1. Ano, eia kekahi, he nui na mea o ka hanauna hou i hiki ole ke hoomaopopo mai i na olelo a ke alii Beniamina, he poe keiki liilii i ka wa ana i olelo ae ai i kona poe kanaka; aole lakou i manaoio i ka mooolelo o ko lakou poe makua.

2. Aole lakou i manaoio i ka mea i olelo ia no ke alahouana o ka poe make; aole hoi lakou i manaoio no ka hiki ana mai o Kristo.

3. Ano, no ko lakou hoomaloka, aole i hiki ia lakou ke hoomaopopo mai i ka olelo a ke Akua; a ua hoopaakiki ia na naau o lakou.

4. A, aole lakou i ae e bapetizo ia; aole hoi lakou i ae e hui mai i ka ekalesia. A he poe okoa lakou ma ko lakou manaoio, a noho mau pela ma ia hope aku, ma ko lakou noho kino hewa ana; no ka mea, aole lakou i kahea aku i ka Haku, i ko lakou Akua.

5. Ano, ma ke au ia Mosia, aole e like ko lakou nui me ka hapalua o na kanaka o ke Akua; aka, no ka mokuahana mawaena o na hoahanau, ua mahuahua aku lakou.

6. No ka mea, eia kekahi, hoopunipuni ae la lakou i na mea he nui loa me ka lakou mau olelo malimali, i na mea iloko o ka ekalesia, a ma o lakou la lakou i hana ai i na hewa he nui; nolaila, he mea e pono ai e ao ia ka poe i hana i ka hewa iloko o ka ekalesia, e ka ekalesia.

7. Eia kekahi, ua lawe ia mai la lakou imua o na kahuna, a haawi ia ae la i na kahuna e na kumu; a lawe mai la na kahuna ia lakou imua o Alama, oia no ke kahuna nui.

8. Ano, ua haawi aku la ke alii Mosia ia Alama i ka mana maluna iho o ka ekalesia.

9. Eia kekahi, aole o Alama i ike no lakou, no ka mea, he nui na hoike ku e ia lakou; he oiaio, ku mai la no na kanaka a hoike mai la no ko lakou hala he nui loa.

10. Ano, aole i hiki mai kekahi mea e like me ia mamua, ma ka ekalesia; nolaila, anoninoni iho la o Alama ma kona uhane, a kauoha ae la ia e lawe ia ae lakou imua o ke alii.

11. A i ae la oia i ke alii, Eia hoi kekahi poe he nui a makou i lawe mai ai imua ou, he poe i hoopii ia mai e ko lakou poe hoahanau; he oiaio, a ua loaa lakou ma na hewa he nui. Aole lakou i mihi i ko lakou mau hewa; nolaila, ea, ua lawe mai la makou ia lakou imua ou, i hookolokolo mai ai oe ia lakou e like me ka lakou mau hewa.

12. Aka i aku la ke alii Mosia ia Alama, Aia hoi, aole au e hookolokolo aku ia lakou; nolaila, ke haawi aku nei au ia lakou iloko o kou mau lima e hookolokolo ia ai.

13. Ano, anoninoni hou iho la ka uhane o Alama; a hele aku la oia, a ninau aku la i ka Haku i ka mea ana e hana ai no ua hana nei, no ka mea, hopohopo iho la oia o hana hewa oia imua o ka maka o ke Akua.

14. Eia kekahi, mahope iho o kona ninini ana i kona uhane a pau i ke Akua, hiki mai la ka leo o ka Haku ia ia, i ka i ana,

15. Pomaikai ooe, e Alama, a pomaikai hoi lakou, ka poe i bapetizo ia iloko o na wai o Moramona. Ua pomaikai ooe no kou manaoio ikaika loa ma na olelo wale no a kaʻu kauwa, a Abinadi.

16. A pomaikai hoi lakou, no ko lakou manaoio ikaika loa ma na olelo wale no au i olelo aku ai ia lakou.

17. A pomaikai ooe no kou kukulu ana i ekalesia mawaena o keia poe kanaka; a e hookupaa ia lakou, a e lilo no lakou i poe kanaka noʻu.

18. He oiaio, pomaikai hoi keia poe kanaka, ka poe e ae ana e hali i koʻu inoa; no ka mea, ma koʻu inoa e kapa ia ai lakou; a naʻu no lakou.

19. A no kou ninau ana mai iaʻu no ka mea lawehala, ua pomaikai oe.

20. Ooe no kaʻu kauwa; a ke berita nei au me oe, e loaa auanei ia oe ke ola mau loa; a e hookauwa mai no oe naʻu, a e hele aku ma koʻu inoa; a e houluulu mai i kaʻu poe hipa.

21. A o ka mea e hoolohe mai i koʻu leo, he hipa auanei ia naʻu; a nau ia e hookipa ae iloko o ka ekalesia; a naʻu no hoi ia e hookipa aku.

22. No ka mea, o keia no koʻu ekalesia; o ka mea e bapetizo ia, e bapetizo ia oia i ka mihi. A o ka mea au e hookipa ae ai, nana no e manaoio mai i koʻu inoa; a naʻu no ia e kala oluolu aku;

23. No ka mea, owau no ka mea e lawe ana maluna oʻu i na hewa o ko ke ao nei; no ka mea, owau no ka mea nana i hana ia lakou; a owau no ka mea e haawi ana i ka mea i manaoio a hiki aku i ka hopena, i kahi ma kuu lima akau.

24. No ka mea, ma kuu inoa i kapa ia ai lakou; a ina i ike lakou iaʻu, e puka mai auanei lakou, a e loaa ia lakou kahi mau loa ma kuu lima akau.

25. A e hiki mai keia i ka wa e kani ai ka ka pu elua, alaila e puka mai ka poe i ike ole mai iaʻu, a e ku auanei imua oʻu;

26. Alaila e ike no lakou, owau no ka Haku ko lakou Akua, a owau ko lakou Mea Hoolapanai; aka aole o lakou makemake e hoolapanai ia.

27. Alaila, e hai aku no au ia lakou, aole au i ike ia lakou; a e hele aku no lakou iloko o ke ahi pau ole, i hoomakaukau ia ai no ke diabolo a me kona poe anela.

28. Nolaila, ke i aku nei au ia oe, o ka mea e hoolohe ole mai i koʻu leo, mai hookipa aku oukou ia ia iloko o koʻu ekalesia, no ka mea, aole au e hookipa aku ia ia ma ka la mahope;

29. Nolaila, ke i aku nei au ia oe, o hele; a o ka mea e hana hewa mai ana iaʻu, nau ia e hookolokolo ae e like me na hewa ana i hana ai; a ina e hai mai oia i kona mau hewa imua ou a me aʻu nei, a e mihi ma ka oiaio o kona naau, nau ia e kala aku, a e kala aku no hoi au ia ia;

30. He oiaio, a i na manawa a pau a koʻu poe kanaka e mihi ai, e kala aku no au ia lakou i ko lakou lawehala ana iaʻu.

31. A e kala aku hoi oukou kekahi i kekahi i ko oukou mau hala; no ka mea, he oiaio kaʻu e olelo aku nei ia oe, o ka mea e kala ole ae i ka kona hoalauna lawehala ana, ia ia e olelo ai ua mihi oia, oia ka i lawe ia ia iho malalo iho o ka hoohewa ia ana.

32. Ano, ke i aku nei au ia oe, o hele; a o ka mea e mihi ole i kona mau hewa, oia ke helu pu ole ia mawaena o koʻu poe kanaka; a e malama ia keia mea mai keia wa aku.

33. Eia kekahi, ia Alama i lohe ai i keia mau olelo, palapala iho la oia ia mau mea, i paa ua mau mea nei ia ia, a e hiki ia ia ke hookolokolo i na kanaka o ua ekalesia la e like me na kauoha a ke Akua.

34. Eia kekahi, hele aku la o Alama a hookolokolo iho la i ka poe i loaa ai ma ka hewa, e like me ka olelo a ka Haku.

35. A o ka poe i mihi i ko lakou mau hewa a i hai mai ia mau mea, o lakou kana i helu pu ai mawaena o ka poe kanaka o ka ekalesia;

36. A o ka poe i hai ole mai i ko lakou mau hewa a i mihi ole i ka lakou hala, aole lakou i helu pu ia mawaena o ka poe kanaka o ka ekalesia, a ua holoi ia aku na inoa o lakou.

37. A eia kekahi, hooponopono iho la o Alama i na hana a pau o ka ekalesia, a hoomaka hou ae la lakou e loaa ke kuapapa nui a me ka pomaikai nui loa ma na mea o ka ekalesia; e hele pololei ana imua o ke Akua; e loaa ana na mea he nui wale, a e bapetizo ana i na mea he nui wale.

38. Ano, na Alama a me kona poe hoalawehana i hana i ua mau mea nei a pau, ka poe i noho ai maluna iho o ka ekalesia; e hele ana ma ka ikaika a pau; e ao aku ana i ka olelo a ke Akua ma na mea a pau; e loaa ana na ano a pau o na popilikia; i hana ino ia mai e ka poe a pau i hui ole me ka ekalesia o ke Akua;

39. A ao aku la lakou i ko lakou poe hoahanau; a o lakou hoi kekahi i ao ia mai, kela mea keia mea, ma ka olelo a ke Akua, e like me kona mau hewa, a me kona hala ana i hana ai; i kauoha ia ai e ke Akua e pule hooki ole, a e hoalohaloha aku ma na mea a pau.