1. Ano, i ka wa a ke alii i lohe ai i keia mau olelo, i aku la oia i kana poe kahuna, E lawe aku i keia kanaka, a e pepehi ia ia; no ka mea, heaha la ka kakou e hana ai me ia, ua hehena oia.

2. A ku mai la lakou a hoao iho la e kau mai i ko lakou mau lima maluna ona; aka, pale aku la oia ia lakou, a i aku la ia lakou.

3. Mai hoopa mai iaʻu, no ka mea, e hahau mai no ke Akua ia oukou ina e kau mai oukou i ko oukou mau lima maluna oʻu, no ka mea aole au i hai aku i ka olelo a ka Haku i hoouna mai ai iaʻu e hai; aole hoi au i hai aku i ka mea a oukou i makemake ai iaʻu e hai aku; nolaila, aole e ae mai ke Akua e pepehi ia au i keia manawa.

4. Aka, he pono iaʻu ke hooko aku i na kauoha a ke Akua, ana i kauoha mai ai iaʻu, a no kuu hai ana aku ia oukou i ka oiaio, ua huhu mai oukou iaʻu. A eia hou, no kaʻu olelo ana i ka olelo a ke Akua, ua manao mai oukou ua hehena au.

5. Ano, eia kekahi, mahope iho o ka Abinadi olelo ana i keia mau olelo, aole i aa na kanaka o Noa ke alii e kau mai i ko lakou mau lima maluna ona; no ka mea, maluna ona ka Uhane o ka Haku; a alohi aku la kona maka me ke alohilohi nui, e like me ko Mose, oiai ma ka mauna o Sinai, ia ia i olelo ai me ka Haku.

6. A olelo aku la oia me ka ikaika a me ka mana mai ke Akua mai; a hoomau aku la oia i kana olelo, i ka i ana,

7. Ke ike nei oukou aole oukou mana e pepehi mai iaʻu, nolaila, ke hai aku nei au, a pau ka olelo aʻu i kauoha ia mai ai. He oiaio, a ke ike nei au ke hou nei ia mea ia oukou i ko oukou mau naau, no kaʻu hai ana ia oukou i ka oiaio no ka oukou mau hala:

8. He oiaio, a ke hoopiha nei kaʻu mau olelo ia oukou me ke kahaha, a me ka pihoihoi, a me ka huhu.

9. Aka ke hai aku nei au i kaʻu olelo a pau aʻu i kauoha ia mai ai; alaila, he mea ole kahi aʻu e hele aku ai, ina e hoola ia au.

10. Aka, eia kaʻu e hai aku nei ia oukou: O ka mea a oukou e hana mai ai iaʻu, mahope aku o keia, e lilo ia i hoailona a he aka hoi o na mea e hiki mai ana.

11. Ano, ke heluhelu aku nei au ia oukou i ke koena o na kauoha a ke Akua, no ka mea, ke ike nei au aole i kakau ia lakou ma ko oukou mau naau; ke ike nei au ua noonoo oukou a ao aku la i ka hewa, i ka hapa nui o ko oukou ola ana.

12. Ano, ke hoomanao nei oukou ua olelo aku la au ia oukou, mai hana oe i ke kii i kalai ia nou, aole ma ka like ana o kekahi mea i ka lani iluna, a me na mea i ka honua ilalo, a maloko hoi o ka wai malalo o ka honua.

13. A eia hou: Mai hookulou oe ia oe iho ilalo ia lakou, aole hoi e hookauwa na lakou; no ka mea, owau no ka Haku o kou Akua, he Akua lili, e hoopai ana i ka na makua hala i na keiki, a hiki aku i ke kuakahi a me ke kualua o ka poe e inaina mai iaʻu;

14. A e aloha ana i na tausani o ka poe e aloha mai iaʻu, a e malama hoi i koʻu mau kanawai.

15. Mai hoopuka wale oe i ka inoa o ka Haku kou Akua me ke kumu ole; no ka mea, aole loa e hoapono ka Haku i ka mea e hoopuka i kona inoa, me ke kumu ole.

16. E hoomanao i ka la Sabati, a e hoano ia la.

17. I na la eono e hana oe, a e hana ai i kau hana a pau;

18. Aka, i ka hiku o ka la, o ka Sabati ia o ka Haku o kou Akua, aole loa oe e hana i kekahi hana, aole oe, aole hoi kau keikikane, aole hoi kau kaikamahine, aole hoi kau kauwakane, aole hoi kau kauwawahine, aole hoi kou holoholona, aole hoi kou kanaka e ma kou mau ipuka;

19. No ka mea, i na la eono i hana ai o ka Haku i ka lani, a me ka honua, a me ke kai, a me na mea a pau maloko o ia mau mea; nolaila hoi i hoomaikai ai o ka Haku i ka la Sabati, a hoano ai hoi oia ia la.

20. E hoomaikai aku oe i kou makuakane, a me kou makuwahine; i loihi ai kou mau la maluna o ka aina a ka Haku a kou Akua i haawi mai ai ia oe.

21. Mai pepehi kanaka oe.

22. Mai moekolohe oe. Mai aihue oe.

23. Mai hoike hoopunipuni oe e hewa ai kou hoalauna.

24. Mai kuko oe i ka hale o kou hoalauna, mai kuko oe i ka wahine a kou hoalauna, aole hoi i kana kauwakane, aole hoi i kana kauwawahine, aole hoi i kona bipi, aole hoi i kona hoki, aole hoi i kekahi mea a kou hoalauna.

25. Eia kekahi, mahope iho o ka hoopau ana o Abinadi i keia mau olelo, i aku la oia ia lakou, Ua ao aku la anei oukou i keia poe kanaka, e hoolohe lakou a e hana i keia mau mea a pau? E malama aku i keia mau kanawai?

26. Ke i aku nei au ia oukou, aole; no ka mea, ina ua ao aku oukou, ina aole ka Haku i kauoha mai iaʻu e hele mai a e wanana ino no keia poe kanaka.

27. Ano, ua i mai oukou, E hiki mai ana ke ola ma ke kanawai o Mose. Ke i aku nei au ia oukou, he mea e pono ai no oukou e malama i ke kanawai o Mose i keia manawa; aka, ke i aku nei au ia oukou, e hiki mai auanei ka manawa, e pono ole ai ke malama hou i ke kanawai o Mose.

28. A eia hoi, ke i aku nei au ia oukou, aole i hiki mai ke ola ma ke kanawai wale no; a ina aole no ke kalahala ana a ke Akua ponoi iho e hana mai ai, no na hewa a me na hala o kona poe kanaka, ina ua make loa lakou me ka pale ole ae me ke kanawai o Mose pu nae.

29. Ano, ke i aku nei au ia oukou, ua ku pono e haawi ia mai i kanawai i ka poe mamo a Iseraela, he oiaio, he kanawai ikaika; no ka mea, he lahuikanaka ai oolea lakou; hiki wawe e hana i ka hewa, a lohi e hoomanao i ka Haku i ko lakou Akua;

30. Nolaila, ua haawi ia mai i kanawai ia lakou, he oiaio, he kanawai o na mea e hana ia a me na oihana; he kanawai e malama pono loa ai lakou, ia la aku ia la aku, e paipai ia lakou e hoomanao i ke Akua, a me ka lakou hana ia ia.

31. Aka hoi, ke i aku nei au ia oukou, o keia mau mea a pau he mau hoailona lakou o na mea e hiki mai ana.

32. Ano, ua hoomaopopo anei lakou i ke kanawai? Ke i aku nei au ia oukou, aole, aole lakou a pau i hoomaopopo i ke kanawai; a o keia no ka paakiki o ko lakou mau naau; no ka mea, aole lakou i hoomaopopo aole e hiki i kekahi kanaka ke hoola ia, ke ole ia ma o ka hoolapanai ana la o ke Akua.

33. No ka mea, aia hoi, aole anei o Mose i wanana mai ia lakou no ka hiki ana mai o ka Mesia, a e hoola auanei ke Akua i kona poe kanaka, he oiaio, a o na kaula hoi kekahi a pau, ka poe i wanana mai mai ka makamua mai o ke ao nei? Aole anei lakou i olelo mai i uuku paha i nui paha no keia mau mea?

34. Aole anei lakou i olelo mai, E iho mai auanei ke Akua, oia iho, mawaena o na keiki a kanaka, a e lawe ae maluna ona i ke ano o kanaka, a e hele aku ma ka mana ikaika maluna o ka ili o ka honua?

35. He oiaio, aole anei lakou i olelo mai no hoi, nana e lawe mai auanei i ke alahouana o ka poe make, a e hookaumaha ia a e hoopilikia oia?