1. Eia kekahi, mahope iho o na makahiki elua, hele mai la o Abinadi mawaena o lakou me ka pahaohao, i ike ole ai lakou ia ia, a hoomaka ae la e wanana aku mawaena o lakou, i ka i ana, Penei ka ka Haku i kauoha mai ai iaʻu, i ka i ana: E Abinadi, e hele aku a e wanana aku i koʻu poe kanaka nei, no ka mea, ua hoopaakiki aku la lakou i ko lakou mau naau i kaʻu mau olelo; ua mihi ole lakou i ka lakou mau hana ino; nolaila, e hele no au io lakou la ma kuu inaina, he oiaio, ma kuu inaina wela e hele aku ai au io lakou la ma ko lakou mau hewa a hana hoopailua;

2. He oiaio, auwe keia hanauna. A i mai la ka Haku iaʻu, E o aku i kou lima, a e wanana, me ka i ana, penei wahi a ka Haku: E hiki mai keia, e lawe ia auanei keia hanauna, no ka lakou mau hala, iloko o ka noho luhi ana, a e papai ia ma ka papalina; he oiaio, a e hooauhee ia e na kanaka, a e luku ia; a e ai auanei na manu nui o ka lewa, a me na ilio, a me na holoholona hihiu, i ko lakou io.

3. A e hiki mai keia, e manaoio ke ola o ke alii Noa me he aahu la iloko o kekahi umu wela; no ka mea, e ike no oia owau no ka Haku.

4. Eia kekahi, e hahau aku no au i keia poe kanaka oʻu me na popilikia eha; he oiaio, me ka wi a me ke ahulau; a naʻu lakou e hoaoa aku a pau ae ka la.

5. He oiaio, a e hoohaawe aku no au i na ukana kaumaha maluna o ko lakou mau kua; a e hoeueu ia lakou imua me ka hahau, me he hoki leo ole la.

6. A e hiki mai keia, e hoouna aku au i ka hua hekili mawaena o lakou, a e pehi ia mea ia lakou; a e papai ia no hoi lakou i ka makani hikina; a e hoopilikia na mea kolo i ko lakou aina hoi, a e ai i ko lakou hua liilii.

7. A e hahau ia lakou me kekahi ahulau nui; a e hana au i keia mau mea a pau, no ka lakou mau hala a mau hana hoopailua.

8. A eia kekahi, ke mihi ole lakou, e hoopau loa aku au ia lakou mailuna aku o ka ili o ka honua; aka e waiho iho no lakou i mooolelo mahope iho o lakou, a e malama aku au ia mea no na lahuikanaka e ae, ka poe e loaa auanei ka aina; he oiaio, e hana no au i keia, e hiki iaʻu ka hoakaka aku i ka hana hoopailua a keia poe kanaka i na lahuikanaka e. A he nui wale na mea a Abinadi i wanana ku e mai ai i keia poe kanaka.

9. Eia kekahi, huhu iho la lakou ia ia; a hopu aku la lakou ia ia a kaikai aku la ia ia me ka paa i ka nakiikii ia imua o ke alii, a i aku la i ke alii, Aia hoi, ua lawe mai makou i kekahi kanaka imua ou, nana i wanana ino mai no kou poe kanaka, a ke i mai la e hoopau ana ke Akua ia lakou;

10. A ke wanana mai la no hoi oia i ka ino no kou ola, a ke i mai nei e like auanei kou ola me he aahu la iloko o ka umu ahi.

11. A eia hou, ke i mai nei oia e like auanei oe me he ohe la, oia, me he ohe maloo la o ke kula, i holo ia maluna e na holoholona a hahi ia ilalo o na wawae.

12. A eia hou, ke i mai nei oia e like auanei oe me na pua o ka puakala, ia ia i oo loa ai, ina e pa mai ka makani, e hoopuehu ia aku ia ma ka ili o ka aina; a ke hookokohu mai nei ia me he mea la na ka Haku i olelo mai ia mea. A ke i mai nei oia e hiki mai keia a pau maluna ou, ke mihi ole oe; a o keia no kau mau hala.

13. Ano, e ke alii, aia hoi, heaha la ka ino nui au i hana ai, a heaha la hoi na hewa nui a kou poe kanaka i lawehala ai, i hoahewa ia kakou e ke Akua, a i hookolokolo ia e keia kanaka?

14. Ano, e ke alii, aia hoi, ua hewa ole makou, a ooe, e ke alii, ua lawehala ole; nolaila, ua wahahee mai la keia kanaka nou, a ua wanana mai la me ka makehewa.

15. A, aia hoi, ua ikaika kakou, aole no kakou e komo iloko o ka noho luhi ana, aole hoi e lawe pio ia e ko kakou poe enemi; he oiaio, a ua hoopomaikai ia oe ma ka aina, a e hoopomaikai ia auanei oe.

16. Aia hoi, eia no ke kanaka, ke haawi aku nei makou ia ia iloko o kou mau lima; nau no e hana me ia me ka mea maikai ia oe.

17. Eia kekahi, kena aku la ke alii o Noa e hoolei ia aku o Abinadi iloko o ka halepaahao; a kauoha ae la oia i na kahuna e hoakoakoa ia lakou iho, e hiki ia ia ke kukakuka pu me lakou no kona mea e pono ai ke hana me ia.

18. A eia kekahi, i aku la lakou i ke alii, E lawe mai ia ia maanei, i niele aku ai makou ia ia. A kauoha aku la ke alii e lawe ia mai oia imua o lakou.

19. A hoomaka ae la lakou e ninaninau aku ia ia, i hiki ai ia lakou ke hoohauhili ia ia, i hiki ai ia lakou ke loaa kekahi mea e hoahewa ai ia ia; aka pane aku la oia ia lakou me ka wiwo ole, a pale aku la i ko lakou mau niele a pau, he oiaio, ua nui ko lakou kahaha; no ka mea, pane aku la oia ia lakou ma ko lakou mau niele a pau, a hoohoka aku la ia lakou ma ka lakou mau olelo a pau.

20. Eia kekahi, i mai la kekahi o lakou ia ia, Heaha la ke ano o na olelo i palapala ia, a i ao ia e ko kakou poe kupuna, i ka i ana:

21. Nani wale ma na mauna na wawae o ka mea e lawe mai ana i ka olelo maikai; ka mea e hoolaha ana i ka malu; ka mea e lawe mai ana i ka olelo maikai o ka olioli; ka mea e hoolaha ana i ke ola; ka mea e olelo ana ia Ziona, ke noho alii nei kou Akua;

22. O kou poe kiai e hookiekie auanei lakou i ka leo; me ka leo auanei lakou e hookani pu ai, no ka mea, e alikealike auanei ko lakou ike ana, i ka wa a ka Haku e hoihoi hou mai ai ia Ziona.

23. E hookani olioli; e olioli pu oukou e na wahi neoneo o Ierusalema; no ka mea, ua hoomaha mai ka Haku i kona poe kanaka; ua hoolapanai oia ia Ierusalema.

24. Ua hoike ka Haku i kona lima hemolele imua o na maka o na lahuikanaka a pau; a e ike auanei na kukulu a pau o ka honua i ka hoola ana o ko kakou Akua.

25. Ano, i aku la o Abinadi ia lakou, He poe kahuna anei oukou, a e hookokohu ana e ao i keia poe kanaka, a e hoomaopopo i ka Uhane o ka wanana ana, aka e makemake ana nae e ike mai oʻu aku i ke ano o keia mau mea?

26. Ke i aku nei au ia oukou, auwe oukou no ka hookapae ana i na aoao o ka Haku. No ka mea, ina oukou e hoomaopopo nei i keia mau mea, aole oukou i ao aku ia mau mea; nolaila, ua hookapae oukou i na aoao o ka Haku.

27. Ua hoopili ole oukou i ko oukou mau naau i ka ike; nolaila, aole oukou i naauao. Nolaila, heaha la ka oukou i ao aku ai i keia poe kanaka?

28. A i mai la lakou, Ke ao aku nei makou i ke kanawai o Mose.

29. A i hou aku la oia ia lakou, Ina e ao ana oukou i ke kanawai o Mose, no ke aha la oukou i malama ole ai ia mea? No ke aha la oukou i kau aku ai i ko oukou mau naau maluna o ka waiwai? No ke aha la oukou i moekolohe ai, a i hoomaunauna ai i ko oukou ikaika me na wahine hookamakama, he oiaio, a lilo i kumu no keia poe kanaka e hana hewa ai, i hoouna mai ai ka Haku iaʻu e wanana ku e i keia poe kanaka, he oiaio, i kekahi mea ino nui no keia poe kanaka?

30. Aole anei oukou i ike, ke olelo nei au i ka oiaio? He oiaio, ua ike no oukou ke olelo nei au i ka oiaio; a he mea e pono ai ke haalulu oukou imua o ke Akua.

31. A e hiki mai keia, e hahau ia oukou no ka oukou mau hala; no ka mea, ua i mai oukou, e ao ana oukou i ke kanawai o Mose. A heaha la ka oukou i ike ai no ke kanawai o Mose? E hiki mai ana anei ke ola ma ke kanawai o Mose? Heaha ka oukou e olelo mai?

32. A pane mai la lakou, a i mai la, Ua hiki mai ke ola ma ke kanawai o Mose.

33. Aka, ano la, i aku la o Abinadi ia lakou, Ua ike au ina e malama oukou i na kauoha a ke Akua, e hoola ia oukou; he oiaio, ina e malama oukou i na kauoha a ka Haku i haawi mai ai ia Mose ma ka mauna o Sinai, i ka i ana:

34. Owau no ka Haku o kou Akua, ka mea nana oe i lawe mai nei mai ka aina o Aigupita mai, mailoko mai hoi o ka hale hooluhi.

35. Aole ou Akua e ae imua o koʻu alo.

36. Mai hana oe i ke kii i kalai ia nou, aole ma ka like ana o kekahi mea i ka lani iluna, a me na mea i ka honua ilalo.

37. Ano, i aku la o Abinadi ia lakou, Ua hana anei oukou i keia mau mea a pau? Ke i aku nei au ia oukou, Aole, aole loa oukou i hana. A ua ao aku anei oukou i keia poe kanaka e hana i keia mau mea a pau? Ke i aku nei au i oukou, Aole, aole oukou i hana.