Ka Buke a Alama
Ke Keiki a Alama

1. Ano, eia kekahi, ma ka makahiki mua o ke au o na lunakanawai maluna iho o ka poe kanaka o Nepai, mai keia manawa aku, a ua hele aku la ke alii o Mosia i ke ala o ko ka honua a pau, ua paio aku la i ka paio maikai, e hele pololei ana imua o ke Akua, e waiho ole ana i kekahi e noho alii ma kona hakahaka; aka hoi, hoonoho paa mai la oia i na kanawai, a ua hooia aku kona poe kanaka ia mau mea; nolaila, ua koi ia lakou e kupaa ma na kanawai ana i hana ai.

2. A eia kekahi, ma ka makahiki mua o ke au o Alama ma ka noho hookolokolo, ua lawe ia mai la kekahi kanaka imua ona e hookolokolo ia; kekahi kanaka ua nunui, a ua kaulana oia no kona ikaika nui;

3. A ua hele aku la oia a puni mawaena o na kanaka, e hai ana ia lakou i ka mea ana i kapa ai ka olelo a ke Akua, e hookaumaha ku e ana i ka ekalesia; e hai ana i na kanaka he pono ke lilo kela kahuna keia kahuna a me na kumu i poe mahalo ia; a he mea e pono ole ai no lakou e hana me ko lakou mau lima, aka he pono ke hanai ia lakou e na kanaka;

4. A hoike aku la oia i na kanaka e hoola ia na kanaka a pau loa ma ka la hope, aole pono no lakou e makau, aole hoi haalulu, aka na lakou e hoea mai i ko lakou mau poo a e hauoli; no ka mea, ua hana mai la ka Haku i na kanaka a pau, a ua hoolapanai mai la hoi i na kanaka a pau; a ma ka hopena, e loaa i na kanaka a pau ke ola mau loa.

5. A eia kekahi, no ka nui o kona ao ana aku i ua mau mea nei, he nui ka poe i manaoio ma kana mau olelo, a no ka nui o lakou i hoomaka ai lakou e hanai ia ia, a haawi aku i kala ia ia;

6. A hoomaka ae la ia e hookiekie ia iluna ma ka haaheo o kona naau, a e komo ae i ke kapa kumukuai nui; he oiaio, a hoomaka ae la hoi e kukulu iho i ekalesia, mamuli o ke ano o kana hai olelo ana.

7. A eia kekahi, ia ia e hele ana e hai aku i ka poe i manaoio i kana olelo, halawai mai la oia me kahi kanaka no ka ekalesia o ke Akua, he oiaio, me kekahi o ko lakou poe kumu; a hoomaka ae la ia e paio ikaika me ia, e hiki ia ia ke alakai aku i ka poe kanaka o ka ekalesia; aka pale ku e aku ke kanaka ia ia, e ao ana ia ia me na olelo a ke Akua.

8. Ano, o Gideona ka inoa o ua kanaka la; a oia no ka mea paahana ma ka lima o ke Akua, i ka hoopakele ana i ka poe kanaka o Limai mailoko mai o ka noho luhi ana.

9. Ano, no ko Gideona ku e ana ia ia me na olelo a ke Akua, ua huhu iho la oia ia Gideona, a unuhi ae la oia i kana pahikaua, a hoomaka ae la e hahau mai ia ia. Ano, he nui loa na makahiki o Gideona, nolaila, aole oia i hiki ke pale aku i kona hahau ana, nolaila, ua pepehi loa ia oia ma ka pahikaua;

10. A ua hopu ia ke kanaka nana ia i pepehi mai e na kanaka o ka ekalesia, a ua kai ia oia imua o Alama, e hookolokolo ia ai e like me na hewa ana i hana ai.

11. A eia kekahi, ku iho la oia imua o Alama, a olelo pale hihia oia nona iho me ka wiwo ole nui.

12. Aka i aku la o Alama ia ia, Aia hoi, eia ka manawa mua i hookomo ia ai ka ke kahunapule wahahee mawaena o keia poe kanaka. A aia hoi, aole oe i hewa ma ka wahahee kahunapule wale no, aka, ua hooikaika oe e hoolanakila ia mea me ka pahikaua; a ina paha e hookomo ia ke kahunapule wahahee mawaena o keia poe kanaka, e lilo auanei ia o ko lakou mea e luku loa ia ai.

13. A ua hookahe aku oe i ke koko o kahi kanaka pono, he oiaio, i kahi kanaka nana i hana i ka pono a nui mawaena o keia poe kanaka; a ina paha e hookuu aku makou ia oe, e ili mai auanei kona koko maluna o makou no ka hoopai ana;

14. Nolaila, ua hoohewa ia oe e make, e like me ke kanawai i haawi ia mai e Mosia, ko kakou alii hope; a ua ae ia mai ua mau kanawai la e keia poe kanaka; nolaila, he pono no keia poe kanaka e kupaa ma ke kanawai.

15. A eia kekahi, lawe aku la lakou ia ia; a o Nehora kona inoa; a lawe aku la lakou ia ia maluna iho o ka piko o ka puu o Manati, a malaila oia i ae mai ai, mawaena o na lani a me ka honua, ua ku e na mea ana i ao aku ai i na kanaka i ka olelo a ke Akua; a malaila oia i loohia ai i ka make mainoino.

16. Aka hoi, aole o keia i hooki ai i ka mahuahua ana o ka kahunapule wahahee mawaena o ka aina; no ka mea, ua aloha no kekahi poe he nui i na mea lapuwale o ko ke ao nei, a hele aku la lakou e hai aku ana i na ao wahahee ana; a o keia ka lakou i hana ai no ka makemake i ka waiwai a me ka hanohano.

17. Aka hoi, ua aa ole lakou e wahahee, ina i ikea ia, no ka makau i ke kanawai, no ka mea, ua hoopai ia na mea wahahee; nolaila, hookohukohu iho la lakou e hai aku e like me ko lakou manaoio; ano, aole mana o ke kanawai maluna iho o kekahi kanaka no kona manaoio.

18. A ua aa ole lakou e aihue, no ka makau i ke kanawai; no ka mea, ua hoopai ia ua poe la; aole hoi i aa lakou e powa aku, aole hoi e pepehi kanaka; no ka mea, o ka mea nana i pepehi ua hoopai ia oia i ka make.

19. Aka, eia kekahi, o na mea aole no ka ekalesia o ke Akua, hoomaka ae la lakou e hoomaau mai i ka poe no ka ekalesia o ke Akua, ka poe i lawe maluna o lakou i ka inoa o Kristo;

20. He oiaio, hoomaau mai la lakou ia lakou nei, a hoeha mai la ia lakou nei me kela ano keia ano o na olelo, a o keia no ko lakou nei haahaa; no ka haaheo ole o lakou ma ko lakou mau maka iho, a no ko lakou haawi ana i ka olelo a ke Akua, kekahi i kekahi, me ke kala ole a me ke kumukuai ole.

21. Ano, aia no kekahi kanawai ikaika mawaena o na kanaka o ka ekalesia, i ole e ala ae kekahi kanaka no ka ekalesia, a e hoomaau aku i ka poe aole no ka ekalesia, a i ole hoi he hoomaau mawaena o lakou iho.

22. Aka hoi, he nui ka poe mawaena o lakou i hoomaka ae e haaheo, a hoomaka ae e paio hahana me ko lakou poe enemi, a kui aku a kui mai; he oiaio, ua kui ae kekahi i kekahi me ko lakou mau puupuu lima.

23. Ano, ma ka makahiki lua keia o ke au o Alama, a he mea e popilikia nui ai i ka ekalesia; he oiaio, he mea ia e hoao nui ai i ka ekalesia;

24. No ka mea, ua hoopaakiki ia na naau o na mea he nui wale, a ua holoi ia iho la ko lakou mau inoa, i hoomanao hou ole ia ai lakou mawaena o ka poe kanaka o ke Akua. A haalele iho la no hoi na mea he nui ia lakou.

25. Ano, he mea hoao nui keia i ka poe i kupaa ma ka manaoio; aka, ua kupaa a naueue ole lakou i ka malama ana i na kauoha a ke Akua, a hoomanawanui lakou me ke ahonui i ka hoomaau i hoahu ia ai maluna iho o lakou.

26. A i ka wa a ka poe kahuna i haalele aku ai i ka lakou hana e hai aku i ka olelo a ke Akua i na kanaka, haalele aku la no hoi na kanaka i ka lakou hana e hoolohe i ka olelo a ke Akua. A i ka wa a na kahuna i hai aku ai ia lakou i ka olelo a ke Akua, hoi hou ae la lakou a pau me ka ikaika i ka lakou mau hana; a aole e manao nui ana ke kahuna ia ia iho maluna o kona poe i hoolohe mai; no ka mea, aole i maikai ae ka mea hai aku mamua o ka mea i hoolohe mai, aole hoi i maikai ae ka mea i ao aku mamua o ka mea i ao ia mai; a pela lakou i like ai, a hana iho la lakou kela kanaka keia kanaka e like me kona ikaika;

27. A haawi aku la lakou i ko lakou waiwai kela kanaka keia kanaka e like me ka mea ana i loaa ai, i ka poe hune, a i ka poe nele, a i ka poe mai, a i ka poe pilikia; a aole o lakou i komo i ke kapa i nui ke kumukuai, aka ua maemae a ua maikai nae lakou;

28. A pela lakou i hookupaa ai i na hana a ka ekalesia; a pela lakou i hoomaka ai e loaa hou ai ka malu mau, me ko lakou hoomaau ia mai nae.

29. A, ano, no ka naueue ole o ka ekalesia, hoomaka ae la e nui loa ko lakou waiwai; me ka lawa o na mea a pau a lakou i makemake ai; ua lako ma na pua holoholona, a me na ohana holoholona, a me na mea kupalu ia o kela ano o keia ano, a me ka lako no hoi o na hua liilii, a o ke gula, a o ke kala, a o na mea maikai; a me ka lako o ke kilika a me ka ie i milo makalii ia, a me na ano a pau o ka lole manoanoa maikai.

30. A pela lakou ma ko lakou noho pomaikai ana i kipaku ole aku ai i kekahi mea kapa ole, aole hoi i pololi, aole hoi i makewai, aole hoi i mai, aole hoi i hanai ole ia; aole lakou i kau aku i ko lakou mau naau maluna o ka waiwai; nolaila, ua lokomaikai aku lakou i na mea a pau, i ka poe kahiko a i ka poe hou hoi, i ka poe paa a i ka poe paa ole hoi, i ka poe kane a i ka poe wahine hoi, ina mawaho paha o ka ekalesia, ina iloko paha o ka ekalesia, aole e malama ana kekahi mamua o kekahi o ka poe i nele;

31. A pela lakou i hoopomaikai ia ai a i lilo ai i poe waiwai nui ae, mamua o ka poe aole no ko lakou ekalesia.

32. No ka mea, o ka poe aole no ko lakou ekalesia, ua hana aku la lakou ma ka anaana, a i ka hoomana kii a me ka palaualelo, a i ka haanui, a i ka paonioni ana a me ka paio; e komo ana i ke kapa i nui ke kumukuai; i hookiekie ia ai ma ka haaheo o ko lakou mau maka iho; e wahahee ana, e aihue ana, e powa ana, e hana ana i ka moekolohe, a e pepehi kanaka ana, a me na ano a pau o ka hewa; aka hoi, ua hania aku ke kanawai maluna o ka poe a pau e a ae ana maluna ona, me ia i hiki ai.

33. A eia kekahi, ma ka hana ana i ke kanawai pela maluna iho o lakou, o kela kanaka keia kanaka e loaa ana e like me ka mea ana i hana ai, lilo ae la lakou i poe noho malie ae, a aa ole e hana i kekahi hewa, ina i ikea ia; nolaila, ua nui ka malu mawaena o ka poe kanaka o Nepai, a hiki aku i ka makahiki elima o ke au o na lunakanawai.