1. Ano, hoomaka ae la o Amona a me ke alii Limai e kuka pu me na kanaka, no ka mea a lakou e hana ai, e hoopakele aku ia lakou iho, mailoko aku o ka noho luhi ana; a kauoha ae la laua i na kanaka a pau e hoakoakoa ia lakou iho; a ua hana laua i keia i hiki ia laua ke loaa ka leo o na kanaka no ia mea.

2. A eia kekahi, aole i hiki ia lakou ke loaa kekahi mea e hoopakele ai ia lakou iho mailoko aku o ka noho luhi ana, eia wale no, e lawe aku i ka lakou poe wahine a me ka lakou mau keiki, a me na pua a me na ohana holoholona o lakou, a me na halelewa o lakou, a e hele aku iloko o ka waonahele; no ka mea, no ka lehulehu o ko Lamana poe ua hiki ole i ka poe kanaka o Limai ke paio aku me lakou, me ka manao e hoopakele ia lakou iho mailoko aku o ka noho luhi ana, ma o ka pahikaua la.

3. Ano, hele ae la o Gideona a ku iho la imua o ke alii, a i aku la ia ia, Ano, e ke alii, ua hoolohe e mai oe mamua i kaʻu olelo i na manawa he nui, ia kakou e kaua ana me ko kakou poe hoahanau, me ko Lamana poe.

4. Ano, e ke alii, ina aole oe i ike mai he kauwa pono ole au, a ina ua hoolohe iki mai oe i kaʻu olelo mamua aku nei, a ua pomaikai oe ia mau olelo, pela au e makemake nei ia oe e hoolohe mai i kaʻu olelo i keia manawa, a e lilo au i kauwa nau, a e hoopakele aku i keia poe kanaka mailoko aku o ka noho luhi ana.

5. A ae aku la ke alii ia ia e olelo mai. A i ae la o Gideona ia ia,

6. Aia no ke alahele hope ma ka pa hope, ma ke kua o ke kulanakauhale. Ua ona ko Lamana poe, ka poe koa o ko Lamana, ma ka po; nolaila, e hoouna aku kakou i olelo hoolaha mawaena o keia poe kanaka a pau, e houluulu pu mai lakou i na pua a me na ohana holoholona o lakou, e hiki ia lakou ke hoa aku ia lakou la iloko o ka waonahele ma ka po.

7. A e hele aku au e like me kau kauoha, a e hookupu aku i ka auhau hope o ka waina i ko Lamana poe, a e ona lakou; a e hele aku kakou ma ke alahele huna aia ma ka hema o kahi hoomoana, ia lakou e ona ai a e hiamoe ai;

8. Pela kakou e hele aku ai me ka kakou poe wahine a me ka kakou mau keiki, o na pua holoholona o kakou, a me na ohana holoholona o kakou iloko o ka waonahele; a e hele no kakou mawaho aku o ka aina o Sailoma.

9. A eia kekahi, hoolohe aku la ke alii i na olelo a Gideona.

10. A kauoha aku la ke alii o Limai i kona poe kanaka e houluulu mai i na pua holoholona o lakou; a hoouna aku la oia i ka hookupu o ka waina i ko Lamana poe; a hoouna aku la hoi oia i waina hou ae, i makana ia lakou; a inu nui iho la lakou i ka waina a ke alii Limai i hoouna aku ai ia lakou.

11. A eia kekahi, hele aku la ka poe kanaka o ke alii Limai ma ka po iloko o ka waonahele, me na pua holoholona o lakou, a me na ohana holoholona o lakou, a hele aku la lakou mawaho aku o ka aina o Sailoma ma ka waonahele, a hele aku la me ka ihu i ka aina o Zarahemela, i alakai ia ai e Amona a me kona poe hoahanau.

12. A ua lawe aku la lakou i ko lakou gula a pau, a me ke kala, a me ko lakou mau mea maikai, i hiki ai ia lakou ke hali; a me ka lakou ai pu no hoi me lakou, iloko o ka waonahele; a nauwe aku la lakou ma ko lakou hele ana.

13. A hala na la he nui wale ma ka waonahele, hiki aku la lakou i ka aina o Zarahemela, a hui pu iho la me kona poe kanaka, a lilo ae la i poe kanaka malalo iho ona.

14. A eia kekahi, loaa ae la lakou ia Mosia me ka olioli; a loaa ia ia hoi ko lakou mau mooolelo, a me na papa mooolelo hoi a ka poe kanaka o Limai i loaa ai.

15. Ano, eia kekahi, i ka wa i ike ai ko Lamana poe ua haele aku la ka poe kanaka o Limai ma ka po, hoouna aku la lakou i kekahi poe koa iloko o ka waonahele e alualu mai ia lakou nei;

16. A ia lakou i alualu ai i na la elua, aole i hiki ia lakou ke hahai i ko lakou nei mau meheu; nolaila, ua hili iho la lakou ma ka waonahele. He mooolelo no Alama a me na kanaka o ka Haku, ka poe i kipaku ia mai ai iloko o ka waonahele e ka poe kanaka o Noa ke alii.