1. Eia kekahi ia Abinadi i hooki ai i keia mau olelo, kauoha ae la ke alii e lawe aku na kahuna ia ia, a e kauoha aku e pepehi ia oia.

2. Aka aia kekahi mea mawaena o lakou, o Alama kona inoa, a he mamo hoi ia na Nepai. A he kanaka opiopio no ia, a manaoio iho la oia i na olelo a Abinadi i olelo mai ai, no ka mea, ike aku la oia no ka hewa a Abinadi i hoike ku e mai ai ia lakou; nolaila, hoomaka ae la ia e noi aku i ke alii e huhu ole aku ia Abinadi, aka e ae aku ia ia e hele aku me ka malu.

3. Aka ua huhu nui ae ke alii, a kena aku la e kipaku ia aku o Alama maiwaena aku o lakou, a hoouna aku la oia i kana mau kauwa e alualu ia ia, i pepehi aku ai lakou ia ia.

4. Aka holo aku la oia imua o lakou, a pee aku la, a loaa ole oia ia lakou. A ua pee iho la oia no na la he nui, a nana i kakau i na olelo a pau a Abinadi i olelo mai ai.

5. Eia kekahi, kena aku la ke alii i kona poe koa kiai e hoopuni ia Abinadi, a e hopu ia ia; a hikii iho la lakou ia ia a hahao iho la ia ia iloko o ka halepaahao.

6. A mahope iho o na la ekolu, i kukakuka pu ai oia me kana poe kahuna, kena ae la oia e kai hou ia oia imua ona.

7. A i aku la oia ia ia, E Abinadi, ua loaa ia makou he mea e hoohewa ai ia oe, a ua ku pono oe e make.

8. No ka mea, ua i mai oe, e iho mai auanei ke Akua, oia iho, mawaena o na keiki a kanaka; ano, no keia mea e pepehi ia oe a make, ke ole oe e hoole i na olelo a pau au i olelo ino mai ai noʻu, a no koʻu poe kanaka.

9. Ano, i aku la o Abinadi ia ia: Ke i aku nei au ia oe, aole au e hoole i na olelo aʻu i olelo aku ai ia oukou no keia poe kanaka, no ka mea, he oiaio ia mau mea; a ua ae aku au i hopu ia mai au a i lilo iloko o ko oukou mau lima, i ike ai oukou he oiaio ia mau mea.

10. He oiaio, a e ae aku au e make au, aole hoi au e hoole i kaʻu mau olelo, a e ku no ia mau mea me he hoike ku e la ia oukou. A ina e pepehi mai oukou iaʻu, e hookahe no oukou i ke koko hala ole, a e ku no auanei ia mea no hoi i hoike ku e ia oukou, ma ka la hope.

11. Ano, ua aneane ke alii o Noa e hookuu aku ia ia, no ka mea, ua makau oia i kana olelo; no ka mea, ua makau oia o hiki mai auanei na hoopai o ke Akua maluna ona.

12. Aka hookiekie aku la na kahuna i ko lakou mau leo e ku e ana ia ia, a hoomaka ae la e hoohewa ia ia, i ka i ana: Ua hoino ae oia i ke alii. Nolaila, ua hoonaukiuki ia ke alii me ka huhu ia ia, a hookuu aku la oia ia ia, e pepehi ia oia a make.

13. Eia kekahi, lalau aku la lakou ia ia, a hikii aku la ia ia, a hahau iho la i kona ili me na laolao laau, he oiaio, a hiki aku i ka make.

14. Ano, i ka wa i hoomaka ai ka lapalapa e wela ai oia, kahea aku la oia ia lakou, me ka i ana ae:

15. Aia hoi, e like me ka oukou i hana mai ai iaʻu, pela auanei ia, na kau hua e pepehi i kekahi poe he nui wale, a e loaa na eha o ka make, ma ke ahi; a o keia mea no ko lakou manaoio ma ka hoola ana o ka Haku, o ko lakou Akua.

16. A e hiki mai keia, e hoopilikia ia oukou me na ano a pau o ka mai, no ka oukou mau hala.

17. He oiaio, a e hahau ia oukou ma na aoao a pau, a e hooauhee ia a e hoopuehu ia i o a ia nei, me he pua hihiu la i hooauhee ia e na holoholona hihiu a hae.

18. A ma ia la e alualu ia ai oukou, a e paa oukou i na lima o ko oukou poe enemi, a, alaila e mainoino oukou, me aʻu e mainoino nei, i na eha o ka make ma o ke ahi la.

19. Pela ke Akua e hoopai aku ai i ka inaina maluna o ka poe e pepehi ana i kona poe kanaka. E ke Akua, e hookipa aku oe i kuu uhane.

20. Ano, ia Abinadi i olelo aku ai i keia mau olelo, haule iho la ia, ua loaa na eha o ka make ma o ke ahi la; he oiaio, ua pepehi ia; no ka mea, aole oia i hoole i na kauoha a ke Akua; ua sila aku ia i ka oiaio o kana olelo ma kona make.