1. A eia kekahi, loaa iho la ia Amulona ka oluolu imua o na maka o ke alii o ko Lamana poe; nolaila, ae aku la ke alii ia ia a me kona poe hoahanau, e hoolilo ia i poe kumu maluna iho o kona poe kanaka; he oiaio, maluna iho o na kanaka ma ka aina o Semalona, a ma ka aina o Sailoma, a ma ka aina o Amulona.

2. No ka mea, ua loaa i ko Lamana poe ua mau aina nei; nolaila, ua hoonoho iho ke alii o ko Lamana poe i mau alii maluna o ua mau aina nei a pau.

3. Ano, o Lamana ka inoa o ke alii o ko Lamana poe, i kapa ia ai mamuli o ka inoa o kona makuakane; a nolaila, ua kapa ia oia o ke alii Lamana. A he alii oia maluna o kahi lahuikanaka he kinikini;

4. A hoonoho aku la oia i na kumu maiwaena mai o na hoahanau o Amulona, ma kela aina keia aina i noho ia e kona poe kanaka; a pela i hoomaka ai ka olelo a Nepai e ao ia mawaena o na kanaka o ko Lamana poe.

5. A he lahuikanaka oluolu lakou kekahi me kekahi; aka hoi, aole lakou i ike i ke Akua; aole hoi i ao aku na hoahanau o Amulona ia lakou i kekahi mea no ka Haku, no ko lakou Akua, aole hoi i ke kanawai o Mose; aole hoi i ao aku ia lakou i na olelo a Abinadi;

6. Ao aku la lakou ia lakou la e kakau i ko lakou la mooolelo, a na lakou la e palapala kekahi i kekahi.

7. A pela ko Lamana poe i hoomaka ai e mahuahua aku ma ka waiwai, a e kalepa aku kekahi me kekahi, a mahuahua nui, a hoomaka ae la e lilo i lahuikanaka maalea a akamai, ma ke akamai o ke ao nei; he oiaio, he lahuikanaka maalea loa; e lealea ana ma kela ano keia ano o ka hewa a me ka hao wale, koe nae mawaena o ko lakou poe hoahanau iho.

8. Eia kekahi, hoomaka ae la o Amulona e hoohana i kona mana kaumaha maluna o Alama a me kona poe hoahanau, a hoomaka ae la oia e hoomaau mai ia ia, a hookonokono ae la i kana poe keiki e hoomaau mai i ka lakou poe keiki;

9. No ka mea, ike mai la o Amulona ia Alama, a ike mai la hoi o kekahi o ka ke alii poe kahuna oia mamua, a oia hoi ka mea i manaoio i na olelo a Abinadi, a i hoohee ia mai ai mai ke alo aku o ke alii; a nolaila, ua huhu mai la oia ia ia, no ka mea, malalo iho oia o ke alii Lamana; aka nae hoohana oia i kona mana maluna o lakou, a kau mai i na hana maluna o lakou, a hoonoho mai la i na luna hooluhi maluna o lakou.

10. A eia kekahi, no ka nui o ko lakou mau popilikia, hoomaka ae la lakou e kahea ikaika i ke Akua.

11. A kauoha mai la o Amulona ia lakou e hooki iho i ko lakou hea ana; a hoonoho mai la oia i na koa e makai ia lakou, a o ka mea i loaa ai e kahea ana i ke Akua, e pepehi ia oia.

12. A, aole, o Alama a me kona poe kanaka i hookiekie aku i ko lakou mau leo i ka Haku, i ko lakou Akua, aka ninini aku la lakou i ko lakou mau naau ia ia; a ua ike mai la oia i na manao o ko lakou mau naau.

13. Aka, eia kekahi, hiki mai la ka leo o ka Haku ia lakou iloko o na popilikia o lakou, i ka i ana, E, e hoea mai i na poo o oukou, a e hoolana hoi oukou, no ka mea, ua ike au i ka berita a oukou i hana mai ai iaʻu; a e hana aku au i berita me koʻu poe kanaka, a e hoopakele aku ia lakou mailoko aku o ka noho luhi ana.

14. A e hoomama no hoi au i na ukana kaumaha i hookau ia maluna iho o ko oukou mau poohiwi, i ole ai e hiki ia oukou ke ike ia mau mea maluna iho o na kua o oukou, oiai oukou iloko o ka luhi; a o keia kaʻu e hana ai, i ku auanei oukou i poe hoike noʻu, a i ike lea oukou, e hele ana owau, ka Haku ke Akua, i koʻu poe kanaka iloko o ko lakou mau popilikia.

15. Ano, eia kekahi, o na ukana kaumaha i hookau ia maluna iho o Alama a me kona poe hoahanau, ua hoomama ia ia mau mea; he oiaio, hooikaika mai la ka Haku ia lakou i hiki ai ia lakou ke hapai aku i ko lakou mau ukana kaumaha me ka oluolu, a ae aku la lakou me ka manaolana a me ke ahonui i ka makemake a pau o ka Haku.

16. Eia kekahi, no ka nui o ko lakou manaoio a me ko lakou hoomanawanui, hiki hou mai la ka leo o ka Haku ia lakou, me ka i ana, E hoolana i ka manao, no ka mea i ka la apopo e hoopakele no au ia oukou mailoko aku o ka noho luhi ana.

17. A i aku la oia ia Alama, e hele aku oe imua o keia poe kanaka, a e hele pu au me oe, a e hoopakele aku i keia poe kanaka mailoko aku o ka noho luhi ana.

18. Ano, eia kekahi, houluulu mai la o Alama a me kona poe kanaka ma ka po, i na pua holoholona o lakou, a i ko lakou hua liilii hoi; he oiaio, a pau ae la ka po i houluulu pu ai lakou i na pua holoholona o lakou.

19. A i kakahiaka ae, hookau ae la ka Haku i ka hiamoe nui maluna o ko Lamana poe, he oiaio, ua pauhia ko lakou poe luna hooluhi i ka hiamoe loa.

20. A haele aku la o Alama a me kona poe kanaka iloko o ka waonahele; a ia lakou i hele aku ai a pau ae la ka la, kukulu iho la lakou i na halelewa o lakou iloko o kekahi awawa, a kapa aku la lakou ia wahi o ke awawa o Alama, no ka mea, alakai ae la oia ia lakou ma ka waonahele;

21. He oiaio, a ma ke awawa lakou i ninini aku ai i ko lakou aloha i ke Akua, no ka mea, ua lokomaikai mai oia ia lakou, a ua hoomaha mai la i ko lakou mau ukana kaumaha, a ua hoopakele mai la oia ia lakou mailoko aku o ka luhi; no ka mea, iloko o ka noho luhi ana lakou, a, aole i hiki i kekahi mea ke hoopakele mai ia lakou, ke ole ka Haku ko lakou Akua.

22. A aloha aku la lakou i ke Akua, he oiaio, ka poe kane a pau o lakou, a me ka lakou poe wahine a pau, a me ka poe keiki a pau a lakou i hiki ke olelo, hookiekie ae la i ko lakou mau leo i ka hiilani aku i ko lakou Akua.

23. Ano, i mai la ka Haku ia Alama, E wikiwiki oe a hele aku oe a me keia poe kanaka mawaho o keia aina, no ka mea, ua ala ae la ko Lamana poe, a ke alualu nei ia oukou; nolaila, e hele aku oukou iwaho o keia aina, a naʻu auanei e kaohi i ko Lamana poe ma ua awawa nei, i alualu hou ole aku ai lakou i keia poe kanaka.

24. A eia kekahi, haele aku la lakou mawaho o ke awawa, a hele aku la iloko o ka waonahele.

25. A ia lakou ma ka waonahele he umikumamalua la, hiki aku la lakou i ka aina o Zarahemela; a hookipa ae la no hoi ke alii Mosia ia lakou me ka olioli.