1. Ano, eia kekahi, mahope iho o ka hana ana o na keiki a Mosia i keia mau mea a pau, lawe pu aku la lakou i kekahi poe he uuku me lakou, a hoi aku la i ko lakou makuakane la, ke alii, a noi ae ia ia e ae mai oia ia lakou, i hele aku ai lakou me ua poe nei a lakou i wae aku ai, e pii aku i ka aina o Nepai, e hiki ia lakou ke hai aku i na mea a lakou i lohe ai, a e hiki ia lakou ke haawi aku i ka olelo a ke Akua i ko lakou poe hoahanau, i ko Lamana poe;

2. E hiki paha ia lakou ke hoohuli ae ia lakou la i ka ike no ka Haku ko lakou Akua, a hoomaopopo ia lakou i ka hewa o ko lakou poe kupuna; a e hiki paha ia lakou ke hoopau aku i ko lakou la inaina no ko Nepai poe, i hiki hoi lakou ke lawe ia e hauoli iloko o ka Haku ko lakou Akua, e hiki ia lakou ke hoalauna aku a ke hoalauna mai kekahi i kekahi, a e paio hou ole ma ka aina a pau a ka Haku a ko lakou Akua i haawi mai ai ia lakou.

3. Ano, ua makemake lakou e hai ia aku ke ola i kela mea i keia mea, no ka mea, aole loa o lakou oluolu e make kekahi uhane o kanaka; he oiaio, o ka manao wale ana e loaa paha i kekahi uhane ka ehaeha pau ole, ua lilo ia i nea no lakou e naueue ai a e haalulu ai.

4. A pela ka Uhane o ka Haku i hana mai ai maluna iho o lakou, no ka mea, he poe hewa loa lakou o na mea hewa. A ike iho la ka Haku ma kona aloha nui loa, he pono ke hookoe ia lakou; aka hoi, pilikia iho la lakou i ka ehaeha o ka naau, no ko lakou mau hewa; a pilikia nui iho la hoi, e hopohopo ana o hoolei ia aku auanei lakou no ka wa pau ole.

5. A eia kekahi, noi aku la lakou i ko lakou makuakane i na la he nui e pii aku lakou i ka aina o Nepai.

6. A hele aku la ke alii Mosia a ninau aku la i ka Haku, ina e hookuu aku oia i kana mau keikikane e pii aku mawaena o ko Lamana poe, e hai aku i ka olelo.

7. A i mai la ka Haku ia Mosia, E hookuu aku ia lakou e pii aku, no ka mea, e manaoio na mea he nui i ka lakou mau olelo, a e loaa auanei ia lakou ke ola mau loa; a e hoopakele aku au i kau mau keiki mailoko mai o na lima o ko Lamana poe.

8. A eia kekahi, ae aku la o Mosia e hele aku lakou, a e hana e like me ko lakou noi.

9. A hele aku la lakou ma ko lakou hele ana iloko o ka waonahele, e pii aku e hai aku i ka olelo mawaena o ko Lamana poe; a e haawi aku auanei au i ka mooolelo a ka lakou hana.

10. Ano, aole mea a Mosia ke alii e hoili aku ai i ke aupuni, no ka mea, aole e lawe kekahi o kana mau keiki i ke aupuni.

11. Nolaila, lawe aku la oia i na mooolelo i kahakaha ia ai maluna o na papa keleawe, a me na papa a Nepai no hoi, a me na mea a pau ana i malama ai a i pulama ai, e like me na kauoha a ke Akua, mahope iho o kona unuhi ana a kauoha ana e palapala ia na mooolelo i kahakaha ia ai maluna iho o na papa gula, a ka poe kanaka o Limai i loaa ai, a i haawi ia mai ai ia ia e ka lima o Limai;

12. A ua hana oia i keia, no ka iini o kona poe kanaka, no ka mea, ua makemake nui loa aku lakou, e ike no ua poe kanaka la i luku ia ai.

13. Ano, unuhi ae la oia ia mau mea ma o ua mau pohaku elua la i hoopaa ia ai iloko o na apo elua o kekahi mea pio.

14. Ano, ua hoomakaukau ia ua mau mea nei mai kinohi mai, a ua haawi ia mai mai kekahi hanauna aku a i kekahi hanauna aku, no ka oihana o ka unuhi ana i ke ano o na olelo;

15. A ua malama ia a pulama ia ma ka lima o ka Haku, i hoike mai ai oia i kela mea keia mea e loaa ai ka aina, i na hewa a me na mea hoopailua o kona poe kanaka;

16. A o ka mea nana ua mau mea nei, ua kapa ia oia he mea nana-Urima, mamuli o ke ano o ka wa kahiko.

17. Ano, mahope iho o ka hoopau ana o Mosia i ka unuhi ana i ua mau mooolelo nei, aia hoi, he mooolelo ia o ka poe kanaka i luku ia ai, mai ka manawa o lakou i luku ia ai, a hiki aku i ke kukulu ia ana o ka hale pakui nui, i ka manawa a ka Haku i hoookahuli ai i ka olelo a na kanaka; a ua hoopuehu ia aku lakou mao a maanei maluna o ka ili o ka honua a pau; he oiaio, a mai ia wa hoi a hiki i ka hana ia ana o Adamu.

18. Ano, he kumu ua mooolelo nei no na kanaka o Mosia e uwe nui loa ai; he oiaio, ua piha lakou i ke kaumaha; aka hoi, haawi mai la ia mooolelo ia lakou i ka ike nui, a ma ia mea lakou i hauoli ai.

19. A e palapala ia ua mau mooolelo nei mahope; no ka mea, aia hoi, he mea e pono ai ia e ike ai na kanaka a pau i na mea i palapala ia ai iloko o ua mooolelo nei.

20. Ano, me au i olelo aku ai ia oukou, mahope iho o ka hana ana o ke alii Mosia i keia mau mea, lawe aku la oia i na papa keleawe, a me na mea a pau ana i malama ai, a haawi aku la ia Alama, oia no ke keiki a Alama; he oiaio, o na mooolelo a pau, a me na mea unuhi hoi i ke ano o na olelo, a haawi aku la ia mau mea ia ia, a kauoha aku la ia ia e malama a e pulama oia ia mau mea, a e kakau hoi i mooolelo o na kanaka, e haawi aku ana ia mau mea ia hanauna aku ia hanauana aku, e like me ua mau mea nei i haawi ia mai ai mai ka manawa mai o Lehi i haalele aku ai ia Ierusalema.