1. He oiaio, aole anei o Isaia hoi i olelo mai, Owai ka mea manaoio i ka makou hoike ana, a ia wai la i hoike ia aku ai ka lima o ka Haku?

2. No ka mea, e ulu mai no oia imua ona me he oha la, e like hoi me ke aa kupu mailoko mai o ka lepo maloo; aole ona maikai o ke kino, aole ona hanohano; a ia kakou e ike aku ai ia ia, aole ona helehelena maikai i makemake aku ai kakou ia ia.

3. Ua hoowahawaha ia oia, a ua haalele ia hoi e na kanaka; he kanaka eha, a ua ike oia i ka popilikia; a huna kakou me he mea la i ko kakou maka mai ona aku; ua hoowahawaha ia oia, a manao ole hoi kakou ia ia.

4. He oiaio no, ua kaikai no oia i ko kakou mau popilikia, ua halihali no oia i ko kakou mau eha; aka, manao aku kakou ia ia ua papai ia, ua hahau ia e ke Akua, a hookaumaha ia.

5. Aka, ua hou ia oia no ko kakou mau hewa, ua paopao ia oia no ko kakou mau hala; maluna ona ka hoopai ana no ko kakou malu; a me kona hahau ia ana ua hoola ia mai kakou.

6. Ua hele hewa kakou a pau, e like me na hipa; ua huli kela mea keia mea i kona aoao iho; a ua hoouka no ka Haku maluna ona i ka hewa o kakou a pau.

7. Ua hoino ia oia, a ua hoopilikia ia oia, aole nae i ekemu ae kona waha; e like me ke keikihipa, ua alakai ia oia i ka make, a e like hoi me ka hipa i pane ole imua o ka mea nana ia e ako, pela no oia aole i ekemu ae kona waha.

8. Ua lawe ia aku la oia, mai ka paa ana, a mai ka hoopai ia hoi; a owai la ka mea e hai i kona hanauna? No ka mea, ua hooki ia aku oia mai ka aina o ka poe ola aku; no ka hewa o koʻu poe kanaka ia i hahau ia ai.

9. Hana iho la oia i kona lua kupapau me ka poe hewa, a me ka poe waiwai hoi i kona make; no ka mea, aole oia i hana i ka mea hewa, aohe hoi hoopunipuni ma kona waha.

10. Aka, manao no ka Haku e paopao ia ia; ua hoeha oia ia ia; i ka wa e haawi aku ai oe i kona uhane i mohai hala, e ike no oia i kana hua, a e hooloihi no oia i kona mau la, a e pomaikai auanei ka makemake o ka Haku ma kona mau lima.

11. E ike aku no oia no ka luhi ana o kona uhane, a e oluolu oia; ma kona ike ana e hoapono no kaʻu kauwa hemolele i na mea he nui; no ka mea, nana no e amo i ko lakou mau hewa.

12. Nolaila, e mahele aku au nana he wahi haawina me ka poe koikoi, a nana no e mahele i ka waiwai pio me ka poe ikaika; no ka mea, ua ninini aku oia i kona Uhane i ka make; a ua helu pu ia oia me ka poe lawehala; a lawe no oia i ka hewa o na mea he nui, a uwao aku la oia no ka poe i lawehala.