1. Ano, eia kekahi, no ka nui loa o na hana ino i hoili ia mai maluna o ka ekalesia, e na mea hoomaloka, hoomaka ae la ka ekalesia e ohumu, a e hoopii ae i na luna o lakou no ia mea; a hoopii mai la lakou ia Alama. A waiho iho la o Alama i keia mea imua o ko lakou alii, o Mosia. A kuka pu iho la o Mosia me kana poe kahuna.

2. Eia kekahi, hoouna ae la ke alii o Mosia i olelo hoolaha mawaena o ka aina a puni, i hoomaau ole aku ai kekahi o ka poe hoomaloka i kekahi o ka poe i pili aku i ka ekalesia o ke Akua;

3. A ua kauoha ikaika ia mawaena o na ekalesia a pau, i ole ai na hoomaau ana mawaena o lakou; i noho like ai na kanaka a pau;

4. I ole ai lakou e ae aku i ka haaheo, a i ka hookiekie e hoopau ai i ko lakou maluhia; i manao ai hoi kela kanaka keia kanaka i kona hoalauna me ia ia ia iho, e hana ana me ko lakou mau lima iho no ko lakou ola;

5. He oiaio, a na ko lakou poe kahuna a me ko lakou poe kumu a pau e hana me ko lakou mau lima iho no ko lakou ola, ma na wa a pau, koe wale no ka manawa mai a me ka wa hune maoli; a i ka hana ana i ua mau mea nei, ua lako lakou ma ka lokomaikai o ke Akua.

6. A hoomaka ae la ka maluhia hou ma ka aina; a hoomaka ae la na kanaka e lehulehu loa aku, a hoomaka ae la e hele palahalaha aku maluna iho o ka ili o ka honua, he oiaio, ma ka akau a ma ka hema, ma ka hikina a ma ke komohana, e kukulu ana i na kulanakauhale nui a me na kauhale ma na kihi a pau o ka aina.

7. A kokua mai la ka Haku ia lakou, a hoopomaikai iho la ia lakou, a lilo lakou i lahuikanaka nui a waiwai.

8. Ano, ua helu pu ia na keiki a Mosia mawaena o na mea hoomaloka; a o kekahi hoi o na keiki a Alama i helu pu ia mawaena o lakou, ua kapa ia oia o Alama, mamuli o kona makuakane; aka hoi, lilo iho la oia i kanaka hewa loa a hoomana kii. A he kanaka oia o na olelo he nui wale, a olelo malimali nui aku la oia i na kanaka; nolaila, alakai aku la oia i na mea he nui o na kanaka e hana mamuli o ke ano o kona mau hewa.

9. A lilo iho la oia i mea i alalai nui ai i ka pomaikai o ka ekalesia o ke Akua; e aihue aku ana i na naau o na kanaka; e hookomo ana i ke ku e nui mawaena o na kanaka; e wehe ana i ka puka no ka enemi o ke Akua e hana mai me kona mana maluna o lakou.

10. Ano, eia kekahi, oiai oia e hele aku ana e hoohiolo i ka ekalesia o ke Akua; no ka mea, hele malu aku la oia me na keikikane a Mosia, e imi ana e hoohiolo i ka ekalesia, a e alakai hewa i na kanaka o ka Haku, me ke ku e i na kanawai o ke Akua, a o ke alii no hoi;

11. A me aʻu i aku ai ia oukou, oiai e hele ana lakou e kipi ana i ke Akua, aia hoi! Ikea aku la ka anela a ka Haku e lakou; a iho iho la oia me he mea la iloko o kahi ao; a olelo mai la oia me he mea la o ka leo o ka hekili, a hoonaueue ae la ia i ka honua a lakou i ku iho ai;

12. A no ka nui loa o ko lakou pihoihoi, hina iho la lakou i ka honua, a hoomaopopo ole i na olelo ana i olelo mai ai ia lakou.

13. Aka hoi, kahea hou mai la ia, i ka i ana, E Alama, e ala ae a e ku mai, e, no ke aha oe i hoomaau mai ai i ka ekalesia o ke Akua? No ka mea, ua olelo mai ka Haku, O keia no koʻu ekalesia, a e hookupaa aku ai ia ia, aole loa kekahi mea e hoohiolo ia ia, ke ole ia ka hewa o koʻu poe kanaka.

14. A eia hou, i mai la ka anela, Aia hoi, ua lohe iho la ka Haku i na pule a kona poe kanaka, a me na pule hoi a kana kauwa a Alama, oia no kou makuakane; no ka mea, ua pule aku la oia me ka manaoio nui nou, i lawe ia ai oe i ka ike i ka oiaio; nolaila, ea, ua hele mai nei au e hoomaopopo aku ia oe no ka mana a me ka makaukau o ke Akua, i hooko ia ai na pule o kana mau kauwa e like me ko lakou manaoio.

15. Ano hoi, e hiki anei ia oe ke hoole mai i ka mana o ke Akua? No ka mea, aia hoi, aole anei i hoohaalulu ae kuu leo i ka honua? Aole anei oe i ike mai hoi iaʻu imua ou? A ua hoouna ia mai nei au mai ke Akua mai.

16. Ano, ke i aku nei au ia oe, o hele, a e hoomanao i ka noho pio ana o kou mau makua ma ka aina o Helama a ma ka aina o Nepai; a e hoomanao i na mea nui ana i hana ai no lakou; no ka mea, iloko o ka noho luhi ana lakou, a ua hoopakele iho la oia ia lakou. Ano, ke i aku nei au ia oe, e Alama, e hele aku i kou ala, a e imi hou ole e hoohiolo aku i ka ekalesia ma neia hope aku, i hooko ia ai ka lakou mau pule; a e hana i keia ina paha e makemake ana oe e hoolei ia aku nou iho.

17. Ano, eia kekahi, o ua mau olelo nei oia na olelo hope a ka anela i olelo mai ai ia Alama, a hele aku la.

18. Ano, hina hou iho la o Alama, a me ka poe pu me ia, i ka honua, no ka mea, nui iho la ko lakou pihoihoi; no ka mea, me ko lakou mau maka ponoi i ike ai lakou i kahi anela a ka Haku; a o kona leo me he hekili la ia, i hoonaueue ai i ka honua; a ua ike lakou aohe kekahi mea, ke ole ia ka mana o ke Akua, i hiki ai ke hoonaueue i ka honua a e hoohaalulu ia ia, me he mea la e kaawale aku ia.

19. Ano, no ka nui o ka pihoihoi o Alama, lilo iho la oia i aa, i hiki ole ai ia ia ke oaka ae i kona waha; he oiaio, a nawaliwali iho la oia, i hiki ole ai ke oni i kona mau lima; nolaila, lawe ia oia e ka poe pu me ia, a kaikai ia me ka maule, a hiki aku i kahi ona i waiho ia ai imua o kona makuakane.

20. A hai ae la lakou i kona makuakane i na mea a pau i hiki mai ai ia lakou; a hauoli iho la kona makuakane, no ka mea, ua ike oia o ka mana o ke Akua no ia.

21. A houluulu mai la oia i na kanaka he nui loa, i ike ai lakou i ka mea a ka Haku i hana mai ai no kana keiki, a no lakou hoi ka poe i hele pu me ia.

22. A kauoha ae la oia i na kahuna e houluulu mai ia lakou iho; a hoomaka ae la lakou e hooke ai a e pule aku i ka Haku, i ko lakou Akua, nana e hooaka ae i ka waha o Alama, i hiki ai ia ia ke olelo; a i hiki ai hoi i kona mau lala ke loaa ko lakou ikaika, i hookaakaa ia ai na maka o na kanaka e ike a e hoomaopopo i ka lokomaikai a me ka nani o ke Akua.

23. Eia kekahi, mahope iho o ko lakou hooke ai ana a pule ana no na la elua a me na po elua, loaa iho la i na lala o Alama ko lakou ikaika, a ku ae la oia iluna a hoomaka ae la e olelo aku ia lakou, e hai ana ia lakou e hoolana;

24. No ka mea, wahi ana, ua mihi iho la au i koʻu mau hewa, a ua hoolapanai ia mai e ka Haku; aia hoi, ua hanau mai au i ka Uhane.

25. A i mai la ka Haku iaʻu, Mai kahaha kou naau, e hanau hou ia mai na kanaka a pau e pono ai, he oiaio, na kane, a me na wahine, na lahuikanaka a me na ohana, o na olelo a me na kanaka a pau; he oiaio, e hoohanau ia mai e ke Akua, e hoomalule ia ae mai ko lakou noho kino a haule ana, i ka noho hemolele ana, i hoolapanai ia mai e ke Akua, e lilo ana i poe keikikane a i poe kaikamahine nana;

26. A pela lakou i lilo ai i poe hou; a i ole lakou e hana i keia, aole loa e hiki ia lakou ke loaa ke aupuni o ke Akua.

27. Ke i aku nei au ia oukou, i ole ai keia e hana ia, e hoole ia aku lakou e pono ai; a ua ike au i keia, no ka mea, ua kokoke au e hoolei ia aku.

28. Aka hoi, mahope iho o ka auwana ana mawaena o ka popilikia nui, e mihi ana a kokoke i ka make, ma ke aloha ka Haku i ike ai he pono ke kaili mai iaʻu mailoko mai o kahi aa mau loa ana, a ua hoohanau ia mai au e ke Akua;

29. Ua hoola ia mai kuu uhane mailoko mai o ke au awaawa a me na mea paa o ka hewa. Ma ka lua hohonu pouli loa no au; aka, ano, ke ike nei au i ka malamalama kupaianaha o ke Akua. Ua hoowalania ia mai la koʻu uhane me ka ehaeha mau loa; aka ua kaili ia mai au, aohe i hoowalania hou ia koʻu uhane.

30. Hoomalau aku la au i koʻu Mea Hoolapanai, a hoole aku la i ka mea i olelo ia ai e ko kakou poe kupuna; aka, ano hoi, i hiki ai ia lakou ke ike e mamua e hiki mai auanei no ia, a e hoomanao ana oia i kela mea i keia mea ana i hana ai, e hoike mai oia ia ia iho i na mea a pau;

31. He oiaio, e kukuli iho no auanei kela kuli keia kuli, a e ae mai auanei kela alelo keia alelo imua ona. He oiaio, ma ka la mahope, i ka wa e ku ai na kanaka e hookolokolo ia e ia, alaila e ae mai lakou oia no ke Akua; alaila, e ae mai lakou, ka poe i noho me ke Akua ole ma ke ao nei, ua pono ka hoopai ana o ka hoopai mau loa maluna o lakou; a e naueue, a e haalulu lakou, a e emi iho malalo o ka leha ana o kona maka ike i na mea a pau.

32. Ano, eia kekahi, ma keia manawa aku, hoomaka ae la o Alama a me ka poe pu me ia, i ka wa i ikea ka anela e lakou, e ao aku i na kanaka; e kaahele ana a puni mawaena o ka aina a pau, e hoolaha ana i na kanaka a pau i na mea a lakou i lohe ai a i ike ai hoi, a e hai ana i ka olelo a ke Akua iloko o ka popilikia nui, i hoomaau nui ia mai ai e ka poe hoomaloka, i papai ia mai ai e na mea he nui o lakou;

33. Aka me ua mau mea nei nae a pau, haawi aku la lakou i ka oluolu nui i ka ekalesia, e hoapaa ana i ko lakou manaoio, a e kauleo ana ia lakou me ke ahonui loihi a me ka hana luhi, e malama i na kauoha a ke Akua.

34. A eha o lakou na keiki a Mosia; a o Amona, a me Aarona, a o Omanera, a me Himinai ko lakou mau inoa; oia no na inoa o na keiki a Mosia.

35. A hele aku la lakou mawaena o ka aina a pau o Zarahemela, a mawaena o na kanaka a pau e noho ana malalo iho o ke au o ke alii Mosia, e hooikaika loa ana e papani hou i na poino a lakou i hana aku ai i ka ekalesia; e hai ana i ko lakou mau hewa, a e hoolaha ana i na mea a pau a lakou i ike ai, a e wehewehe ana i na wanana a me na palapala hemolele i ka poe a pau e makemake ana e hoolohe mai i ua mea nei;

36. A pela lakou i lilo ai i mau mea hana ma na lima o ke Akua, i ka lawe ana mai i na mea he nui i ka ike i ka oiaio, he oiaio, i ka ike i ko lakou Mea Hoolapanai.

37. E, nani ka pomaikai o lakou! No ka mea, hoolaha aku la lakou i ka malu; hoolaha aku la no lakou i ka olelo maikai o ka olioli; a hai aku la lakou i na kanaka ke noho alii nei ka Haku.