Seza i ka luku ia ana o kona poe kupuna, a kukulu iho la ia i kekahi aupuni pono, no ka mea, hoomanao iho la ia i ka mea a ka Haku i hana ai, ma ka lawe ana ia Iareda a me kona kaikaina mai kela kapa o ka hohonu; a hele aku la oia ma na aoao o ka Haku; a hanau ae la na keikikane a me na kaikamahine nana.

3. A kipi ae la kana keikikane mua, o Seza kona inoa, ia ia; aka hoi, ua hahau ia o Seza ma ka lima o kekahi powa, no kona waiwai nui loa, a lawe hou mai la ia mea i ka maluhia i kona makuakane.

4. A kukulu iho la kona makuakane i na kulanakauhale he nui maluna iho o ka ili a pau o ka aina. A ola ae la o Seza a elemakule loa iho la; a hanau ae la o Ripalakisa nana, a make aku la ia. A noho iho la o Ripalakisa ma kona hakahaka.

5. A eia kekahi, aole i hana o Ripalakisa i ka mea i pono ma ka maka o ka Haku, no ka mea, he nui na wahine a me na haiawahine ana, a kau aku la i ka mea maluna iho o na poohiwi o kanaka i kaumaha ke hali ia ae; he oiaio, auhau aku la oia ia lakou me na auhau kaumaha; a kukulu iho la oia i na hale akea he nui me na auhau.

6. A kukulu iho la oia nona iho i kekahi noho alii nani loa, a kukulu iho la oia i na halepaahao he nui a o ka mea ae ole aku e noho malalo iho o na auhau, hoolei aku la oia ia ia iloko o ka halepaahao; a o ka mea hiki ole ke hookupu aku i na auhau, hoolei aku la no oia ia ia iloko o ka halepaahao; a kena ae la oia e hana mau lakou no ko lakou ola; a o ka mea e hoole ana e hana, kena ae la oia e pepehi ia;

7. Nolaila, loaa iho la ia ia kana hana nani a pau; he oiaio, o kona gula maikai oia kana i kena aku ai e hoomaemae ia iloko o ka halepaahao, a me na ano a pau o ka hana nani oia hoi kana i kena aku ai e hana ia iloko o ka halepaahao. A eia kekahi, hoopopilikia iho la oia i na kanaka me kona mau moekolohe ana a me na mea hoopailua;

8. A ia ia i noho alii ai no na makahiki hookahi kanahakumamalua, ala ae la na kanaka ma ke kipi aku ia ia, a hoomaka ae la ke kaua hou ma ka aina, a ua pepehi ia o Ripalakisa, a ua kipaku ia ae kana poe mamo mailoko aku o ka aina.

9. A eia kekahi, mahope mai o na makahiki he nui, houluulu ae la o Morianatona, (he mamo ia na Ripalakisa,) i kekahi puali o na aea, a hele aku la a kaua aku la i na kanaka; a loaa iho la ia ia ka mana maluna iho o na kulanakauhale he nui wale; a lilo iho la ke kaua i eha loa a mau ia no na makahiki he nui wale, a loaa iho la ia ia ka mana maluna o ka aina a pau, a hoonoho iho la oia ia ia iho i alii maluna o ka aina a pau.

10. A mahope iho o kona hoonoho ana ia ia iho i alii, hoomama ae la oia i ke kaumaha o na kanaka, a ma ia mea, loaa ia ia ka lokomaikai ma na maka o na kanaka, a poni iho la lakou ia ia i alii no lakou.

11. A hana aku la oia i ka pono i na kanaka, aole nae ia ia iho, no ka nui o na moekolohe ana ona; nolaila, ua hooki ia aku oia mai ke alo aku o ka Haku.

12. A eia kekahi, kukulu iho la o Morianatona i na kulanakauhale he nui wale, a lilo iho la na kanaka i poe waiwai loa malalo iho o kona au, ma na hale, a me ke gula, a me ke kala, a me ka hooulu ana i na hua liilii, a ma na pua a me na ohana holoholona, a ma na mea i hoihoi hou ia mai ia lakou.

13. A ola ae la o Morianatona a elemakule loa, alaila, hanau ae la o Kima nana; a noho alii iho la o Kima ma ka hakahaka o kona makuakane; a noho alii iho la oia no na makahiki ewalu, a make aku la kona makuakane. A eia kekahi, aole o Kima i noho alii ma ka pono, nolaila, aole oia i kokua ia e ka Haku.

14. A ala ae la kona kaikaina a kipi ae la ia ia, a ma keia kipi ana lawe ae la ua kaikaina nei ia ia iloko o ka noho pio ana; a noho pio iho la oia i kona mau la a pau; a hanau ae la na keikikane a me na kaikamahine nana ma ka noho pio ana; a i kona wa elemakule hanau ae la o Levi nana, a make aku la ia.

15. A eia kekahi, hookauwa ae la o Levi ma ka noho pio ana mahope iho o ka make ana o kona makuakane, no na makahiki hookahi kanahakumamalua. A kaua ae la ia i ke alii o ka aina, a ma ua kaua la loaa iho la ia ia iho ke aupuni.

16. A mahope iho o kona loaa ana ia ia iho ke aupuni, hana aku la oia i ka mea pololei i ka maka o ka Haku, a ua hoopomaikai ia iho la na kanaka ma ka aina, a ola ae la oia a elemakule loa, a hanau ae la na keikikane a me na kaikamahine nana; a hanau ae la no hoi nana o Koroma, ka mea ana i poni iho ai i alii ma kona hakahaka.

17. A eia kekahi, hana aku la o Koroma i ka mea i maikai i ka maka o ka Haku i kona mau la a pau; a hanau ae la na keikikane a me na kaikamahine he nui nana; a mahope iho o kona ike ana i na la he nui wale, hala aku la oia, e like me ke koena o ko ka honua; a noho alii iho la o Kisa ma kona hakahaka.

18. A eia kekahi, hala aku la no hoi o Kisa, a noho alii iho la o Liba ma kona hakahaka.

19. A eia kekahi, hana iho la no hoi o Liba i ka mea i maikai ma ka maka o ka Haku. A ma na la o Liba ua luku ia na nahesa niho awa; nolaila, hele aku la lakou ma ka aina hema, e imi na mea ai no na kanaka o ka aina; no ka mea, ua uhi ia ka aina me na holoholona o ka ululaau. A lilo iho la no hoi o Liba i mea koa i ka hahai holoholona.

20. A kukulu iho la lakou i kekahi kulanakauhale nui ma ka puali ololi o ka aina, ma kahi a ke kai i hookaawale ai i ka aina.

21. A malama iho la lakou i ka aina hema i nahelehele, i loaa ai na holoholona hihiu. A ua uhi ia ka ili a pau o ka aina akau me na kanaka;

22. A ua ikaika loa lakou ma ka hana, a kuai mai a kuai aku lakou, a kalepa ae la lakou kekahi me kekahi, i loaa ai ia lakou ka waiwai.

23. A hana aku la lakou ma na ano a pau o na mea i eli ia, a hana aku la lakou i ke gula, a me ke kala, a me ka hao, a me ke keleawe, a me kela ano keia ano o na mea hiki ke hoohehee ia; a eli iho la lakou ia mea noloko mai o ka honua; nolaila, hooili ae la lakou i na puu kiekie o ka lepo e loaa ai ka mea e hoohehee ai, o ke gula, a me ke kala a o ka hao, a me ke keleawe ulaula. A hana iho la lakou i na ano a pau o ka hana nui.

24. A ia lakou na kilika, a me ka ie i milo nani ia; a hana aku la lakou i na ano a pau o ka lole, i hiki ia lakou ke hoaahu mai ia lakou iho mai ko lakou olohelohe ana.

25. A hana aku la lakou i na ano a pau o na mea paahana e mahi i ka honua, e palau a e lulu, e ohi i ka hua a e kope i ka lepo, a e hahau i ka hua no hoi.

26. A hana aku la lakou i na ano a pau o na mea paahana, a me ua mau mea nei lakou i hoohana ai i ko lakou mau holoholona.

27. A hana aku la lakou i na ano a pau o na mea kaua. A hana aku la lakou i na ano a pau o ka hana me ka hana akamai loa.

28. Aole loa he lahuikanaka i oi ae ka hoopomaikai ia mamua o lakou, a i oi ae ka holomua ma ka lima o ka Haku. A maloko lakou o kekahi aina i maikai loa mamua o na aina a pau, no ka mea, ua olelo mai la ka Haku ia mea.

29. A eia kekahi, ola ae la o Liba i na makahiki he nui wale, a hanau ae la na keikikane a me na kaikamahine nana; a hanau ae la no hoi o Hearatoma nana.

30. A eia kekahi, noho alii iho la o Hearatoma ma ka hakahaka o kona makuakane. A ia Hearatoma i noho alii ai i na makahiki he iwakaluakumamaha, aia hoi, ua kaili ia ae la ke aupuni mai ona aku. A hookauwa ae la oia i na makahiki he nui ma ka noho pio ana; he oiaio, i ke koena a pau o kona mau la.

31. A hanau ae la o Heta nana, a noho pio iho la o Heta i kona mau la a pau. A hanau ae la o Aarona na Heta, a noho pio iho la o Aarona i kona mau la a pau; a nana o Amanigada, a noho pio iho la no hoi o Amanigada i kona mau la a pau; a nana o Korianatuma, a noho pio iho la o Korianatuma i kona mau la a pau; a hanau ae la o Koma nana.

32. A eia kekahi, kauo ae la o Koma i ka hapalua o ke aupuni. A noho alii iho la oia maluna o ka hapalua o ke aupuni hookahi kanahakumamalua makahiki; a hele aku la oia e kauaaku i ke alii o Amagida, a kaua ae la laua no na makahiki he nui wale, a ma ia manawa, loaa iho la ia Koma ka mana maluna iho o Amagida, a loaa iho la ka mana maluna o ke koena o ke aupuni.

33. A ma na la o Koma hoomaka ae la na powa e ike ia ma ka aina; a lawe ae la lakou i na mea kuka kahiko, a lawelawe ae la i na hoohiki mamuli o ke ano o ko ka poe kahiko, a imi iho la e hoopau i ke aupuni.

34. Ano, kaua ku e nui aku la o Koma ia lakou; aole nae oia i lanakila maluna o lakou.