1. Eia kekahi, hoi aku la ka poe koa o ke alii, oiai ua imi makehewa no ka poe kanaka o ka Haku.

2. Ano hoi, he uuku ka poe koa o ke alii, oiai ua hooemi ia, a hoomaka ae la ke ku e mawaena o ke koena o na kanaka.

3. A hoomaka ae la he poe uuku e ha aku i na olelo hooweliweli i ke alii, a hoomaka iho la ka paio nui mawaena o lakou.

4. Ano, mawaena o lakou kekahi kanaka o Gideona kona inoa, a he kanaka ikaika ia, a he enemi i ke alii, nolaila, unuhi ae la oia i kana pahikaua a hoohiki iho la ma kona inaina e pepehi oia i ke alii.

5. A eia kekahi, hakaka aku la oia me ke alii, a i ke alii i ike ai ua kokoke ia e lanakila ai maluna ona, hee aku la oia, a holo a pii ae la maluna o ka hale kiai, e kokoke ana i ka luakini.

6. A alualu ae la o Gideona ia ia a kokoke oia e pii maluna o ka hale kiai e pepehi aku i ke alii, a alawa ae la ke alii i kona mau maka i ka aina o Semalona, a, aia ka, ka poe koa o ko Lamana poe iloko o na palena o ka aina.

7. Ano, uwe iho la ke alii i ka eha o kona uhane, me ka i ana ae, E Gideona e, e hookuu mai iaʻu, no ka mea, eia no ko Lamana poe maluna o kakou, a e luku no lakou ia lakou nei; he oiaio, e luku mai no lakou i koʻu poe kanaka.

8. Ano, aole o ke alii i manao nui i kona poe kanaka, e like me kona ola iho; aka hoi, hoopakele aku la o Gideona i kona ola.

9. A kauoha ae la ke alii i na kanaka e hee aku, a hele aku la oia imua o lakou, a hee aku la lakou iloko o ka waonahele me ka lakou poe wahine a me ka lakou mau keiki.

10. A eia kekahi, alualu mai la ko Lamana poe ia lakou, a loaa lakou, a hoomaka iho la e pepehi mai ia lakou.

11. Ano, eia kekahi, kauoha ae la ke alii ia lakou e haalele aku na kanaka a pau i ka lakou mau wahine a me ka lakou mau keiki, a e auhee aku imua o ko Lamana poe.

12. Ano, he nui wale ka poe i haalele ole aku ia lakou, aka ua manao e aho ke noho a ke make pu me lakou. A o ke koena, haalele aku la lakou i ka lakou poe wahine a i ka lakou poe keiki a hee aku la.

13. Eia kekahi, o ka poe i noho me ka lakou poe wahine a me ka lakou mau keiki, kauoha ae la lakou i ka lakou mau kaikamahine ui e ku aku a e noi aku i ko Lamana poe, aole e pepehi mai la lakou.

14. Eia kekahi, aloha mai la ko Lamana poe ia lakou, no ka mea, ua punihei lakou i ka ui o ka lakou poe wahine;

15. Nolaila, hoopakele mai la ko Lamana poe i ko lakou mau ola, a lawe pio aku la ia lakou, a kai aku la ia lakou i ka aina o Nepai, a ae mai la ia lakou e noho ma ka aina, ke haawi aku lakou ia Noa ke alii, iloko o na lima o ko Lamana poe, a me ko lakou waiwai, oia, i ka hapalua o na mea a pau a lakou; i ka hapalua o ko lakou gula, a i ko lakou kala, a me ko lakou mau mea maikai a pau; a pela lakou e hookupu waiwai aku ai i ke alii o ko Lamana poe, ia makahiki aku ia makahiki aku.

16. Ano, mawaena o ka poe i lawe pio ia, kekahi o na keikikane a ke alii, o Limai kona inoa.

17. Ano, ua makemake o Limai e pepehi ole ia kona makuakane; aka hoi, aole o Limai i naaupo no na hewa o kona makuakane; no ka mea, he kanaka pono no hoi oia.

18. Eia kekahi, hoouna malu aku la o Gideona i kekahi poe kanaka iloko o ka waonahele, e imi aku i ke alii, a me ka poe pu me ia. A eia kekahi, halawai aku la lakou me na kanaka a pau ma ka waonahele, koe wale no ke alii a me kana poe kahuna.

19. Ano, ua hoohiki iho la lakou ma ko lakou mau naau e hoi mai i ka aina o Nepai, a ina ua pepehi ia ka lakou poe wahine a me ka lakou mau keiki, a me ka poe hoi i noho pu ai me lakou, alaila e imi iho lakou e hoopai, a e make pu hoi me lakou.

20. A kauoha ae la ke alii, aole lakou e hoi aku; a ua huhu lakou i ke alii, a pepehi aku la ia ia, a make i ke ahi.

21. A aneane lakou e lalau i na kahuna hoi a e pepehi ia lakou, a hee aku la lakou la imua o lakou.

22. Eia kekahi, aneane lakou e hiki mai i ka aina o Nepai, a halawai ae la lakou me na kanaka o Gideona. A hai ae la na kanaka o Gideona ia lakou i na mea a pau i hiki mai ai maluna o ka lakou poe wahine a me na keiki; a no ka ae ana mai o ko Lamana poe i noho ai lakou ma ka aina, ma ka hookupu waiwai ana i ko Lamana poe i ka hapalua o na mea a pau a lakou.

23. A hai mai la ka poe kanaka i na kanaka o Gideona ua pepehi ae la lakou i ke alii, a ua hee aku la na kahuna ana mai o lakou aku iloko loa o ka waonahele.

24. A eia kekahi, mahope iho o ka pau ana o keia hana, hoi ae la lakou i ka aina o Nepai, e hauoli ana, no ka pepehi ole ia ana o ka lakou poe wahine a me ka lakou mau keiki; a hai ae la lakou ia Gideona i ka mea a lakou i hana ai i ke alii.

25. Eia kekahi, hoohiki mai la ke alii o ko Lamana poe i kahi hoohiki ia lakou, aole e pepehi mai kona poe kanaka ia lakou.

26. A o Limai hoi, o ke keiki a ke alii no ia, a ua hoili ia mai ke aupuni maluna ona e na kanaka, oia ka i hoohiki i ke alii o ko Lamana poe, na kona poe kanaka e hookupu waiwai aku ia ia, oia, i ka hapalua o na mea a pau a lakou.

27. Eia kekahi, hoomaka ae la o Limai e hookupaa i ke aupuni, a e hookupaa i ka malu mawaena o kona poe kanaka.

28. A hoonoho iho la ke alii o ko Lamana poe i poe koa a puni ka aina, i hiki ai ia ia ke malama i na kanaka o Limai iloko o ka aina, i hiki ole ia lakou ke haele aku iloko o ka waonahele; a hanai aku la oia i kona poe koa mailoko mai o ka waiwai auhau i loaa ai ia ia mai ko Nepai poe mai.

29. Ano, ua loaa i ke alii Limai ka malu mau ma kona aupuni, no na makahiki elua, i ole hoopilikia mai ai ko Lamana poe ia lakou, aole hoi i imi e luku mai ia lakou.