1. Aia hoi, e koʻu poe kanaka, no koʻu ae ia ana e hele mai io oukou nei, nolaila, ke hoao aku nei au e olelo aku ia oukou ma kaʻu olelo; he oiaio, ma kuu waha iho, ua ikea eia ka manawa mua i olelo aku ai au ia oukou ma na olelo a koʻu waha ponoi, oiai, ua hoopaa loa ia au ma ka nohohookolokolo, a no ka nui o kaʻu hana i hiki ole iaʻu ke hele mai io oukou nei;

2. Aole no hoi au i hiki ke hele mai i keia manawa, ina ua haawi ole ia aku ka nohohookolokolo ia hai, e noho ma kuu hakahaka; a ua ae mai ka Haku ma ke aloha nui i hele mai ai au io oukou nei.

3. A, aia hoi, ua hele mai nei au me ka manaolana nui a me ka makemake nui, i ike ai au malia paha ua hoohaahaa oukou ia oukou iho imua o ke Akua, a ua hoomau aku ma ka noi ana i kona lokomaikai, i ike ai au ia oukou me ka hewa ole imua ona; i ole ai au e ike ia oukou iloko o ka hihia weliweli o ko kakou poe hoahanau i hihia ai ma Zarahemela;

4. Aka, e hoomaikai ia ka inoa o ke Akua, ua haawi mai la oia iaʻu e ike, he oiaio, ua haawi mai la iaʻu i ka olioli nui loa i ka ike ana ua hookupaa hou ia lakou ma ke ala o kona pono.

5. A ke lana nei au, e like me ka Uhane o ke Akua iloko oʻu, he olioli no auanei koʻu no oukou; aole nae au i makemake e hiki mai koʻu olioli no oukou, ma o na pilikia a me na kaumaha la me aʻu i loaa ai no na hoahanau o Zarahemela; no ka mea, aia hoi, ua hiki mai koʻu olioli no lakou mahope iho o ka auhele ana mawaena o na pilikia a me ke kaumaha nui.

6. Aka hoi, ke lana nei au aole oukou iloko o ka noho hoomaloka nui ana e like me ko oukou poe hoahanau; ke lana nei au aole oukou i hookiekie ia iluna ma ka haaheo o ko oukou mau naau; he oiaio, ke lana nei au aole oukou i kau aku i ko oukou mau naau maluna o ka waiwai, a me na mea lapuwale o ke ao nei; he oiaio, ke lana nei au aole oukou e hoomana kii ana, aka e hoomana ana oukou i ke Akua oiaio a ola; a e nana ana oukou imua no ke kala ia ana o ka oukou mau hala, me ka manaoio mau loa e hiki mai ana.

7. No ka mea, ke i aku nei au ia oukou, ua nui na mea e hiki mai ana; a, aia hoi hookahi mea i oi aku ka nui mamua o ia mau mea a pau; no ka mea, aole e loihi aku ka manawa, e ola ana ka Mea Hoolapanai, a e hele mai ana mawaena o kona poe kanaka.

8. Aia hoi, aole au e i aku nei e hele mai oia mawaena o kakou i kona wa e noho ai ma kona kino maoli; no ka mea, aole i olelo mai ka Uhane pela iaʻu. Ano, aole au i ike no ia mea; aka, eia kaʻu i ike ai, he mana ko ka Haku ke Akua e hana i na mea a pau i ku i kana olelo.

9. Aka hoi, ua olelo mai ka Uhane i keia iaʻu, i ka i ana: E kahea aku i keia poe kanaka, i ka i ana, e mihi oukou, a e hoomakaukau i ke ala o ka Haku, a e hele ma kona mau kuamoo, he pololei lakou; no ka mea, aia hoi, ua kokoke mai ke aupuni o ka lani, a e hele mai ana ke Keiki a ke Akua maluna iho o ka honua.

10. Aia hoi, e hanau ia mai oia na Maria, ma Ierusalema, oia no ka aina o ko kakou poe kupuna, he wahine puupaa oia, he ipu maikai i wae ia, e hoomalu ia oia, a e hapai ma ka mana o ka Uhane Hemolele, a e hanau mai i kahi keikikane, he oiaio, i ke Keiki a ke Akua;

11. A e hele aku oia, e auamo ana i na eha, a me na pilikia, a me na hoowalewale o kela ano keia ano; a o keia i hooko ia ai ka olelo e olelo ana, E lawe no oia maluna ona i na eha a me na mai o kona poe kanaka;

12. A e lawe maluna ona i ka make, e hiki ia ia ke hookuu i na apo o ka make e hoopaa ana i kona poe kanaka; a e lawe no maluna iho ona i na nawaliwali o lakou, e hiki i kona naau ke hoopiha ia me ke aloha, mamuli o ka io, e hiki ia ia ke ike lea mamuli o ka io e kokua i kona poe kanaka mamuli o na nawaliwali o lakou.

13. Ano, ke ike mai nei ka Uhane i na mea a pau; e popilikia ana nae ke Keiki a ke Akua mamuli o ka io, e hiki ia ia ke lawe maluna ona i na hewa o kona poe kanaka, e hiki ia ia ke holoi mai i ka lakou mau hala, mamuli o ka mana o kona hoopakele ana; ano hoi, oia no ka hoike ana iloko oʻu.

14. Ano, ke i aku nei au ia oukou, e mihi oukou e pono ai, a e hanau hou ia; no ka mea, ke i mai nei ka Uhane, Ina aole oukou e hanau hou ia, aole e hiki ia oukou ke loaa ke aupuni o ka lani; nolaila, e hele mai a e bapetizo ia i ka mihi, i holoi ia oukou mai ko oukou mau hala ae, i loaa ai ia oukou ka manaoio ma ke Keikihipa a ke Akua, oia ka mea e lawe aku ana i na hala o ko ke ao nei, oia hoi ka mea mana e hoola mai a e hoomaemae mai, mai na mea pono ole ae a pau;

15. He oiaio, ke i aku nei au ia oukou, e hele mai a e hopohopo ole, a e waiho aku i kela hewa i keia hewa e hoopuni wale ana ia oukou, e nakinaki ana ia oukou ilalo i ka make; oia, e hele a e hele aku, a e hoike aku i ko oukou Akua e ae ana oukou e mihi i ko oukou mau hewa, a e komo iloko o kekahi berita me ia e malama i kana mau kauoha, a e hoike aku ia mea ia ia i keia la, ma ka hele ana iloko o na wai o ka bapetizo;

16. A o ka mea nana e hana i keia, a e malama i na kauoha a ke Akua mai ia manawa aku, oia ke hoomanao auanei i kaʻu e i aku nei ia ia, he oiaio, e hoomanao no oia ua olelo aku au ia ia, e loaa no auanei ia ia ke ola mau loa, e like me ka hoike ana o ka Uhane Hemolele, e hoike nei iloko oʻu.

17. Ano, e koʻu poe hoahanau i aloha ia, ke manaoio nei anei oukou i keia mau mea? Aia hoi, ke i aku nei au ia oukou, Ae, ua ike au ua manaoio oukou i ua mau mea nei; a o kuu mea i ike ai e manaoio ana oukou ia mau mea, oia ma o ka hoikeana la o ka Uhane iloko oʻu. Ano, no ka ikaika o ko oukou manaoio no ia mea, he oiaio, no ia mau mea aʻu i olelo ai, ua nui koʻu hauoli.

18. No ka mea, me aʻu i olelo aku ai ia oukou mai kinohi, ua nui koʻu makemake i ole ai oukou iloko o ka hihia e like me ko oukou poe hoahanau, pela wau i ike ai ua ko mai koʻu makemake.

19. No ka mea, ke ike nei au aia oukou ma ke ala e hiki aku ai i ke aupuni o ke Akua; he oiaio, ke ike nei au e hoopololei ana oukou i kona mau kuamoo;

20. Ke ike nei au ua hoike ia mai ia oukou ma ka hoikeana o kana olelo, ua hiki ole ia ia ke hele ma na ala kekee; aole hoi oia e lauwili ae mai ka mea ae, ana i olelo mai ai; aole hoi ona luli iki ae mai ka akau i ka hema, aole hoi mai ka mea i pololei i ka mea i pololei ole; nolaila, o kana hana ana oia hookahi mau loa no ia.

21. Aole oia i noho iloko o na luakini hemolele ole; aole hoi e hiki i ka paumaele, aole hoi i kekahi mea i maemae ole ke hookipa ia iloko o ke aupuni o ke Akua; nolaila ke i aku nei au ia oukou, e hiki mai ana ka manawa, he oiaio, a ma ka la hope no ia, o ka mea i paumaele, e noho no oia iloko o kona paumaele.

22. Ano, e koʻu poe hoahanau i aloha ia, ua olelo aku au i keia mau mea ia oukou, i hiki iaʻu ke hoala ia oukou e ike i ka mea pono a oukou e hana aku ai i ke Akua, i hele hewa ole ai oukou imua ona; i hele oukou mamuli o ka aoao hemolele o ke Akua, mamuli o ia mea i loaa ai oukou.

23. Ano, ke makemake nei au e haahaa oukou, a e hoolohe, a akahai; oluolu ke noi ia mai; piha me ke ahonui a me ka hoomanawanui; e pakiko hoi ma na mea a pau; e molowa ole ma ka malama ana i na kauoha a ke Akua i na manawa a pau; e noi ana no na mea a oukou i nele ai, no ko ka uhane a no ko ke kino hoi; e aloha mau ana i ke Akua no kela mea keia mea i loaa ai ia oukou;

24. A e ike oukou no oukou ka manaoio, ka manaolana, a me ke aloha, alaila, e lako mau oukou ma na hana pono;

25. A na ka Haku e hoopomaikai ia oukou, a e malama kina ole i ko oukou mau aahu, i lawe ia oukou mahope e noho pu iho me Aberahama, o Isaaka, a me Iakoba, a me na kaula hemolele, ka poe i ola mai ka hoomaka ana mai o ke ao nei, me ko oukou mau aahu kina ole, e like me ke kina ole o ko lakou mau aahu ma ke aupuni o ka lani, e hele hou ole ae iwaho.

26. Ano, e oʻu poe hoahanau i aloha ia, ua olelo aku la au i keia mau mea ia oukou, e like me ka ka Uhane hoike ana mai iaʻu; a ke hauoli nui loa nei koʻu uhane, no ka ikaika a malama nui ana o oukou i ka hoolohe mai i kaʻu olelo.

27. Ano, e kau mai ka maluhia o ke Akua maluna iho o oukou, a maluna iho o ko oukou mau hale a mau aina, a maluna iho o na pua a me na ohana holoholona o oukou, a me na mea a pau a oukou i loaa ai; o na wahine a me na keiki a oukou, e like me ko oukou manaoio a hana maikai, mai keia manawa aku a mau loa aku. A pela wau e olelo aku nei. Amene.