1. Ano, eia kekahi, mahope iho o ka loaa ana i ke alii o Mosia ka maluhia mau, no na makahiki ekolu, ua makemake oia e ike no na kanaka i pii aku i ka aina o Lehi-Nepai, oia hoi i ke kulanakauhale o Lehi-Nepai; no ka mea, aole kona poe kanaka i lohe i kekahi mea no lakou, mai ka wa mai a lakou i haalele ai i ka aina o Zarahemela; nolaila, hoouluhua aku lakou ia ia me ko lakou noi nui ana.

2. Eia kekahi, ae aku la ke alii Mosia i na kanaka he umikumamaono o ko lakou poe kanaka ikaika e pii aku i ka aina o Lehi-Nepai, e imi i ko lakou poe hoahanau.

3. Eia hoi kekahi, ia la ae, ala ae la lakou e pii aku, a aia pu me lakou kekahi mea i kapa ia o Amona, a he kanaka ikaika a mana hoi ia, a he mamo ia na Zarahemela; a o ko lakou luna hoi ia.

4. Ano, aole o lakou i ike i ke ala a lakou e hele aku ai ma ka waonahele, e pii aku i ka aina o Lehi-Nepai; nolaila auwana lakou no na la he nui ma ka waonahele, he oiaio, i hookahi kanaha la ko lakou auwana ana.

5. A ia lakou i auwana ai no na la he kanaha, hiki aku la lakou i kahi puu, aia no ia ma ka akau o ka aina o Sailoma, a malaila lakou i kukulu ai i ko lakou mau halelewa.

6. A lawe aku la o Amona i na hoahanau ekolu ona, o Amaleki, o Helema, a me Hema ko lakou mau inoa, a iho aku la lakou iloko o ka aina o Nepai;

7. A, aia hoi, halawai ae la lakou me ke alii o ka poe kanaka, i noho ma ka aina o Nepai, a ma ka aina o Sailoma; a ua hoopuni ia lakou e ko ke alii poe koa, a hopu ia, a nakinaki ia, a hahao ia iloko o ka halepaahao.

8. A eia kekahi, ia lakou i noho ai ma ka halepaahao i elua la, ua lawe hou ia lakou imua o ke alii, a wehe ia ae la ko lakou mau mea i paa ai; a ku ae la lakou imua o ke alii, a ua ae ia, e aho ke olelo, ua kauoha ia lakou, e pane aku i na niele ana e ninau mai ai ia lakou.

9. A i aku la oia ia lakou, aia hoi, Owau no o Limai, ke keiki a Noa, oia ke keiki a Zenifa, ka mea i pii mai mailoko mai o ka aina o Zarahemela e loaa keia aina, o ka aina ia o ko lakou poe kupuna, a i hoolilo ia mai i alii ma ka leo o na kanaka.

10. Ano, ke makemake nei au e ike i ke kumu o ko oukou aa ana e hookokoke mai i na pa o ke kulanakauhale, oiai au me koʻu poe koa, mawaho o ka puka?

11. Ano, no keia mea ua ae aku au e hoola ia oukou, i hiki iaʻu ke ninau aku ia oukou, i ole keia ua ae aku au i koʻu poe koa e pepehi ia oukou a make. Ua ae ia oukou e olelo mai.

12. Ano, ia Amona i ike ai ua ae ia mai oia e olelo, hele aku la ia a kulou iho la imua o ke alii; a i ke ala ana ae i aku la oia, E ke alii, ke aloha nui aku nei au imua o ke Akua i keia la, no koʻu ola ana i keia manawa, a i ae ia mai au e olelo; a e hoao no au e olelo me ka wiwo ole;

13. No ka mea, ua ike paka au ina ua ike mai oukou iaʻu, aole oe i ae mai iaʻu e hele me keia mau mea i paa ai. No ka mea, owau no o Amona, a he mamo no na Zarahemela, a ua pii mai nei au mai ka aina o Zarahemela mai, e imi i ko makou poe hoahanau, a Zenifa i lawe mai ai mailoko mai o kela aina.

14. Ano, eia kekahi, mahope iho o ko Limai lohe ana i na olelo a Amona, ua olioli nui loa ia, a i mai la, Ano, ua ike oiaio au ke ola la i keia manawa koʻu poe hoahanau, ka poe i noho ma ka aina o Zarahemela. Ano, e hauoli no au; a i ka la apopo, e hoohauoli ai au i koʻu poe kanaka.

15. No ka mea, aia hoi, ua hooluhi ia mai makou e ko Lamana poe, a ua auhau ia mai i kekahi auhau kaumaha e hali ai. A, ano hoi, e hoopakele mai no ko makou poe hoahanau ia makou mailoko mai o ko makou luhi, a mailoko mai o na lima o ko Lamana poe, a e lilo makou i poe kauwa na lakou; no ka mea, ua maikai loa ko makou lilo ana i poe kauwa na ko Nepai poe, mamua o ka hookupu ana aku i ka waiwai i ke alii o ko Lamana poe.

16. Ano, kauoha aku la ke alii o Limai i kona poe koa, aole lakou nakiikii hou ia Amona, aole hoi i kona mau hoahanau, aka, kena aku la ia lakou e hele i ka puu ma ka akau o Sailoma, a e lawe mai i ko lakou poe hoahanau iloko o ke kulanakauhale, e hiki ia lakou ke ai, a ke inu, a ke hoomaha ia lakou iho mai ka luhi mai o ko lakou hele ana; no ka mea, ua hoehaeha ia lakou ma na mea he nui wale; ua loohia lakou i ka pololi, i ka makewai, a i ka luhi.

17. Ano, eia kekahi, ia la ae, hoouna ae la ke alii o Limai, i olelo hoolaha mawaena o kona poe kanaka a pau, e hiki ia lakou ke hoakoakoa ia lakou iho i ka luakini, e hoolohe i na olelo ana e olelo aku ai ia lakou.

18. A eia kekahi, ia lakou i hoakoakoa mai ai ia lakou iho, olelo aku la oia ia lakou peneia, i ka i ana, E, auhea oukou, e koʻu poe kanaka, e hoea mai oukou i ko oukou mau poo a e hooluolu ia; no ka mea, aia hoi, ua kokoke mai ka manawa, aole loihi aku, e noho hou ole ai kakou malalo iho o ko kakou poe enemi, me ka nui loa nae o ko kakou aumeume ana me ka make hewa; aka, ke manaolana nei au aia hookahi aumeume ikaika ku pono i koe e hana ia.

19. Nolaila, e hoea mai oukou i ko oukou mau poo, a e hauoli, a e paulele aku i ke Akua, i kela Akua oia no ke Akua o Aberahama, a o Isaaka, a me Iakoba; A i ua Akua la nana i lawe mai i na mamo a Iseraela mailoko mai o ka aina o Aigupita, a i hoohele ia lakou mawaena o ke Kai Ula ma ka aina maloo, a i hanai mai ia lakou i ka mane, i make ole ai lakou ma ka waonahele; a he nui na mea e ae, ana i hana mai ai no lakou.

20. A eia hou: Ua lawe mai la ua Akua hookahi la i ko kakou poe kupuna mailoko mai o ka aina o Ierusalema, a ua malama a ua hoola mai i kona poe kanaka, a hiki i keia wa. A, aia hoi, no ka kakou hana hewa a me na hana ino, i lawe ia mai ai kakou iloko o ka hana luhi.

21. A he poe hoike oukou a pau i keia la, o Zenifa, ka mea i hoolilo ia i alii maluna o keia poe kanaka, ua makemake loa oia e loaa ka aina o kona poe kupuna, nolaila, i hoopunipuni ia ai ma ke akamai a me ka maalea o ke alii Lamana, nana i hana i ke kuikahi me ke alii Zenifa, a ua haawi mai la ma na lima ona i na okana o kekahi hapa o ka aina, oia no ke kulanakauhale o Lehi-Nepai, a me ke kulanakauhale o Sailoma; a me ka aina a puni;

22. A ua hana oia i keia a pau, me ka manao nui e lawe aku i keia lahuikanaka malalo iho ona, a iloko o ka noho luhi ana. A, aia hoi, ke hookupu aku nei kakou i ka waiwai i ke alii o ko Lamana poe, i ka hapalua o ko kakou kurina, a me ko kakou bale, a me ko kakou hua liilii a pau, o kela ano o keia ano, a me ka hapalua o ka mahuahua o ko kakou mau pua, a me ko kakou mau ohana holoholona; he oiaio, i ka hapalua hoi o na mea a pau a kakou i loaa ai, oia ka ke alii o ko Lamana poe e kii mai nei, a i ole ia, i ko kakou mau ola.

23. Ano, aole anei keia he mea kaumaha e auamo ai? A, aole anei he nui ko kakou popilikia nei? Ano hoi, he kumu nui ko kakou e kaniuhu ai.

24. He oiaio, ke i aku nei au ia oukou, ua nui ko kakou mau kumu e kaniuhu ai; no ka mea, aia hoi, he nui loa o ko kakou poe hoahanau ka i pepehi ia, a i hookahe wale ia ko lakou koko, a o keia a pau no ka hewa.

25. No ka mea, ina aole o keia poe kanaka i haule iloko o ka hala, ina ua ae ole mai ka Haku i ili mai ai keia ino nui maluna o lakou. Aka hoi, aole lakou i hoolohe i kana mau olelo; aka, ala ae la na paio mawaena o lakou, a no ia mea hookahe ae la lakou i ke koko mawaena o lakou iho.

26. A ua pepehi aku la lakou i kekahi kaula a ka Haku; he oiaio, he kanaka i wae ia e ke Akua, ka mea i hai aku ia lakou no ka lakou mau hana hewa a hana ino, a wanana mai la no na mea he nui e hiki mai ana, he oiaio, no ka hiki ana mai o Kristo.

27. A no kana i ana ae ia lakou, o Kristo no ke Akua, ka Makua o na mea a pau, a i aku la hoi e lawe ana maluna iho ona i ke ano o kanaka, a o ke ano ia o ke kanaka i hana ia ai i kinohi; oia hoi, i aku la oia ua hana ia ke kanaka mamuli o ke ano o ke Akua, a e iho mai auanei ke Akua mawaena o na keiki a kanaka, a e lawe maluna iho ona i ka io a me ke koko, a e hele aku ma ka ili o ka honua;

28. Ano, no kana olelo ana i keia, pepehi ae la lakou ia ia a make; a he nui na mea e ae a lakou i hana ai, i lawe mai ai ilalo nei i ka inaina o ke Akua maluna iho o lakou. Nolaila, owai la ka mea e kahaha ana no ko lakou noho luhi ana, a no ko lakou hanau ia ana me na popilikia eha?

29. No ka mea, aia hoi, ua i mai la ka Haku, Aole au e kokua aku i koʻu poe kanaka i ka la o ko lakou lawehala ana; aka e keakea aku no au i ko lakou mau ala, i pomaikai ole ai lakou; a e lilo ko lakou mau hana me he mea hina la imua o lakou.

30. A eia hou, ke i mai nei oia, Ina e lulu aku koʻu poe kanaka i ka paumaele, e ohi auanei lakou i ka opala ona, iloko o ka puahiohio; a o ka hope ona, o ka awaawa make no ia.

31. A eia hou, ke i mai nei oia, Ina e lulu aku koʻu poe kanaka i ka paumaele, e ohi no auanei lakou i ka makani hikina, ka mea e lawe mai ana i ka make koke.

32. Ano, aia hoi, ua ko ka olelo a ka Haku; a ua hahau ia oukou, a hoopilikia ia.

33. Aka ina e huli ae oukou i ka Haku me ka manao ikaika o ka naau, a e paulele aku ia ia, a e hookauwa aku nana me ka molowa ole o ka manao; ina e hana oukou i keia, nana no, e like me kona makemake a oluolu iho, e hoopakele mai ia oukou mailoko mai o ka noho luhi ana.