1. Eia kekahi, hoi aku la o Limai a me kona poe kanaka i ke kulanakauhale o Nepai, a hoomaka ae la e noho hou ma ka aina me ka malu.

2. Eia kekahi, mahope iho o na la he nui wale, hoomaka hou ko Lamana poe e hooeu ia me ka huhu i ko Nepai poe; a hoomaka lakou e komo mai iloko o na palena o ka aina a puni.

3. Ano, aole o lakou i aa e pepehi mai ia lakou no ka hoohiki a ko lakou la alii i hoohiki aku ai ia Limai; aka, ua papai mai la lakou la i ko lakou mau papalina, a i hookiekie ae maluna o lakou; a i hoomaka e hoouka mai i na ukana kaumaha maluna o ko lakou mau kua, a e hoa aku ia lakou me lakou la i hana ai i kahi hoki leo ole;

4. He oiaio, ua hana ia keia a pau, i ko ai ka olelo a ka Haku.

5. Ano, ua nui na popilikia o ko Nepai poe; a, aole hoi kekahi ala i hiki ai ia lakou ke hoopakele ia lakou iho mailoko ae o ko lakou la mau lima, no ka mea, ua hoopuni ko Lamana poe ia lakou ma kela aoao keia aoao.

6. A eia kekahi, hoomaka ae la na kanaka e ohumu me ke alii no ko lakou mau popilikia; a hoomaka lakou e makemake e hele ku e aku ia lakou la ma ke kaua. A hoopilikia nui lakou i ke alii me ko lakou ohumu ana; nolaila ae aku la oia ia lakou e hana e like me ko lakou makemake.

7. A houluulu hou ae la lakou ia lakou iho, a kahiko mai la i ko lakou mau mea kaua, a hele aku la e ku e i ko Lamana poe, e kipaku aku ia lakou mawaho o ko lakou aina.

8. Eia kekahi, lanakila mai la ko Lamana poe maluna o lakou, a hooauhee mai ia lakou, a pepehi mai la i na mea he nui o lakou.

9. Ano, he uwe a he kanikau nui mawaena o na kanaka o Limai; e uwe ana ka wahinekanemake no kana kane; ke keikikane a me ke kaikamahine e uwe ana no ko laua makuakane; a me na hoahanau i ko lakou poe hoahanau.

10. Ano, he nui na wahinekanemake ma ka aina; a uwe ikaika lakou ia la aku ia la aku, no ka mea, ua hiki mai ka makau nui i ko Lamana poe maluna o lakou.

11. A eia kekahi, ua hoonaukiuki ko lakou uwe mau ana i ka poe i koe o na kanaka o Limai e huhu aku i ko Lamana poe. A hele hou aku la lakou i ke kaua; aka ua hooauhee hou ia lakou, me ka luku nui.

12. He oiaio, hele hou aku la lakou, i ke kolu o ka manawa, a pela hou hoi i luku ia ai; a o ka poe i pepehi ole ia, hoi hou aku la i ke kulanakauhale o Nepai.

13. A hoohaahaa iho la lakou ia lakou iho ilalo i ka lepo, e hookauwa ana ia lakou iho i ke auamo hooluhi, e ae ana e papai ia, a e hahau ia i o ia nei, a e hookaumaha ia, mamuli o ka makemake o ko lakou poe enemi.

14. A hoohaahaa iho la lakou ia lakou iho iloko o ka haahaa; a ua kahea ikaika aku la lakou i ke Akua; he oiaio, a pau ae la ka la lakou i kahea aku ai i ko lakou Akua e hoopakele mai ia lakou mailoko mai o ko lakou mau popilikia.

15. A, ano, ua lohi ka Haku i ka hoolohe ana i ko lakou hea ana, no ka lakou mau hala; aka hoi, hoolohe mai nae ka Haku i ka lakou pule ana, a hoomaka ae la e hoopalupalu ae i na naau o ko Lamana poe, i hoomaka ai lakou e hoomama mai i na ukana kaumaha o lakou; aole nae ka Haku i manao he pono ke hoopakele ia lakou mailoko aku o ka noho luhi ana.

16. Eia kekahi, hoomaka lakou e hoopomaikai iki ia ma ka aina, a hoomaka ae la lakou e hooulu i ka hua liilii he nui ae, a me na pua a me na ohana holoholona, i ole lakou i pilikia i ka pololi.

17. Ano, ua oi aku ka nui o na wahine, mamua o na kane; nolaila, kauoha ae la ke alii o Limai i kela kanaka i keia kanaka e haawi aku no ke ola o na wahinekanemake a me na keiki a lakou, i ole ai lakou e make i ka pololi; a o keia ka lakou i hana ai, no ka nui o ko lakou poe i pepehi ia.

18. Ano, ua noho pu iho la ka poe kanaka o Limai i kahi hookahi, me ia i hiki ai ia lakou, a malama hoi i ko lakou hua liilii, a me ko lakou mau pua holoholona;

19. A o ke alii hoi, aole oia i hele wale aku iwaho o na pa o ke kulanakauhale, ke ole kona poe koa kiai pu me ia, no ka makau o haula oia iloko o na lima o ko Lamana poe.

20. A kauoha ae la oia i kona poe kanaka e kiai i ka aina a puni, i hiki paha ia lakou ke hopu aku i kela poe kahuna, ka poe i hee aku ai iloko o ka waonahele, ka poe i aihue i na kaikamahine a ko Lamana poe, a o ka poe hoi i hoea mai ai i keia luku nui i hiki maluna o lakou;

21. No ka mea, ua makemake lakou e hopu aku ia lakou la, i hiki ia lakou ke hoopai aku ia lakou la; no ka mea, ua komo mai lakou la iloko o ka aina o Nepai ma ka po, a lawe aku la i ko lakou hua liilii a me na mea he nui o ko lakou mau mea maikai; nolaila, hoomakakiu lakou ia lakou la.

22. Eia kekahi, aole haunaele hou mawaena o ko Lamana poe a me ka poe kanaka o Limai, a hiki loa i ka wa a Amona me kona mau hoahanau i komo ai iloko o ka aina.

23. A aia mawaho o na pukapa ke alii me kona poe koa kiai, a ike aku la oia ia Amona a me kona mau hoahanau; a e kuhi ana oia o na kahuna a Noa lakou, nolaila, kena aku la oia e hopu ia lakou, a hikii ia, a hahao ia iloko o ka halepaahao. A ina o lakou na kahuna a Noa, ina ua kauoha aku oia e pepehi ia lakou;

24. Aka ia ia i ike ai aole o lakou ka, aka o kona mau hoahanau lakou, a ua hiki mai mai ka aina o Zarahemela mai, ua piha oia i ka olioli nui loa.

25. Ano, ua hoouna e aku la ke alii o Limai, mamua o ka hiki ana mai o Amona ma, i kekahi poe kanaka he uuku e imi aku i ka aina o Zarahemela; aka aole i hiki ia lakou ke loaa ia wahi; a ua hili lakou ma ka waonahele.

26. Aka hoi, ua loaa ia lakou kahi aina i piha e i na kanaka; he oiaio, he aina i uhi ia me na iwi maloo; he oiaio, i piha e i na kanaka, a i anai e ia mamua; a ua kuhi iho la lakou o ka aina o Zarahemela ia, a hoi hou mai la i ka aina o Nepai, ua hiki e lakou ma na palena o ka aina he mau la uuku mamua o ka hiki ana mai o Amona ma.

27. A lawe pu mai la lakou i kekahi mooolelo me lakou, he mooolelo hoi ia o ka lahuikanaka no lakou na iwi a lakou i loaa ai; a ua kahakaha ia ia mau mea maluna o na papa gula.

28. Ano, hoopiha hou ia o Limai me ka olioli, ia ia i lohe ai mai ka waha mai o Amona aia i ke alii Mosia he haawina mai ke Akua mai, i hiki ia ia ke hoike mai i ke ano o na kaha me neia; he oiaio, o Amona hoi kekahi i hauoli pu.

29. Aka, ua hoopiha ia o Amona a me kona poe hoahanau me ka eha, no ka nui loa o ko lakou poe hoahanau i pepehi ia ai;

30. A no ka lilo ana hoi o ke alii Noa a me kana poe kahuna i kumu no na kanaka e hana ai i na hewa a me na hala he nui wale i ke Akua; a uwe iho la hoi lakou no ka make ana o Abinadi; a no ka hele ana aku o Alama, a me na kanaka i hele pu me ia, o ka poe i lilo i ekalesia o ke Akua me ka ikaika a me ka mana o ke Akua, a me ka manaoio i na olelo i olelo ia ai e Abinadi;

31. He oiaio, uwe iho la lakou no ko lakou hele ana aku, no ka mea, aole o lakou i ike i kahi a lakou i holo aku ai. Ano, ina ua hiki ia lakou ke hui pu me lakou la, ina ua olioli, no ka mea, ua komo lakou iho iloko o kahi berita me ke Akua, e hookauwa aku nana, a e malama i kana mau kauoha.

32. Ano, mahope o ka hiki ana mai o Amona, ua komo aku ke alii o Limai iloko o kahi berita me ke Akua, a me kekahi poe hoi he nui o kona poe kanaka, e hookauwa aku nana, a e malama i kana mau kauoha.

33. Eia kekahi, ua makemake ke alii o Limai a me na kanaka he nui ona e bapetizo ia; aka aole kekahi mea ma ka aina ia ia ka mana mai ke Akua mai. A makemake ole o Amona e hana i keia mea, e manao ana ia ia iho he kauwa pono ole;

34. Nolaila, aole lakou i hoolilo ia lakou iho i ekalesea ma ia manawa, e kali ana i ka Uhane o ka Haku. Ano, ua makemake lakou e lilo e like me Alama a me kona poe hoahanau, ka poe i holo aku iloko o ka waonahele.

35. Ua makemake lakou e bapetizo ia, i mea hoike a i mea e akaka ai e ae ana lakou e hookauwa aku na ke Akua me ko lakou mau naau a pau; aka hoi, ua hoopanee aku la lakou i ka manawa; a e haawi ia aku auanei ka mooolelo o ko lakou bapetizo ia ana.

36. Ano, e noonoo mau ana o Amona a me kona poe kanaka, a me ke alii Limai a me kona poe kanaka, e hoopakele aku ia lakou iho mailoko aku o na lima o ko Lamana poe, a mai ka noho luhi ana aku.