1. Ano, eia kekahi, i wa a ke alii o Beniamina i hooki aku ai i ka olelo ana i na olelo i haawi ia mai ai ia ia, e ka anela o ka Haku, alawa ae la oia i kona mau maka a puni maluna o ka lehulehu o kanaka, a, aia hoi, ua haule iho lakou i ka honua, no ka mea, ua kau mai ka makau o ka Haku maluna o lakou;

2. A ua nana lakou ia lakou iho ma ko lakou noho kino ana, he uuku loa malalo iho o ka lepo o ka honua. A hooho aku la lakou me ka leo hookahi, i ka i ana, E aloha mai, a e hoopili mai i ke koko kalahala o Kristo, i loaa mai ai ia makou ke kala ia ana o ko makou mau hala, a i hoomaemae ia ai ko makou mau naau; no ka mea, ke manaoio nei makou ia Iesu Kristo, ke Keiki a ke Akua, ka mea nana i hana i ka lani a me ka honua, a me na mea a pau; ka mea e iho mai ana mawaena o na keiki a kanaka.

3. Eia kekahi, mahope iho o ka lakou olelo ana i keia mau olelo, kau mai la ka Uhane o ka Haku maluna o lakou, a ua hoopiha ia lakou me ka hauoli, me ka loaa ana ke kala ia ana o ko lakou mau hala, a me ka maha o ko lakou mau lunaikehala, no ka manaoio nui loa o lakou ia Iesu Kristo, ka mea e hele mai ana, e like me na olelo a Beniamina ke alii i olelo mai ai ia lakou.

4. A oaka hou ae la o Beniamina ke alii i kona waha, a hoomaka ae la e olelo ia lakou, i ka i ana, E oʻu poe hoaloha a me oʻu poe hoahanau, oʻu ohana a me oʻu poe kanaka, ke makemake hou nei au e maliu mai oukou, i lohe oukou a i hoomaopopo i ke koena o kaʻu mau olelo aʻu e olelo aku ai ia oukou;

5. No ka mea, aia hoi, ina ua hoala mai ka ike o ka lokomaikai o ke Akua ia oukou i neia manawa e ike i ko oukou ole, a me ko oukou noho haule a maikai ole ana;

6. Ke i aku nei au ia oukou, ina ua hiki aku oukou i ka ike i ka lokomaikai o ke Akua, a me kona mana like ole, a me kona naauao, a me kona ahonui, a me kona hoomanawanui i na keiki a kanaka, a i ke kalahala hoi i hoomakaukau ia mai mai ka hookumu ia ana mai o ka honua nei, i hiki mai ai ke ola ma o ia mea la i ka mea e paulele ana i ka Haku, a e molowa ole ana ma ka malama ana i kana mau kauoha, a e hoomau ma ka manaoio a hiki i ka hopena o kona ola; ke pili nei kaʻu i ke ola o ke kino make;

7. Ke i aku nei au, o keia no ke kanaka e loaa ana ke ola, ma o ke kalahala la i hoomakaukau ia ai mai ka hookumu ia ana mai o ke ao nei, no na kanaka a pau, ka poe i ola mahope mai o ka haule ana o Adamu, a e ola nei no hoi, a e ola ana paha ma neia hope aku, a hiki loa i ka hopena o ke ao nei;

8. A ma o keia mau mea la e hiki mai ana ke ola. Aole kekahi ola e ae, o keia wale no, ka mea i olelo ia ai; aole hoi kekahi hana e ae ma o ia mea la i hiki ai i ke kanaka ke hoola ia, koe wale no ka hana aʻu i hai aku ai ia oukou.

9. E manaoio i ke Akua; e manaoio ke ola la oia, a ua hana mai oia i na mea a pau, ma ka lani a ma ka honua no hoi; e manaoio nona ka naauao a pau, a me ka mana a pau, ma ka lani a ma ka honua no hoi; e manaoio hoi aole ke kanaka i hoomaopopo i na mea a pau i hiki ai i ka Haku ke hoomaopopo.

10. A eia hou, E manaoio he mea e pono ai ke mihi i ko oukou mau hewa, a e haalele aku ia mau mea a e hoohaahaa ia oukou iho imua o ke Akua; a e noi aku me ka oiaio o ka naau nana e kala mai ia oukou; ano, ina e manaoio oukou i keia mau mea a pau, e makaala oukou a e hana ia mau mea.

11. A ke i hou aku nei au ia oukou me au i i aku ai mamua, e like me ko oukou hiki ana i ka ike i ka nani o ke Akua, a ina ua ike oukou i kona lokomaikai, a i hoao aku i kona aloha, a i loaa ai ke kala ia ana o ko oukou mau hala, ka mea e hookomo ana i neia hauoli nui loa iloko o ko oukou mau naau, pela no au e makemake ai ia oukou e hoomanao, a e hoopaa naau i hoomanao mau ai, i ka nui o ke Akua, a me ko oukou ole, a i kona lokomaikai a hoomanawanui ia oukou ka poe pono ole, a e hoohaahaa ia oukou iho i haahaa loa, e kahea ana i ka inoa o ka Haku i kela la i keia la, a e kupaa naueue ole ana ma ka manaoio i ka mea e hiki mai ana, i olelo ia ai ma ka waha o ka anela;

12. Aia hoi, ke i aku nei au ia oukou, ina e hana oukou i keia, e hauoli mau no oukou, a e hoopiha ia me ke aloha i ke Akua, a e loaa ke kala mau ia ana o ko oukou mau hala; a e mahuahua aku oukou ma ka ike no ka nani o ka mea nana oukou i hana, a ma ka ike i ka mea i pololei a i oiaio hoi.

13. Aole hoi o oukou makemake e hana ino aku kekahi i kekahi, aka e noho maluhia, a e haawi aku i kela kanaka i keia kanaka, e like me ka mea ku pono ia ia.

14. Aole hoi oukou e ae aku i ka oukou mau keiki, e hele pololi lakou, a me ke kapa ole; aole hoi o oukou e ae aku e lawehala lakou i na kanawai o ke Akua, a e paio a e hakaka kekahi me kekahi, a e hookauwa na ke diabolo, oia no ka haku o ka hewa, oia hoi ka uhane ino i olelo ia ai e ko kakou poe kupuna; he enemi ia i ka pono a pau;

15. Aka e ao aku no oukou ia lakou e hele ma na aoao o ka oiaio a me ke kuoo; e ao aku no oukou ia lakou e aloha aku i kekahi i kekahi, a e kokua aku i kekahi i kekahi;

16. A o oukou iho no kekahi e kokua aku no i ka poe i ku pono e kokua ia aku ai e oukou; e manawalea aku oukou i ko oukou waiwai i ka mea nele; aole no oukou e ae aku i ka mea ilihune e noi mai ia oukou me ka loaa ole aku, a e hookuke aku ia ia e make.

17. Malia paha e i mai oe, Ua hoili ae la ke kanaka i kona poino maluna ona iho; nolaila, e kaohi au i kuu lima, aole au e haawi aku i kaʻu ai ia ia, aole hoi au e manawalea aku ia ia i koʻu waiwai, i ole ai e pilikia oia, no ka mea, ua pono kona hoopai ia ana.

18. Aka ke i aku nei au ia oe, e ke kanaka, o ka mea e hana ana i keia, he kumu nui kona e mihi ai; a ke mihi ole oia i ka mea ana i hana ai, e make mau loa ana oia, a, aole ona kuleana iloko o ke aupuni o ke Akua.

19. No ka mea, aia hoi, aole anei he poe noi kakou a pau? Aole anei kakou a pau e hilinai ana maluna o ka mea hookahi, oia ke Akua, no ka lako a pau i loaa ai ia kakou; no ka ai a me ke kapa, a no ke gula, a no ke kala, a no ka waiwai a pau i loaa ai ia kakou o kela ano keia ano?

20. Aia hoi, ma keia manawa hoi, ua kahea aku oukou i kona inoa, a e noi ana no ke kala ia ana o ko oukou mau hala. A ua ae mai anei oia i noi aku ai oukou me ka makehewa? Aole; ua ninini mai la oia i kona Uhane maluna o oukou, a ua hoopiha mai la i ko oukou mau naau me ka hauoli, a ua papani mai i ko oukou mau waha, i hiki ole ai ia oukou ke ekemu, no ka nui loa o ko oukou hauoli.

21. Ano, ina o ke Akua, nana i hana mai ia oukou, maluna ona oukou e hilinai nei no ko oukou ola, a no na mea a pau a oukou i loaa ai a me oukou no hoi, ke haawi mai nei ia oukou i ka mea i pono a oukou i noi aku ai, ma ka manaoio, me ka manaoio ana e loaa ana ia oukou, E, aole anei he pono ia oukou ke manawalea aku i ka waiwai a oukou i loaa ai, kekahi i kekahi?

22. A ina e hookolokolo oukou i ke kanaka nana e noi ia oukou no ko oukou waiwai, i make ole ai oia, a e hoohewa aku ia ia, e nui aku ana ka pono o ko oukou hoohewa ia ana, no ko oukou aua ana i ko oukou waiwai, ka mea aole na oukou, aka na ke Akua, ka mea nana no hoi ko oukou ola; a, aole nae oe e pule aku, aole hoi mihi i ka mea au i hana ai.

23. Ke i aku nei au ia oukou, auwe kela kanaka, no ka mea, e make pu kona waiwai me ia; ano, ke i aku nei au i keia mau mea i ka poe i waiwai, mamuli o na mea o keia ao.

24. A eia hou, ke i aku nei au i ka poe hune, ka poe i nele i ka mea e lako ai, aka i lawa nae me ka mea i ola ai oukou mai kekahi la aku i kekahi la; ke olelo nei au ia oukou a pau ka poe e hoole ana i ka mea noi, no ka nele o oukou; ke makemake nei au e nalu iho oukou iloko o ko oukou mau naau, ke haawi ole nei au no kuu nele; aka ina he lako koʻu, ina e haawi aku au.

25. Ano, ina e nalu iho oukou i keia iloko o ko oukou mau naau, ua hewa ole oukou, a i ole ia, ua hoohewa ia oukou, a ua pono ko oukou hoohewa ia ana; no ka mea, ke kuko nei oukou i ka mea a oukou i loaa ole ai.

26. Ano, no ka pomaikai o keia mau mea aʻu i olelo aku ai; oia hoi, no ka pomaikai o ka loaa ana ke kala ia ana o ko oukou mau hala ia la aku ia la aku, i hele hewa ole ai oukou imua o ke Akua, ke makemake nei au e manawalea aku oukou i ko oukou waiwai i ka poe ilihune, o kela kanaka keia kanaka e like me ka mea i loaa ia ia, me neia, e hanai ana i ka poe pololi, e hoaahu ana i ka poe kapa ole, a e hele ana e ike i na mai, e kokua ana i maha ai lakou, ma ko ka uhane a ma ko ke kino, e like me ko lakou nele.

27. A e ike e hana ia keia mau mea a pau ma ka naauao a me ka pololei; no ka mea, aole he mea e pono ai no ke kanaka e holo kiki mamua o kona ikaika. A eia hou; He mea e pono ai ke hooikaika oia, i hiki ia ia ma ia mea ke loaa ka uku; nolaila, e hana ia na mea a pau ma ka pololei e pono ai.

28. A ke makemake nei au e hoomanao oukou, o ka mea mawaena o oukou e noi lilo ole ana i kona hoalauna, he mea pono ke hoihoi hou aku oia i kona mea i noi lilo ole ai, e like me kana olelo, a i ole ia, e hana hewa ana oia, a malia paha e lilo oia i kumu no kona hoalauna e hana hewa ai no hoi.

29. A eia ka hope, ua hiki ole iaʻu ke hai aku ia oukou i na mea a pau e hewa ai oukou; no ka mea, ua nui loa na aoao a me na kumu, a no ka nui ua hiki ole iaʻu ke helu ia mau mea.

30. Aka o keia ua hiki iaʻu ke hai ia oukou, ina aole oukou e kiai ia oukou iho, a me ko oukou mau manao, a i ka oukou mau olelo, a me ka oukou mau hana, a e malama i na kauoha a ke Akua, a e hoomau ma ka manaoio a oukou i lohe ai no ka hiki ana mai o ko kakou Haku, a hiki loa i ka hopena o ko oukou mau ola, e make io no oukou. Ano, e ke kanaka, e hoomanao, a e make ole hoi.