1. Ano, ua ao ia o Alama i ka Haku, e hiki mai ana ka poe koa o ke alii o Noa maluna o lakou, a ua hoike aku hoi ia mea i kona poe kanaka, nolaila, houluulu ae la lakou i na pua holoholona o lakou, a lawe aku la i ko lakou hua liilii, a haele aku la iloko o ka waonahele imua o ka poe koa o ke alii Noa.

2. A hooikaika mai la ka Haku ia lakou, i hiki ole ai i ka poe kanaka o ke alii Noa ke loaa aku lakou, e luku ia lakou.

3. A holo aku la lakou i ko na la ewalu hele ana iloko o ka waonahele.

4. A hiki aku la lakou i kahi aina, he oiaio, i kahi aina oluolu a nani loa; i kahi aina o ka wai maemae.

5. A kukulu iho la lakou i na halelewa o lakou, a hoomaka ae la e mahi i ka honua, a hoomaka ae la e kukulu i na hale, a ia mea aku ia mea aku; he oiaio, ua molowa ole lakou, a ua hana ikaika loa.

6. A ua makemake na kanaka ia Alama i alii no lakou, no ka mea, ua aloha ia oia e kona poe kanaka.

7. Aka, i aku la oia ia lakou, Aia hoi, aole he mea pono no kakou ke lilo kekahi i alii; no ka mea, penei wahi a ka Haku: Mai manao oukou i kekahi io mamua o ko kekahi, a mai manao kekahi kanaka ia ia iho maluna o kekahi; nolaila, ke i aku nei au ia oukou, aole ia he mea e pono ai i loaa ai ia oukou he alii.

8. Aka hoi, ina he mea hiki ia oukou ke loaa mau na kanaka pono i poe alii no oukou, ina he mea pono ia no oukou e loaa ai he alii.

9. Aka e hoomanao i ka hewa o ke alii Noa a me kana poe kahuna; a owau hoi, ua hei ia au iloko o kahi pahele, a hana iho la i na mea hoopailua he nui imua o ka Haku, a he kumu ia noʻu i mihi ai me ka ehaeha;

10. Aka hoi, mahope iho o ka pilikia nui, hoolohe mai la ka Haku i kaʻu hea ana, a ua hooko mai la i kaʻu pule, a ua hoolilo mai iaʻu i mea hana i kona mau lima, i ka lawe ana ia oukou i ka ike i kona oiaio.

11. Aka hoi, aole au i kaena aku ma keia, no ka mea, aole au pono ke kaena aku noʻu iho.

12. Ano, ke i aku nei au ia oukou, ua hooluhi hewa ia mai la oukou e ke alii Noa, a ua noho pio malalo ho ona a me kana poe kahuna, a ua lawe ia iho la iloko o ka hewa e lakou; nolaila, ua nakinaki ia oukou me na mea i paa ai o ka hewa.

13. Ano, me oukou i hoopakele ia mai ai, ma ka mana o ke Akua, mailoko mai o keia mau mea i paa ai, he oiaio, mailoko mai o na lima o ke alii o Noa a me kona poe kanaka, mailoko mai hoi o na mea i paa ai o ka hewa, pela au i makemake ai e kupaa oukou ma keia lanakila i hookuu ia mai ai oukou, a e hilinai ole i kekahi kanaka e alii ai maluna o oukou;

14. A e hilinai ole ana i kekahi mea i kumu no oukou, aole hoi i luna no oukou, ke ole ia he kanaka o ke Akua, e hele ana ma kona mau aoao a e malama ana i kana mau kauoha.

15. Pela o Alama i ao aku ai i kona poe kanaka, e aloha aku kela kanaka keia kanaka i kona hoalauna me ia ia ia iho; i ole ai he paio mawaena o lakou.

16. Ano, o Alama, oia ko lakou kahuna nui, oia hoi ka i hookumu ai i ko lakou ekalesia.

17. A eia kekahi, aole i loaa i kekahi ka mana e hai olelo, aole hoi e ao aku, ke ole ma o na la mai ke Akua mai. Nolaila, hoolaa iho la oia i na kahuna a pau o lakou, a me na kumu a pau o lakou, aole i hoolaa ia kekahi ke ole lakou he poe kanaka pono.

18. Nolaila, kiai aku la lakou maluna o ko lakou poe kanaka, a ua hanai aku ia lakou me na mea e pili ana i ka pono.

19. A eia kekahi, hoomaka ae la lakou e hoopomaikai nui loa ia ma ka aina; a kapa aku la lakou i ka aina o Helama.

20. A eia kekahi, mahuahua ae la lakou a hoopomaikai nui loa ia ma ka aina o Helama; a kukulu iho la lakou i kulanakauhale a lakou i kapa aku ai o ke kulanakauhale o Helama.

21. Aka hoi, he mea ku pono i ko ka Haku manao e paipai mai i kona poe kanaka; he oiaio, e hoao ana oia i ko lakou ahonui a me ko lakou manaoio.

22. Aka hoi, o ka mea i paulele aku ia ia, oia ke hookiekie ia iluna ma ka la hope. He oiaio, a pela no ia me keia poe kanaka.

23. No ka mea, e hoike aku no au ia oukou ua lawe ia lakou iloko o ka noho luhi ana, a, aole i hiki i kekahi mea ke hoopakele ia lakou, o ka Haku ko lakou Akua wale no; he oiaio, o ke Akua o Aberahama, a me Isaaka, a o Iakoba.

24. A eia kekahi, ua hoopakele mai la oia ia lakou, a ua hoike mai la oia i kona mana ikaika ia lakou, a nui ko lakou hauoli ana.

25. No ka mea, aia hoi, oiai lakou ma ka aina o Helama, he oiaio, ma ke kulanakauhale o Helama, oiai e mahi ana i ka aina a puni, aia ka! He puali o ko Lamana poe ma na palena o ka aina.

26. Ano, eia kekahi, holo aku la na hoahanau o Alama mai ke kihapai o lakou aku, a houluulu mai la lakou ia lakou iho iloko o ke kulanakauhale o Helama; a nui ko lakou makau no ka ea ana mai o ko Lamana poe.

27. Aka hele aku la o Alama a ku iho la mawaena o lakou, a kauleo ae la ia lakou aole e pono ke makau, aka, e hoomanao lakou i ka Haku, i ko lakou Akua, a nana no e hoopakele mai ia lakou;

28. Nolaila, uumi iho la lakou i ko lakou hopohopo, a hoomaka aku la e kahea aku i ka Haku, e hoopalupalu ae oia i na naau o ko Lamana poe, i hookoe mai ai lakou la ia lakou, a me na wahine a lakou, a me na keiki a lakou.

29. A eia kekahi, hoopalupalu ae la ka Haku i na naau o ko Lamana poe. A hele aku la o Alama a me kona poe hoahanau, a haawi aku la ia lakou iho iloko o na lima o lakou la; a loaa iho la i ko Lamana poe ka aina o Helama.

30. Ano, o ka poe koa i alualu ai i ka poe kanaka o Limai, ua hili iho la ma ka waonahele no na la he nui wale.

31. Aia hoi, ua loaa ia lakou kela poe kahuna a Noa, ma kau wahi a lakou i kapa aku ai o Amulona; a ua hoomaka ae lakou e noho ma ka aina o Amulona, a ua hoomaka ae la e mahi i ka honua.

32. Ano, o ka inoa o ka luna o ua poe kahuna la o Amulona no ia.

33. A eia kekahi, nonoi aku la o Amulona i ko Lamana poe; a hoouna aku la oia i na wahine a lakou, a o na kaikamahine hoi lakou a ko Lamana poe, e noi aku i ko lakou poe hoahanau, i luku ole ai lakou la i na kane a lakou.

34. A menemene ae la ko Lamana poe ia Amulona a me kona poe hoahanau, a aole i pepehi aku ia lakou, no ka lakou mau wahine.

35. A hui pu aku la o Amulona a me kona poe hoahanau me ko Lamana poe, a e hele ana lakou ma ka waonahele e imi i ka aina o Nepai, ia lakou i loaa ai ka aina o Helama, i noho ia ai e Alama a me kona poe hoahanau.

36. A eia kekahi, olelo paa mai la ko Lamana poe ia Alama a me kona poe hoahanau, ina e hoike aku lakou i ke ala e hiki aku ai i ka aina o Nepai, alaila e ae mai lakou la i ola lakou a i noho pio ole ai hoi.

37. Aka, mahope iho o ka hoike ana ae o Alama ia lakou la i ke ala e hiki aku ai i ka aina o Nepai, aole ko Lamana poe i malama i ka lakou olelo paa; aka, hoonoho mai la lakou la i na koa kiai a puni ka aina o Helama, maluna o Alama a me kona poe hoahanau.

38. A hele aku la ka poe i koe o lakou i ka aina o Nepai; a hoi hou mai la kekahi poe o lakou i ka aina o Helama, a lawe pu mai la hoi me lakou i na wahine a me na keiki a ka poe koa kiai i waiho ia ai ma ka aina.

39. A ua ae aku ke alii o ko Lamana poe ia Amulona, e lilo ai i alii a i luna maluna o kona poe kanaka e noho ana ma ka aina o Helama; aka hoi, aole i loaa ia ia ka mana e hana i kekahi mea ku e i ka makemake o ke alii o ko Lamana poe.