1. A eia kekahi, ua kauoha ia mai o Alama laua me Amuleka e hele aku mawaho o ke kulanakauhale; a haalele iho la laua, a hele aku la iloko o ka aina o Sidoma; a, aia hoi, malaila laua i loaa ai na kanaka a pau, ka poe i haalele iho i ka aina o Amoniha, ka poe i hookuke ia mai iwaho a i hailuku ia mai, no ko lakou manaoio ana i na olelo a Alama.

2. A hai aku la laua ia lakou i na mea a pau i hana ia mai ai i ka lakou poe wahine a poe keiki, a no laua iho no hoi, a no ko laua mana i ka hoopakele ia ana.

3. A e waiho ana hoi o Zezeroma me ka mai ma Sidoma, me kahi mai kuni wela, no na pilikia nui o kona naau keia mea, no kona hewa, no ka mea, ua manao oia ua make o Alama laua me Amuleka; a ua manao oia ua pepehi ia laua, mamuli o kona hewa. A o keia hewa nui, a me kona mau hewa e ae he nui wale, ua hoowalania iho la i kona naau, a eha nui loa iho la ia, me ka hoopakele ole ia mai; nolaila, hoomaka iho la oia e wela ia me kahi kuni wela.

4. Ano, ia ia i lohe ai aia o Alama laua me Amuleka ma ka aina o Sidoma, hoomaka ae la kona naau e loaa ka ikaika; hoouna koke ae la oia he kauoha io laua la, e makemake ana ia laua e hele io na la.

5. A eia kekahi, hele koke aku la laua io na la, e hoolohe ana i ke kauoha i hoouna ia mai ia laua; a komo aku la laua iloko o ka hale io Zezeroma la; a loaa iho la oia ia laua maluna o kona wahi moe, ua mai a nawaliwali loa me ka mai kuni wela; a ua eha loa no hoi kona naau, no kona mau hewa; a ia ia i ike ai ia laua, o mai la oia i kona lima, a noi mai la ia laua e hoola mai laua ia ia.

6. A eia kekahi, i aku la o Alama ia ia, e lalau ana ia ia ma ka lima, Ke manaoio nei anei oe i ka mana o Kristo i ka hoola ia ana?

7. A olelo mai la oia, a i mai la, Ae, ke manaoio nei au i na olelo a pau au i ao mai ai.

8. A i aku la o Alama ia ia, Ina e manaoio oe ma ka hoolapanai ana o Kristo, ua hiki no oe ke hoola ia.

9. A i mai la oia, Ae, ke manaoio nei au e like me kau mau olelo.

10. Alaila, kahea aku la o Alama i ka Haku, i ka i ana, E ka Haku, ko makou Akua, e aloha mai i keia kanaka, a e hoola mai ia ia e like me kona manaoio ia Kristo.

11. A ia Alama i olelo aku ai i ua mau olelo nei, lele ae la o Zezeroma ma kona mau wawae, a hoomaka ae la e hele; a ua hana ia keia mea me ke kahaha nui o na kanaka a pau; a kui aku la ka ike o keia mea mawaena o ka aina o Sidoma a puni.

12. A bapetizo aku la o Alama ia Zezeroma i ka Haku; a hoomaka ae la oia ma ia hope aku e hai olelo aku i na kanaka.

13. A kukulu iho la o Alama i kahi ekalesia ma ka aina o Sidoma, a hoolaa iho la i na kahuna a me na kumu ma ka aina, e bapetizo aku i ka Haku i na mea e makemake ana e bapetizo ia.

14. A eia kekahi, he nui loa lakou; no ka mea, hele paapu mai la lakou mai na wahi a pau e kokoke ana ma Sidoma, a ua bapetizo ia.

15. Aka, o na kanaka e noho ana ma ka aina o Amoniha, ua noho mau lakou ia manawa he poe naau paakiki a ai oolea; aole lakou i mihi i ko lakou hewa, e manao ana no ke diabolo ka mana a pau o Alama laua me Amuleka; no ka mea, no ka aoao o Nehora lakou, a, aole i manaoio i ka mihi ana no ko lakou mau hewa.

16. A eia kekahi, o Alama laua me Amuleka; ua haalele o Amuleka i kona gula a pau, a me ke kala, a me kona mau mea maikai, ma ka aina o Amoniha, no ka olelo a ke Akua, ua hookae ia oia e kekahi poe, he poe makamaka lakou nona mamua, a e kona makuakane a me kona ohana no hoi;

17. Nolaila, mahope iho o ko Alama kukulu ana i ka ekalesia ma Sidoma, ua ike i ke kaohi nui ana, he oiaio, e ike ana ua kaohi ia na kanaka ma ka haaheo o ko lakou mau naau, a i hoomaka ae e hoohaahaa ia lakou iho imua o ke Akua, a i hoomaka ae e hoakoakoa ia lakou iho ma ko lakou mau halelaa e hoomana aku i ke Akua imua o ke kuahu, e makaala ana a e pule mau ana, e hiki ia lakou ke hoopakele ia mai, mai o Satana aku, a mai ka make aku, a mai ka luku aku;

18. Ano, me aʻu i i aku ai, ua ike o Alama i keia mau mea a pau, nolaila, lawe oia ia Amuleka a hele aku la i ka aina o Zarahemela, a lawe ia ia i kona hale iho, a lawelawe ae la ia ia ma kona mau pilikia, a hooikaika iho la ia ia iloko o ka Haku.

19. A pela i pau ai ka makahiki umi o ke au o na lunakanawai maluna iho o ka poe kanaka o Nepai.